Itre Nekö Trahmanyi Fe, Hetre Aja i Epuni Kö?
1. Eue la tro la Keresiano trahmanyi a nyiqaane trongëne la hna qaja ngöne 1 Timoteo 3:1?
1 “Maine kete ate a ajane . . . , angeic a ajane la huliwa ka loi.” (1 Tim. 3:1) Trenge ithanata lai hna fejane ekö kowe la itre Keresiano trahmany, matre troa thue aja i angatr troa kuca la itre hnëqa e hnine la ekalesia. Ngo hapeu, troa treqene matre pane thupëtresiji jë? Ka loi troa nyiqaane akökötrene la aja cili ngöne hë la kola thöth. Aqane tro hi lai a kuca matre nyiqaane inine jë, nge matre mama jë ka hape, ijiji nyipunieti jë kö troa hane drikona elany? (1 Tim. 3:10) Maine ketre thöthi eö ka bapataiso hë, nemene la nyine tro eö a kuca matre hetrenyi jë eö la aja troa kuca la ketre hnëqa e hnine la ekalesia?
2. Troa inine me amamane tune kaa la aja troa nyihlue i itre xan?
2 Mele Ne Hlu: The thëthëhmine kö ka hape, eö a isiine göi huliwa ka loi, ngo tha göi cilë hnëqa kö. Qa ngöne lai, inine jë troa hetre aja troa xatuane la itre trejine me eö, itre trahmanyi me föe. Mekune ju la tulu ka sisitria i Iesu. (Mat. 20:28; Ioane 4:6, 7; 13:4, 5) Sipo Iehova jë troa xatua eö troa inine troa thele la loi thatraqane la itre xan. (1 Kor. 10:24) Hapeu, hetre nyine tro kö a kuca thatraqane la itre atrene la ekalesia ka hetre sine mec, maine ka qatre hë? Hapeu, hnei eö kö hna hane sipu mekune troa thelëne maine kuca la itre xa hnepe jole göi troa nyihnyawane la Uma Ne Baselaia? Hnei eö kö hna hane sipone matre tro eö a inyihnai ngöne la Ini Ne Cainöj Qaathei Akötresie? Tro kö eö a öhne la madrine hnei eö hna troa kapa qa ngöne la hnei eö hna huliwa thatraqai itre xan.—Ite hu. 20:35.
3. Nemene la enyipiewekëne la troa macaje ngöne la götrane ua, nge nemene la nyine troa kuca matre troa traqa kowe lai?
3 Mel Ngöne La Ua: Ame la hna wang atrune catrëne thene la drikona e hnine la ekalesia, tre tha ene kö la hna atrein, maine talane pena, ngo ene pe la pengö i angeice ngöne la ua. Ame la trahmanyi ka macaje ngöne la götrane ua, tre angeic a thele troa xom la aqane waiewekë i Iehova me Iesu. (1 Kor. 2:15, 16) Mama hi thei angeic “la wene la [ua, MN].” (Gal. 5:22, 23) Angeic a catre cainöj, me amë panëne la itre huliwa ne la Baselaia i Akötresie. (Mat. 6:33) Tro hë eö a hetrenyi la itre thiina ka loi ngöne la götrane la ua, e tro eö a majemine ketre ini Tus. Kolo lai a hape, troa e Tusi Hmitrötr e nöjei drai, me e la itre Ita Ne Thup me Réveillez-vous! hna fejane e nöjei treu, me hnëkëne me sine la itre icasikeu. (Sal. 1:1, 2; Heb. 10:24, 25) Ame ekö lo Paulo a cinyany koi Timoteo matre ithuecatre koi angeice troa kökötre ngöne la götrane la ua, öni nyidrëti ka hape: “[Wange kö] la aqane ini.” (1 Tim. 4:15, 16) Haawe, hnëkëne hnyawane jë eö la itre qa hna ahnithe koi eö ngöne la Ini Ne Cainöj Qaathei Akötresie. Hnëkë jë, nge majemine jë eö sine la huliwa ne cainöj. Mekune jë la itre huliwa ngöne la götrane la ua hnei eö hna ajane troa kuca, nge trongëne jë la itre hna amekötine thatraqane lai, matre traqa pi kowe la hna ie: maine troa pionie, maine huliwa ngöne la Bethela, maine troa hane sine pena lo Ini Thatraqane La Itre Trejine Trahmanyi Ka Tha Faipoipo Kö. Maine tro eö a thele troa macaje ngöne la götrane la ua, tro hë eö a atreine “[kötene] la ite aja i thupëtesij.”—2 Tim. 2:22.
4. Nemene la aqane goeëne së la atr ka huliwa nyipici nge ka loi la aqane huliwa?
4 Ka Nyipici, Nge Loi La Aqane Huliwa: Ame ngöne lo hneijine lo itre pane Keresiano, tha hnehengazone kö itre aposetolo la hna kuca hnene la itre Keresiano trahmanyi hna upe troa thewe xen kowe la itre xan, pine laka itre Keresiano lai “hna qaja aloin,” ke itre ka huliwa nyipici, nge lolo la aqane huliwa i angatr. Nge celë hi lai ka aijijëne la itre Keresiano trahmanyi cili troa lapa mekune la itre huliwa ka nyipi ewekë. (Ite hu. 6:1-4) Qa ngöne lai, maine hna ahnithe koi eö la ketre hnëqa e hnine la ekalesia, isiine jë troa kuca hnyawan. Hane ju nyitipune la aqane huliwa i Noa, atre trongëne hnyawa la itre hna amekötine göne la huliwa ne cai aka. (Gen. 6:22) Iehova a wang atrune la atre huliwa nyipici, memine la atr ka macaje ngöne la götrane la ua.—1 Kor. 4:2; wange ju la itre mekune hna eköhagen, hna hape “Eloine La Troa Ini Nyudren.”
5. Pine nemene matre loi e tro la itre thöthi Keresiano a hetre aja troa huliwa?
5 Tune lo hna perofetan ekö, Iehova a anyimenyimëne la huliwa ne icasinekeune la itre atr. (Is. 60:22) Ma traqa koi 250 000 lao atr ka xomi bapataiso e nöjei macatre. Ala nyimu catre la itre ka lö kowe la nyipici, celë hi matre nyipi ewekë troa hetre itre Keresiano trahmanyi ka macaje ngöne la ua, nge ka troa kuca la itre hnëqa e hnine la ekalesia. Easë petre hi la a hane öhne la etrune la huliwa nyine troa kuca hnine la organizasio i Iehova. (1 Kor. 15:58) Ngo hapeu epuni itre thöthi Keresiano, hetre aja i epuni kö? Maine hetre aja i epun, epuni lai a ajane la huliwa ka loi!
[Hna cinyhan ne la götran 2]
Ala nyimu catre la itre ka lö kowe la nyipici, celë hi matre nyipi ewekë troa hetre itre Keresiano trahmanyi ka macaje ngöne la ua, nge ka troa kuca la itre hnëqa e hnine la ekalesia
[Hna eköhagen götran 3]
Eloine La Troa Ini Nyudren
Ame la kola thue qân la itre thöthi Keresiano ka macaj, me ini nyudreni hnene la itre qatre thup, hetre thangane ka loi koi nyudren. Ame ngöne la ketre drai, thupene la icasikeu, kola të hune icea hnene la ketre atre thupë sirkoskripsio memine la ketre ka cainöje hë hnei nyidrëti hna hamë ithuecatre kow, e koho hune la hnë troa cile fë cainöj. Öhne ju hi nyidrëti la ketre nekö trahmanyi ka cile goeë nyidro. Nyidrëti pë hë a hnyinge jë koi angeice maine angeic a pi ithanata me nyidrë, nge öni angeice jë hi ka hape, angeice hi a troa uku aspirateur ngöne la hnë cile fë cainöj, ke qâ i angeice hi lai e nöjei ijine kola ase la itre icasikeu. Kolo ha troa tro hnene la keme me thine i angeic, ngo öni angeic, tro jë kö angeic a tro e ase hë kuca la hnëqa i angeic. Ketrepengöne pi hë la aqane ketr la hni ne la atre thupëne la sirkoskripsio. Öni nyidrë: “Ame la hna isiine hnene la itre qatre thup ne la ekalesia cili, tre ene la troa thue qân la itre thöthi Keresiano, matre troa ini nyudren. Celë hi kepine matre, e traqa mina ha ni troa wai angatr, hetre thöthi Keresiano pala hi hnei angatr hna qaja aloin, me mekune laka, ma ijiji angeice hi troa hane drikona.”