Aqane Troa Maca Ngöne La Hna Cainöj—Troa tro fë la itus Ini Tusi Hmitrötr

Enyipiewekën: Ame la itus Ini Tusi Hmitrötr, tre, celë hi ketre jiane huliwa ka sisitria ngöne la hnë ami zuti së. Ketre itusi lai nyine troa xome matre troa xatuane la itre atr troa atrepengöne hnyawa la itre ini qa hnine la Tusi Hmitrötr. Ngo, qëmekene troa ini tus memine la ketre atr, loi e tro sa pane hamë angeic lai itus. Haawe, loi e tro sa catre thele troa maca ngöne la easa tro fë lai itus Ini Tusi Hmitrötr ngöne la hna cainöj. (Ite edomë. 22:29) Nyimutre la itre aqane troa tro fë la itus, matre nyipi ewekë kowe la itre ka cainöj tro angatr a xome la ka loi koi angatr. Hane cahu itre xaa nyine troa kuca.

Aqane Troa Kuca:

Xome jë la ketre hnyinge ka troa aciane la aja ne la atr troa tro kowe la ketre mekene ne la itusi hnei angeic hna pi ithanatan. Ka loi fe troa iëne la ketre hnying hna hnëkëne amë hë nge ka nyiqane la nöjei mekene la itus. Thupene la hna dreng la atr e sa, e jë la ketre xötr ka ijij nge thupene lai amamane jë koi angeic la paragaraf ka ihmeku memine la mekun hna ce ithanatan, maine jë tro hi a qaja la ka ijij.
Ame la ketre aqane troa kuca, tre, ene la troa xome la itre pane götranene la itus matre troa aciane la aja ne la atr, nge thupene lai, amamane jë koi angeic la hna sa hnei Tusi Hmitrötr hnine la itus. Drei la ketre ceitun, maine jë tro epuni a qaja la ketre ewekë ka ngazo hna qaja ngöne la itre nuvel, me qejepengöne ka hape, nyimutre la itre atr ka thele la itre mekune ka sa la itre hnying ne la götrane 3. Maine pena, tro epuni a qaja ka hape, epuni a wange la itre atr ka lapa ezi epuni matre troa ce thawa me angatr la itre aqane mele ka lolo elany. Thupene lai, amamane jë la itre iatr ngöne la götrane 4-5 me hnyingëne ka hape, “Nemene la itre hna thingehnaeane hnei epuni hna pi melën elany?” Ame la ketre aqane troa kuca, tre, troa qaja ka hape, epuni a traqa troa iwai matre troa xatuane la itre atr troa sa la itre hnying ka nyipiewekë kowe la mel. Thupene lai, amamane jë kowe la atr la itre hnying ekuhu fene la götrane 6, nge hnyingëne jë koi angeic la hnei angeic hna pi ithanatan.
Xome jë la ketre aqane troa ithanata matre canga ini tus la atr. Maine jë tro epuni a qaja ka hape: “Eahuni a amamane kowe la itre atr la aqane troa inine la Tusi Hmitrötr. Hapeu, hnei epuni hna hane ini tusi ekö? [Nue pi troa sa.] Maine ijije hi koi epun, nge hetre Tusi Hmitrötre i epun, eni a ajane troa amamane koi epuni la aqane troa ini tus.”

Tupathe Ju Ngöne La Treu Celë:

Amacane jë ngöne la ijine kola hmi ne la hnepe lapa.
Ame ngöne la hna cainöj, ce thawa jë memine la itre xa ka cainöj la hnei epuni hna mekune troa qaja. (Ite edomë. 27:17) Saze jë la aqane tro epuni a tro fë la itus, maine epuni a öhne laka tha ka loi kö.