Itre Hna Cinyihan Ka Hnyipixe Nyine Nyiqaane Inine La Tusi Hmitrötr Memine La Itre Atr
1. Nemene la hna cinyihane ka hnyipixe ka troa mama ngöne la zonal La Tour de Garde thatraqane la nöjei atr, nge nemene la aliene ej?
1 Qaane la treu ka troa xulu, tro ha mama la ketre hna cinyihan ka hnyipixe ngöne la zonal La Tour de Garde thatraqane la nöjei atr, nge eje a troa xatua së troa nyiqaane inine la Tusi Hmitrötr memine la itre atr. Ame la taan la hna cinyihane cili, tre, “ Ce qu’enseigne la Parole de Dieu ” (Inine Jë La Wesi Ula i Akötresie). Maine nyipici laka hetrenyi la itre xaa atrene la teritoare së ka ajane hi troa e la itre zonale së, ngo ame la hna cinyihane celë, tre, tro sa xome eje matre troa ce ithanatane memine la itre atr.
2. Nemene la aqane eköth la hna cinyihane celë?
2 Aqane Eköth Lai Hna Cinyihan: Ame la taan ka tru memine la itre taan ka co hna cinyihan atrun, tre, hna eköthe itre eje ceitu me itre hnying hne së hna troa xome ngöne la easa porotrike memine la atr. Hetrenyi la itre xaa xötr ka sisitria hna hamën ngo thaa hna fejane kö, ke hna eköthe tune lai matre tro la atr a ketre sipu goeëne me xomi ini qa hnine la Wesi Ula i Akötresie. Pine laka thaa ka qea menu kö la itre paragaraf, haawe, ijije hi tro sa ce ithanatane itre ej ngöne la qene qëhnelö. Kola wanga atrune hnene la nöjei hna cinyihan la itre mekune qa hnine la itus Ini Tusi Hmitrötr matre tro sa thele troa nyiqaane inine la Tusi Hmitrötr memine la itre atr.
3. Ame la easa cainöj ngöne itre hnalapa trootro, tune kaa la aqane tro sa xome la hna cinyihane celë, matre troa nyiqaane inine la Tusi Hmitrötr memine la ketre atr ngöne la qene qëhnelö?
3 Aqane Troa Huliwane Ej: Ame ngöne la easa tro fë la itre zonal, loi e tro sa amejëne la ketre hnying ka troa ketr lai atr, nge hna ithanatane hnene la ketre taane lai zonal. Drei la ketre ceitun, ame hnine la zonal ne 1 Januare, tre kola troa qaja la enyipiewekëne la Tusi Hmitrötr. Hnyinge jë ka hape: “Hapeu, nyipëti kö a goeëne la Tusi Hmitrötr ceitu me Wesi Ula i Akötresie, maine pena ketre itusi ka lolo hi? [Nue pi troa sa.] Eni a ajane troa amamai nyipë la ketre ewekë ka lolo göne la mekune cili.” Amamane jë la pane hnying me e la pane paragaraf, nge ce xome jë la xötr hna hamën. Thupene lai, e hmaca jë la hnying, nge sipone jë kowe la atr troa qaja la mekune i nyidrë. Ce wange ju la ka ijij memine la atr, me xome la itre hnying nyine taan porotrik. Qëmekene troa nue nyidrë, qaja jë la hnaaluene hnying nge isa pui jë me nyidrë, matre troa ce ithanatane lai. Bëeke jë ngöne la nöjei wiik matre troa ce ithanatane la itre paragarafe ne la hna cinyihan, uti hë la troa traqa fë hmaca la ketre zonal. Ame la ketre aqane troa huliwane ej, tre, ene la troa hnyingëne lai atr, maine nyidrëti kö a ajane troa inine la Tusi Hmitrötr. Thupene lai, xome jë la hna cinyihan cili matre troa amamane la aqane troa inine la Tusi Hmitrötr.
4. Tro sa huliwane tune kaa la itre hna cinyihane celë, ngöne la easa iwai hmaca?
4 Ijije mina fe tro sa huliwane hnyawa la hna cinyihane celë, ngöne la easa wange la itre atr ka kapa pala hi la itre zonal së, maine pena lo itre hne së hna wange hmaca. Tro hi sa qaja ka hape: “Hetrenyi e hnine La Tour de Garde celë la ketre hna cinyihane ka hnyipixe. Hanawange la aqane troa huliwane ej.” Eahuni pala hi a catre thith, matre tro la hna cinyihane celë ka hnyipixe a xatuane la ka ala nyimu troa “wangate hmekune la nyipici.”—1 Tim. 2:4.