Hna Nyijune Ka Loi Kowe La Atre Mele Nyipici
1 Ame ngöne Heberu 11:6 hna thuemacanyi së la pengöi Akötresieti kola hape, “Nyidëti la ate nyi june koi angete thele catë nyidë.” Ame la ketre aqane nyijune Nyidrëti la itretre catre nyihluei Nyidrë ka ‘mele nyipici ngöne la itre ewekë ka co,’ ke, ene la ‘troa acilë angate ngöne la ite ewekë ka nyimutre.’ (Mat. 25:23) Kolo fe lai a hape, Iehova a nyijune la huliwa ne la ketre Temoë ka mele nyipici koi Nyidrë, hnene la troa hamë angeice la itre xaa götraneqa ngöne la huliwa i Nyidrë.
2 Hna nyijune la huliwa i Paulo Aposetolo, ketre atre mele nyipici koi Iehova; hna acilë nyidrë ngöne la hnëqa ne cainöj, ketre huliwa ka aijijë nyidrë troa trongëne la itre traone me itre tribu ne Erop, me Asia Minör. (1 Tim. 1:12) Hnei Paulo pala hi hna wangatrune hnyawa la hnëqa hnei nyidrë hna kapa, ene la troa cainöje trootro, ngacama kola cile hnei nyidrë kowe la itre jole ka tru. (Rom. 11:13; Kol. 1:25) Hnei nyidrëti hna amamane la ejuine la ihnimi nyidrë, ngöne la aqane thele nyidrë la nöjei ijine ka ijije troa cainöj. Hnene la aqane catre cainöje i nyidrë, haawe, nyidrëti hi lai a amamane laka nyidrëti a melëne la lapaune i nyidrë. Kola upi së hnene la tulu hna amë pe hnei nyidrë, matre tro fe së a hane wangatrune hnyawa la itre hnëqa ne cainöje hna athipe koi së.
3 Hnei Iehova Hna Hamë Së La Huliwa Ne Cainöj: Nemene fe la aqane tro së a hane goeëne la hnëqa hna nyijune ka loi, lo hna amamane hnei Paulo? Loi e tro së a thele la itre jëne troa akökötrene la aqane cainöje së. Tro fe së a xolouthe la itre ijine ka ijije troa cainöje e cahu itre gojeny, nge tune mina fe ngöne itre hnalapa trootro. Loi e tro fe së a catre wange hmaca lo itre hnalapa ka pëkö atren, me vizitëne hmaca lo itre atr ka drei së hë. Nge loi e tro pala hi së a eatrëne hnyawa la itre hna isapui göi troa etidi memine la itre atr.
4 Hanawange la ketre ixatua hna hamëne hnei Paulo thatraqane la huliwa ne cainöj, öni nyidrëti ka hape: “Cate jë.” (2 Tim. 4:2) Maine saqe la ketre ewekë nyine troa kuca, haawe, easë a wangatrune hnyawa ju ej. Hapeu, easë kö a goeëne la huliwa ne cainöje së, kösë ketre huliwa nyine troa canga kuca, matre easë hë a amë panëne eje ngöne la mele së? Hanawange la ketre ceitun, ma thaa loi kö e tro së a nue la itre xaa huliwa kö, me itre hna ajane troa isa kuca ngöne la mecixeni me sabath, troa xome pena ha la itre hawa hne së hna mekune thatraqane la huliwa ne cainöje trootro. Mama hnyawa ha koi së enehila laka, calemi catre hë la pune la fene celë, qa ngöne lai, nyipi ewekë tro së a cainöjëne la maca ka loi ne la Baselaia, ke celë hi huliwa lai ka sisitria nyine tro së a kuca ngöne la hnedrai së.
5 Ame la troa mele nyipici koi Akötresie, ke, ene la troa nyihlue i Nyidrë hnene la hni ka nyipici, me ipië, nge troa catre kuca hnyawa pala hi la götraneqa hna athipe koi së. Qa ngöne lai, loi e tro pala hi së a kuca apexejene la huliwa ne cainöje së, nge tro hë Iehova a hamëne la itre manathithi ka tru, hnene laka, lolo la aqane mele nyipici së koi Nyidrë.