Tusi Qaathei Lapa Ne Xomi Meköt

Ange Trejine Fe, Itretre Cainöjëne La Maca Ka Loi:

Ketre manathith ka tru koi së troa ce huliwa i Iehova, Akötresie ka cas! Easë la itre ka “ce huliwa” me Akötresie. Nge, hnei Nyidrëti hna ahnithi koi së la ketre huliwa ka hmitrötr, me ka iamele, ene la troa cainöjëne la maca ka loi ne la Baselaia hna acil, me hamë ini. (1 Kor. 3:9; Mat. 28:19, 20) Ngo, nyipiewekë tro sa huliwa thenge la hna amekötin matre tro sa atreine eatrëne la huliwa cili e cailo fen ngöne la tingeting me cas.—1 Kor. 14:40.

Tro sa trotrohnine jën la itusi celë la aqane huliwa ne la ekalesia enehila. Ej a qejepengöne la itre hnëqa ka ej thei epun, itre atrene la ekalesia. Maine tro epuni a nyipiewekën, me eatrëne hnyawa la itre hnëqa i epun, tro hë epuni a cile hut ngöne la lapaun.”—Ite hu. 16:4, 5; Gal. 6:5.

Matre eahuni a thuecatre koi epun troa waipengöne hnyawa la itusi celë. Thele jë la aqane tro epuni a trongëne la itre ithuemacanyi ngöne la mele i epun. Maine epuni a xötrei cainöj, nge tha hna bapataisone petre kö, nemene la itre nyine tro epuni a kuca matre troa bapataiso epun? Nge, maine ase hë bapataiso epun, nemene la nyine tro epuni a kuca matre tro pala hi a acatrene la lapaune i epun, me akökötrene la aqane huliwa i epun koi Iehova? (1 Tim. 4:15) Tro epuni a sajuëne tune kaa la tingeting ne la ekalesia? (2 Kor. 13:11) Thele jë la itre mekun ka sa la itre hnyinge celë ngöne la itus.

Maine epuni la ketre trejin trahmany, nemene la nyine tro epuni a kuca matre troa hane drikona, nge thupene lai qatre thup? Kolo pala hi a lö la itre thauzane la itre atr kowe la organizasio i Iehova, nge kolo fe a aja trejin trahmanyi ka maca matre troa nyi mekene i angatr. Jëne la itusi celë, tro epuni a trotrohnine la aliene la troa “ajane” la itre hnëqa cili.—1 Tim. 3:1.

Eahuni a thithi catr matre tro la itusi celë a xatua epun troa öhne me wangatrune la göhne i epun ngöne la organizasio i Iehova. Tru la hne huni hna hnimi nyipunie, epun isa ala cas. Nge, eahuni palahi a thithi matre tro fe epuni elanyi a hane atrunyi Iehova epine palua.—Sal. 37:10, 11; Is. 65:21-25.