Thele Jë Troa Catre Cainöj
1 Hnei Paulo aposetolo hna qaja catrëne ekö kowe la itre Keresiano troa trongëne la jë i Akötresie, me “amanamanane pala hi.” (1 Thes. 4:1) Nemene la aliene lai koi së? Ame la ketre ewekë, tre, loi e tro sa catre thele jëne troa akökötrene la huliwa së ngöne la ua, me catre pala hi troa ‘kuca asë la hnëqa së.’—2 Tim. 4:5.
2 Sipu Aja Së e Kuhu Hni: Ame la easa thele troa catre cainöj, tre, thangane hi la aja së troa nyihluene hnyawa la Atre Xupi së. Easa ajane troa kökötre ngöne la ua, me thele jëne troa aloine la aqane tro sa xome la huliwa ne cainöje trootro. Maine hetre hne së hë hna majemine kuca cememine la hni ka thel, tro ha xatua së troa eatrëne la itre hne së mekune troa traqa kow ngöne la huliwa i Akötresie.—Sal. 1:1, 2; Fil. 4:6; Heb. 10:24, 25.
3 Nyipi ewekë tro sa huujëne la mele së me hetre hni ne ham matre tro sa catre akökötrene la huliwa ne cainöje së. Ijije troa eënyine la thiina cili, hnene la hna thith me mekune thele la tulu ka lolo hna amë pe hnei Iesu. Atraqatre la madrine hna kapa hnei Iesu qa ngöne la hna nyihluene la itre atr jëne la huliwa ne cainöje i nyidrë. (Ite hu. 20:35) Ijije tro sa nyitipu Iesu ngöne la easa wangatrune la itre atr, me hmekëne la itre ijine ka ijije troa akökötrene la huliwa ne cainöje së.—Is. 6:8.
4 Hnëqa Ne La Itre Keme Me Thin: Ijije troa aciane thene la itre nekönatre e co petre kö nyudren, la aja e kuhu hni angatre troa nyihluene la itre atr me akökötrene la aqane cainöje i nyudren. Tro la itre nekönatr a öhne hnyawa la aja ka catre thene la itre atrene la fami, me aqane thele angatre troa catre cainöje trootro. Ame ngöne la angeice a co, hetrenyi hë e kuhu hni ne la ketre trejine trahmanyi la aja troa huliwa i Akötresie, celë hi thangane la hnei angeice hna majemine ce tro memine la qaaqaa i angeice troa ixatua ngöne la itre huliwa ne la ekalesia. Hnene la hnei angeice hna goeëne la aja ka eje thene la qaaqaa i angeice memine la madrine i nyidrë, ene pe celë hi ka upi angeice troa thele la itre ijine ka ijije troa nyihluene la itre trejine me angeic. Ketre drikona fe hë angeice enehila.
5 Kola Aja Trejine Trahmany: “Maine kete ate a ajane . . . , angeic a ajane la huliwa ka loi.” (1 Tim. 3:1) Kola xatuane hnene la itre trenge ewekë celë, la itre trejine trahmanyi troa ajane matre troa hane aijijë angatre troa cilëne la itre hnëqa e hnine la organizasio i Iehova. Thaa kolo kö la a thele thei angatre la itre hna atreine kuca ka ketre pengöne kö. Ame la trejine trahmanyi ka ajan, tre tro angeice a thele panëne la Baselaia, me catre ngöne la huliwa ne cainöj. (Mat. 6:33; 2 Tim. 4:5) Tro angeice a thele troa hamë tulu ka lolo kowe la itre xaa atr.
6 E Cailo Fen: Iehova a canga icaasinekeune la nöje i Nyidrë. (Is. 60:22) Nyipi ewekë catre enehila kowe la itre trejine asë ka xötrethenge la tulu i Iesu troa catre akökötrene la huliwa ne cainöje i angatr. Kola mama ngöne la rapore ne hna huliwa lo macatre 2006 laka, 248 327 lao hna bapataison. Matre kösë 680 lao ka xötrei lö e nöjei drai. E pi tro sa catre thele jëne troa akökötrene la huliwa ne cainöje së!