Easa Ajane Ielen La Hnëqa Së, Lo Hna Aijijë Së Kow!
1 Qaane la kola xötrei mele hnene la atr, hnei Iehova hna nue kowe la itre hlue i Nyidrë la itre hnëqa ka nyimutre. Ame la Nyidrëti a hamëne la itre hnëqa, thaa hnei nyidrëti kö hna goeëne la pengöne la itre atr, maine trahmanyi maine föe pena, me goeëne pena la macatre i angatr, me aqane mele i angatre pena. (Luka 1:41, 42; Ite hu. 7:46; Fil. 1:29) Nemene la itre hnëqa hnei Nyidrë hna hamëne koi së enehila?
2 Itre Xaa Hnëqa Hna Aijijë Së Kow: Ame la ketre ewekë hna aijijë së kow tre, ene laka, hna ini së hnei Iehova. (Mat. 13:11, 15) Ketre hnëqa hna aijijë së kow mina fe, la easa atrunyi Iehova hnene la itre mekune hne së hna hamën ngöne la itre icasikeu ne la ekalesia. (Sal. 35:18) Ame ngöne la nöjei ijine ka ijije tro sa qeje mekun, easa ithanata cememine la madrin. Ketre tune mina fe, maine tro sa goeëne la nöjei hnëqa hnine la ekalesia ceitu me ketre ewekë nyine nyipi ewekë së, tre, tro hë sa eatrëne eje hnyawa thenge la hne së hna atrein. Easë kö a hane kuca la ketre hnëqa së, ene la troa nyidrawane me nyihnyawane la Uma Ne Baselaia së?
3 Itre milio lao atr a isa hnyinge maine Akötresieti jë kö a drenge la itre thithi angatr, ngo ame easë, atraqatre la madrine së ke, hetrenyi the së la ewekë hna aijijë së kow, ene laka hna drenge la itre thithi së hnene la Atr ka sisitria ne la hnengödrai me fene hnengödrai. (Ite edomë 15:29) Iehova a sipu drenge la thithi ne la itre hlue i Nyidrë, angatr isa ala caas. (1 Pet. 3:12) Thaa ase kö Nyidrë nyifegone la etrune la itre ijine tro sa easenyi Nyidrë. Drei la ketre ahnahna nyine tro sa ajan ielen, ene troa thithi “pala hi”!—Efe. 6:18.
4 “Ce Huliwa Tro Kö Me Akötesie”: Ame la ketre hnëqa së ka lolo catr, easë itretre “ce huliwa tro kö me Akötesie,” tre, ene la troa cainöjëne la maca ka loi ne la Baselaia i Akötresie. (1 Kor. 3:9) Ketre huliwa lai ka ithuemadrine me ithuecatr. (Ioane 4:34) Thaa nyipi ewekë kö koi Iehova troa eatrëne la huliwa celë jëne la itre atr, ngo hnei Nyidrëti hna athipe koi së la hnëqa celë ceitu me ketre hatrene la ihnimi Nyidrë koi së. (Luka 19:39, 40) Qa ngöne lai, thaa Iehova kö a hamëne la hnëqa cili kowe la nöjei atr menu. Nyipi ewekë tro la itre ka hane xome la huliwa ne cainöje a trongëne hnyawa la itre hnei Akötresie hna thele thei angatre ngöne la ua, me catre troa eatrëne pala hi itre ej. (Is. 52:11) Hapeu, easë kö a wangatrune la hnëqa cili, ene la troa amë panën la huliwa ne cainöj ngöne la porogarame së ngöne la wiik?
5 Hetre aliene la mele së qa ngöne la itre hnëqa hne së hna kapa qaathei Iehova. (Ite edomë 10:22) Thaa tro pi kö sa wangacone itre ej! Maine easa amamane laka easa nyipi ajane ielene la itre hnëqa së hna aijijë së kow, tre, easë hi lai a amadrinëne la Tretretro së e koho hnengödrai, ene la Atre hamëne la “nöjei ahnahna ka loi asë, memine la ite hna hamëne gufane ka lolo asë.”—Iako. 1:17.