Ketre Ixatua Göne La Huliwa Ne Cainöj
1. Nemene la lue kepine matre kuca jë lo tane mekune hna hape, “Kola Porotrik Memine La Ketre Atr”?
1 Ame ngöne la itre xa ijin, easa öhne ngöne lo Ita Ne Thup la ketre tane mekune hna hape, “Kola Porotrik Memine La Ketre Atr.” Lue kepine matre kola kuca lai tane mekune cili: ketre jëne troa amamane la ini hna hamëne hnei Tusi Hmitrötr, nge ketre tulu ne aqane troa sa hnyawa kowe la itre atr ka hnying. (1 Pet. 3:15) Nemene la aqane tro sa nyipi ewekëne lai tane mekune cili?
2. Nemene la aqane tro sa huliwane la tane mekune cili ngöne la huliwa ne cainöj?
2 Huliwane Jë Ngöne La Hna Cainöj: Maine hetre munëne Ita Ne Thup së, lo itre ka hetrenyi lai tane mekune cili, loi e tro sa amë hnyawa. Ame hë la kola hnyinge koi së hnene la atrene la ketre hnalapa, maine ketre atr ka ajane troa porotrik, maine ketre atre ini Tusi pena, nge ketre hnyinge hna ithanatane hë e hnine la ketre Ita Ne Thup, haawe, tro hë së lai a hamëne lai tane mekun, me sipone troa ce ithanatane me angeic. Maine pëkö the së la Ita Ne Thup ka ihmeku memine la hna hnyingëne hnene lai atr, ijije tro sa télécharger la tane mekune ngöne lo sit jw.org/dhv.
3. Nemene la aqane tro sa ithanatane la aliene lo tane mekune memine la atrene la ketre hnalapa?
3 Nemene hë la aqane troa ithanatane la aliene lai tane mekune cili me ketre? Hnei itre xan hna sipone laka tro lai atr a e la hna qaja hnene lai atr hna cainöje kow, nge qa i angatr troa e la hna qaja hnene la Atre Anyipicin. Nge öni angatre ka hape, ketre ka loi hi la troa tune lai, ke kolo hi a e hnene lai atr, ngo ame pe, angeice fe a hane atrepengöne la itre ini hne së hna lapaune kow.—Deu. 32:2.
4. Nemene la aqane tro sa ini së kö, jëne la tane mekune cili?
4 Inine Jë Nge Hane Ju Ini Itre Xan: Ame la nyipunieti a e lai tane mekune cili, wange hnyawane ju lo itre xötr, me itre ceitun, me aqane trongene la itre mekun. Mekune hnyawa ju fe la ekeukawane la itre mekune hna hamën. Nge ame hë e thupen, tupathe jë hë ngöne la ijine cainöj. (Ite edomë 1:5; 9:9) Önine la ketre trejine föe ka hape: “Ame la easa e lai tane mekune cili, tre kösë lo kola ini së hnene la ketre pionie ka ‘maca hnyawa,’ nge ka atrepengöne hnyawa la qa së nyine tro sa qaja!”
5. Nemene la aqane tro sa inine la atre ini Tusi me easë troa cainöj?
5 Ijije hi troa inine la atre ini Tusi me nyipunie troa cainöj, jëne lai tane mekune cili. Pane ce e jë me angeice lai tane mekun, nge nue angeice pi troa e la hna qaja hnene la atr ka cainöj. Jëne tro hi angeice lai a inine la aqane troa hamëne hnyawa la itre ithanata, ka qeje pengöne la itre ini hnei angeice hna kapa. (Kol. 4:6) Nyipici laka, jia ne huliwa lai hna hamëne hnei Iehova, matre troa xatua së troa “kuca asë” la qa së ngöne la hna cainöj.—2 Tim. 4:5.