Itre Ewekë Hna Saze Göne La Zonal La Tour de Garde!
1 Ase petre kö thuemacanyi së ngöne lo kola nyiqaane la macatre celë ka hape: Nyiqaane e Januare 2008, tro ha lue pengöne zonal La Tour de Garde, caas kowe la itre atr ka ala nyim nge ame ketre, tre, kowe la lapa ne la itre trejine Keresiano! Maine jë epuni a hane hnyinge ka hape: ‘Nemene la eisapengönene la lue zonal? Nemene la thangane ka lolo hna troa kapa qa ngöne la hna aisane la lue zonale cili? Hapeu, hetre itre ewekë ka hnyipixe ka troa mama ngöne lai lue pengöne zonale ka hnyipixe?’
2 Eisapengönene Lue Ej: Ame la pane zonal ne la treu, tre, kola troa hëne ka hape, “Édition publique” (Koi Nöjei Atr). Ame asë hi la itre hna cinyihane hnine la zonale cili, tre, hna hnëkëne matre troa kepe thangane hnene la itre atr ka ala nyim. Ame pë hë la ketre zonale ne 15 ne la treu, tre, “Édition d’étude” (Göi Ini), nge thaa tro kö a tro fë ngöne la hna cainöje trootro. Eje e hnine la zonale cili la itre hna cinyihan thatraqane la itre ini ne la treu, me itre xane kowe hmekuje hi la itre Keresiano ka sa xepu hë. Ame la zonal La Tour de Garde hna hape “Édition publique,” tre, thaa kolo hmekuje kö a kepe thangane hnene la itre Temoë, ngo hna hnëkëne hnyawa itre ej kowe la itre ka thaa hane kö ce hmi me easë laka thaa itre Temoë kö, nge ka metrötrëne la Tusi Hmitrötr. Ame koi Réveillez-vous ! tre thatraqane la itre atr asë, tune mina fe la itre ka luelue me itre ka thaa hane kö sin la itre hmi Keresiano.
3 Itre Eloin: Ame ngöne la zonal hna hape “Édition d’étude,” thaa nyipi ewekë kö troa qeje pengöne la itre hnëewekë hna hape “pionie,” itre trenge ewekë hna thatreine troa trotrohnine hnene la itre ka thaa hmi kö, laka thaa itre Temoë kö. Ame mina fe hnine la zonale cili, tre, hetrenyi la itre ithuemacanyi hna hnëkëne thatraqane hmekuje hi la Itretre Anyipici Iehova memine la itre hnainin ka kökötre ngöne la götrane la ua. Nge tune kaa la zonal “Édition publique”? Pine laka ame la itre topik memine la aqane cinyihan, tre, hna hnëkëne hnyawa thatraqane la itre atr ka ala nyim, haawe, loi e tro la itre ka thaa hane kö ce hmi me easë, a madrine troa e asë la zonal. Ngo eje hi lai laka, tro la nöjei ka Anyipici Iehova asë a kepe thangane ka loi qa ngöne la hnei angatr hna e la lue zonale cili. Pine laka easë a troa cainöje fë la caa zonal La Tour de Garde memine la caa Réveillez–vous ! ngöne la treu, haawe, troa kuca la nyimu aqane nyiqaane ithanata ka lolo ngöne la treu ka pexeje cili.
4 Itre Götrane Ka Hnyipixe: Hetrenyi la itre götrane ka hnyipixe hna hnëkën e hnine la zonal La Tour de Garde hna hape “Édition publique.” Ame la ketre götran hna troa ithanatan, tre, ene la itre ini hna nyitrepene hnei Tusi Hmitrötr, nge ka hmaloi la aqane cinyihan matre thaa jole kö e troa trotrohnin. Ame la ketre, tre, kola troa amamane la aqane troa xatuane hnei Tusi Hmitrötr la itre fami. Hetrenyi la itre ini hna hnëkëne thatraqane la itre thöth. Eje e hnine la lue zonal la ketre hna cinyihan ka qatrenge la itre xötr ne la Tusi Hmitrötr ka ini së la itre thiina i Iehova.
5 Easë a thithi koi Iehova matre tro Nyidrëti a amanathithine la hna amekötine celë ka hnyipixe, ene la zonal La Tour de Garde. Epi tro la maca ka loi e hnine lai zonale cili, ene la La Tour de Garde memine la zonal Réveillez-vous ! a ketr la hni ne la itre atr ka nyimutre catr.—Mat. 10:11.