Aqane Troa Nyiqaane La Itre Etid Jëne La Itre Zonal Hna Tro Fë
1. Nemene la aja i epuni e kapa jë la itre zonale hnene la itre atr?
1 Ame ngöne la hna cainöje trootro e itre mecixen, hne së hna lapaa tro fë la itre zonal La Tour de Garde me Réveillez-vous ! Ngo, ewekë hi lai nyine troa kuca panën, e ajane së troa inine la nyipici kowe la itre atr ka hetre hni ka meköt. Hane cahu itre xaa mekune nyine ixatua ngöne la aqane troa tro fë la itus Ini Tusi Hmitrötr ngöne la kola iwaihmaca me nyiqaane ini Tusi Hmitrötr me itre atr. Tro ha hetre thangan e hnei epuni hna xome itre eje thenge la teritoare i epun me qaja ngöne la sipu aqane ithanata i epun. The cile kö troa xome la ketre aqane tro fë ithanata ka hetre thangane koi epun.
2. Nemene la aqane tro sa xome la itre pane mekune ne la itus Ini Tusi Hmitrötr matre troa nyiqaane etid memine la ketre atr?
2 Xome Jë La Itre Pane Mekune Ne La Itus: Ame la epuni a bëek, qaja jë ka hape: “Ame lo itre zonal hnei nyipë hna kapa, itre eje a ee së kowe la Tusi Hmitrötr. Hanawange la kepine matre nyipi ewekë catre troa e la Tusi Hmitrötr.” E jë la Isaia 48:17, 18; Ioane 17:3; maine ketre xötre pena ka ihmeku. Thupene lai, ame la kola ase amamane kowe lai atr la itus Ini Tusi Hmitrötr, hamëne jë la itusi angeic, me hape tune la:
◼ “Tusi Hmitrötr a hamëne la nyipi mejiune thatraqane la itre drai elany.” Amamane jë kowe lai atr la itre götrane 4-5, me hnyinge ka hape, “Nemene la itre hna thingehnaeane e celë hnei epuni hna ajane troa eatrën?” Amamai angeice jë la mekene ka ithanatane la hna thingehnaeane qa hnine la Tusi Hmitrötr hnei angeice hna iën, nge nango ce wange ju me angeice la caas maine lue paragarafe, maine ijij.
◼ Maine qaja jë pena ka hape, “Tusi Hmitrötr a sa la itre hnyinge ka nyipi ewekë catre kowe la mel.” Amamane jë la götrane 6, nge hnyingë angeice jë maine hnei angeice fe hë hna hane ketre hnyingëne thele la ketre hnyinge ka eje e cahu fene lai götran. Fe jë kowe la mekene ka sa lai hnying, nge nango ce wange ju la caas maine lue paragaraf.
◼ Maine pena, amamane jë la itre taane mekune ngöne la itre alien ne la itus, me hnyingëne la taane hnei angeice hna ajane troa ithanatan. Fe jë kowe lai mekene cili, nge nango iamacanyine jë la aqane troa inine la Tusi Hmitrötr.
3. Tune kaa la aqane troa nyiqaane la ketre etid thupene la hna kapa la itre zonal ka qejepengöne (a) la engazone la fene celë? (b) la fami? (c) la enyipicine la Tusi Hmitrötr?
3 Amejëne Jë La Ketre Hnyinge Ngöne La Kola Xötrei Vizit: Hetrenyi la ketre aqane troa hnëkëne la iwaihmaca ngöne la xötrei vizit. Thupene la hna kapa la lue zonal hnene lai atr, amejëne jë la ketre hnying, me qaja axeciëne koi angeice laka, tro epuni a bëeke hmaca troa sa lai hnying. Thele jë la ijine ka ijije matre troa iöhnyi hmaca, nge loi e xecie koi epuni troa eatrëne la hna isapui. (Mat. 5:37) Ame la epuni a bëek, amekunëne jë lai atr lo hnyinge hna amejën, me nango e la mekune ka sa lai hnying qa hnine la itus Ini Tusi Hmitrötr me ce ithanatan. Hamë angeice jë la itusi angeic matre tro pë hë angeice a ketre goeën. Hanawange la itre tulu ne ithanata ka ala xalaithe hi:
◼ Maine hna kapa hnene la atr la zonal ka qejepengöne la engazone la fen, qaja jë ka hape, “Ame ngöne la eni a bëeke hmaca, tro nyiso a ce ithanatane la mekune qa hnine la Tusi Hmitrötre ka sa la hnyinge celë, Nemene la itre ewekë ka troa saze e celë fen hna troa acile hnei Akötresie?” Amamane jë la itre götrane 4-5 ngöne la epuni a bëeke hmaca. Maine pena, amejëne jë la hnyinge hna hape, “Aja i Akötresieti kö la itre hulö ka traqa?” Ame la epuni a bëeke hmaca, amamane jë kowe lai atr la lue paragarafe 7-8 ngöne la mekene 1.
◼ Maine hna kapa hnene la atr la zonale ka qejepengöne la fami, qëmekene troa nue angeic, hnyinge jë tune la, “Nemene la nyine tro la itre atrene la fami, angatr isa ala caas, a kuca matre troa mele madrine e hnine ej?” Ame la epuni a bëek, ce wange jë la paragarafe 4 ngöne la mekene 14.
◼ Maine hna kapa hnene la atr la zonale ka qejepengöne la enyipicine la Tusi Hmitrötr, amejëne jë la hnyinge celë thatraqane la iwaihmaca hnapin, “Hna jele nyipicine kö la Tusi Hmitrötre hnene la sias?” Ame ngöne la iwaihmaca, ce wange ju la paragarafe 8 ngöne la mekene 2.
4. Nemene la nyine tro sa kuca maine thaa kapa kö hnene lai atr la itus Ini Tusi Hmitrötr?
4 Loi e tro pala hi a amejëne la ketre hnyinge ngöne la pune la porotrik, matre troa sa ngöne la kola iwaihmaca. E kolo ha kuca lapaane la etid, ce wange ju matre troa ce ithanatane ngöne la qaane la itus uti hë ngöne la pun. Nemene la nyine kuca maine thaa kapa kö hnene lai atr la itus Ini Tusi Hmitrötr? Loi e tro pala hi epuni a tro fë la itre zonal, me ce thawa me angeic la itre mekune qa hnine la Tusi Hmitrötr. Ame ngöne la epuni a akökötrene thei angeice la hni ne aja, tre troa hmala la hni angeice elanyi troa hane inine la Tusi Hmitrötr.
5. Pine nemene matre loi e tro sa thele matre thaa tro kö sa hamë zonale hmekuje kowe la itre atr?
5 Kola xatuane la ketre atr hnene La Tour de Garde me Réveillez-vous ! troa hane thele troa atrepengöne la nyipi ini hna hamën hnei Tusi Hmitrötr. Qa ngöne lai, thele jë troa nyiqaane inine la Tusi Hmitrötr kowe la itre ka kapa la itre zonal. Aqane tro hi së lai a trongëne la itre hna amekötine hnei Iesu koi së, lo troa “inine la nöjei nöj’ asëjëihë me . . . , ini angate.”—Mat. 28:19, 20.