Iehova a Amanathithine La Itre Ka Thele Catrë Nyidrë

1, 2. (a) Nemene la aqane ce tro la lue thiina celë, ene la ihnim me lapaun? (b) Nemene la itre hnyinge hne së hna troa ce ithanatan?

HNEI Iehova, Keme së, hna axeciëne troa amanathithine la itre hlue i Nyidrë. Ketre aqane amamane Nyidrëti la ihnimi Nyidrë koi së. Ketre, easa hnimi Nyidrë “ke pa i nyidëti hnimi shë.” (1 Ioane 4:19) Kolo pala hi a kökötre la ihnimi së koi Iehova, nge ketre kolo fe a catre la lapaune së koi Nyidrë. Nge tro fe lai a acatrene catrëne la mejiune së ka hape, tro Iehova a amanathithine la itre ka hnimi Nyidrë.—E jë la Heberu 11:6.

² Iehova la atre nyijun maine amanathithin! Ketre götrane gaa tru ne la pengöi Nyidrëti lai, memine la itre huliwa i Nyidrë. Matre, tha ka gufa kö la lapaune së koi Nyidrë. Tha luelue kö së ka hape, tro kö Nyidrëti a amanathithine la itre ka thele catrë Nyidrë. Easa mekune tune lai, ke, “ame la lapaun, te, kola lapa qale kowe la nöjei ewekë hna mejiune kow.” (Heberu 11:1) Ame la aliene la lapaun, tre ene la troa xecie e kuhu hni së ka hape tro Akötresieti a amanathithine la itre hlue i Nyidrë. Nemene la thangane koi së e hetre mejiune së, ene la troa kapa la itre manathithi elany? Nemene la aqane amanathithine Iehova la itre hlue i Nyidrëti ekö me enehila? Tro sa ce ithanatan.

TRO KÖ IEHOVA A AMANATHITHINE LA ITRE HLUE I NYIDRË

3. Nemene la hna axeciën hnei Iehova ngöne Malaki 3:10?

³ Hnei Iehova hna axeciëne troa amanathithine la itre hlue i Nyidrë. Nyidrëti a upi së troa hamën koi Nyidrë la ka sisitria, me mejiune ka hape, tro kö Nyidrëti a amanathithi së. Öni Iehova: “Tupathi ni jë.” Öni Nyidrëti hmaca jë: “Wange ju maine tha tro kö ni a fepi koi nyipunie la ite thingene la hnengödrai, me nenge hui nyipunie la manathithi uti hë atraqatre catr.” (Malaki 3:10, MN) Ame la easa trongëne la hna qaja hnei Iehova e celë, ene la troa tupathi Nyidrë, easë hi lai a amamane la hni ne ole së kowe la itre manathith ka treqe së.

4. Pine nemene matre loi e tro sa mejiune kowe la trenge ewekë i Iesu ngöne Mataio 6:33?

⁴ Hnei Iesu hna ahnith kowe la itretre drei nyidrë ka hape, e hnei angatr hna amë panëne la Baselaia, tro Akötresieti lai a xatua angatr. (E jë la Mataio 6:33.) Iesu a qaja tun, ke atre hnyawa hi nyidrë ka hape, ka kuca pala hi Akötresie la itre hnei Nyidrëti hna axeciën. (Isaia 55:11) Matre tha luelue kö së laka, e ka catr la lapaune së koi Iehova, tro Nyidrëti lai a eatrën la hnei Nyidrë hna axeciën, lo kola hape: “Tha trojë kö ni a nue eö, nge tha trojë kö ni a tiji ’ö.” (Heberu 13:5) Celë hi hnaewekë lai ka acatren la mejiune së kowe la trenge ewekë i Iesu ka mama ngöne Mataio 6:33.

5. Pine nemene matre kola thuecatre së la aqane sa Iesu koi Peteru?

⁵ Ame la ketre ijin, hnei Peteru aposetolo hna hnying koi Iesu me hape: “Ase hë huni nue tije la nöjei ewekë asë, mate xöte thenge enëtilai ; nge tro huni a hete nemen ?”(Mataio 19:27) Tha hnei Iesu kö hna ameköti Peteru pine hnying tune lai. Hnei nyidrëti fe hna qaja kowe la itretre drei nyidrë ka hape, tro ha traqa koi angatr la itre manathith, ke hnei angatr hna huujëne la mele i angatr koi Iehova. Tro la itre aposetolo me itre trejin hna iën ka mel nyipici a ce mus elany me Iesu e hnengödrai. Ngo, öni Iesu fe, hetrenyi hë angatr enehila la itre manathith, kola hape: “Ame la ate nue pe la uma, me tejin, me xa, me kem, me thin, me ifëkuku, me kuku, me ite hlapa, pine la ëjeng, te, tro ha a ca hadede la o kapa hnei angeic, me hetenyi fe la mele ka tha ase palua kö.” (Mataio 19:29) Hetrenyi asë hi la itretre drei Iesu enehila la itre kem, me thin, me itre trejin trahmany, me föe, me itre kuku e hnine la ekalesia. Matre, e hetre ewekë hne së hna nue pine la Baselaia i Akötresie, ngo ame pe, sisitria catre kö la itre manathith hne së hna troa kapa.

“IUHNI NE LA MELE SË”

6. Pine nemene matre Iehova a axeciën troa amanathithine la itre hlue i Nyidrë?

⁶ Easë fe a trengeneune la itre manathith ka tru catre hmaca kö elany. (1 Timoteo 4:8) Hnei Iehova hna axeciën troa amanathithine la itre hlue nyidrë. Matre celë hi ka aijijë së troa cile hut ngöne la ijine jol. E xecie hnyawa koi së ka hape, Iehova “la ate nyi june koi angete thele catë nyidë,” tro hë së lai a mel nyipici koi Nyidrë.—Heberu 11:6.

7. Pine nemene matre hna aceitunëne la mejiune me iuhni?

⁷ Öni Iesu ngöne la cainöje i nyidrë hune la wetr, ka hape: “Madinejë nyipunie, me aciacin, ke atraqate la june thatraqai nyipunie e hnengödrai ; ke tune mina hi lo hnei angate hna axösisine la ite pane perofeta.” (Mataio 5:12) Hetrenyi la itre hlue i Iehova ka troa kapa elanyi la edrö i angatr e hnengödrai. Nge hetrenyi fe la itre ka troa kapa la edrö i angatr e celë fen, ene la troa hetrenyi la mel ka tha ase palua kö ngöne la paradraiso. Ketre kepine lai matre tro sa ‘madrin, me aciacin.’ (Salamo 37:11; Luka 18:30) Ngo eje hi laka ame la mejiune ka eje the së asë tre, “iuhni ne la [“mel,” MN] ka tha uke me ka cat.” (Heberu 6:17-20) Ame la iuhni, tre ej a cilaxome la he wanga thaane jë ej ngöne la hunëtë ngöne la ijine wene. Ketre tune mina, tro la mejiune ka catre the së a xatua së troa cile hut ngöne la lapaun. Tro ej lai a thue trenge catre së matre tro sa cile catr ngöne la itre ijine jol.

8. Nemene la thangane la mejiune ka eje the së?

⁸ Tro la mejiune ka eje the së a xatua së matre tha tro kö së a hnehengazo menu. Tune la wakacu a axapone la eatre së, tro fe la itre hnei Akötresie hna thingehnaean a axapone la itre hni së ka hace. Matre keukawa la hni së la troa atre ka hape, tro kö Iehova a nyipi ewekë së ngöne la ijine easa nue koi Nyidrë la ehnefe së. (Salamo 55:22) Loi e xecie hnyawa koi së ka hape, “ateine [hi Akötresie] kuca la nöjei ewekë asë ka sisitia hune la hne shë hna sipone me mekune kow.” (Efeso 3:20) Tro Iehova lai a kuca la nöjei ewekë asë matre troa xatua së, ngo tro pala kö a “sisitia” la ixatua i Nyidrë.

9. Nemene la ka amamane ka hape, tro kö Iehova a amanathithi së elany?

⁹ Maine aja së troa kapa la edrö së elany, nyipi ewekë tro sa catre lapaune koi Iehova, me drengethenge la itre hnei Nyidrëti hna amekötin. Öni Mose lo kowe la nöje Isaraela ka hape: “Tro Iehova a nyipi amanathithinyi ’ö ngöne la nöje hnei Iehova Akötesi ’ö hna hamëne koi ’ö nyine zi ’ö mate hetenyi ej ; loi pe maine denge hnyawa eö la aqane ula i Iehova Akötesi ’ö, troa thupëne me kuca la nöjei wathebo celë la ini a ahnithe koi ’ö ngöne la drai celë. Ke Iehova Akötesi ’ö a amanathithinyi ’ö, thenge la hnei nyidëti hna ulatine koi ’ö.” (Deuteronomi 15:4-6) Hapeu, xecie kö koi eö ka hape, tro Iehova a amanathithi eö, e tro pala hi eö a nyihlue nyipici koi Nyidrë? Nyipi ewekë tro sa lapaune tune lai.

IEHOVA LA ATRE AMANATHITHIN

10, 11. Nemene la aqane amanathithine Iehova la aqane nyipici Iosefa koi Nyidrë?

¹⁰ Hna cinyihane la Tusi Hmitrötr nyine ini koi së. Kola mama e hnine ej la aqane amanathithine Iehova la itre hlue i Nyidrëti ekö. (Roma 15:4) Iosefa la ketre tulu ka lolo. Hnene la itre trejine me angeic hna salemë angeic ceitu me hlue. Ame hë e thupen, hnene la föe ne la tixe i angeic hna sili thoi angeic, ame hna akalabusi angeic e Aigupito. Hapeu, iananyi hë angeic qaathei Iehova e cili? Ohea. Öni Tusi Hmitrötr: “Ce Iehova me Iosefa, nge nyidëti a hnimi angeic,” nge ketre “Ce Iehova me angeic, nge hnei Iehova hna amanathithine la hnei angeice hna kuca.” (Genese 39:21, 23) Ngacama tha ka hmaloi kö koi Iosefa la itre ijine cili, ngo ame pe, hnei angeic hna treqene hnyawa la ijine matre tro Akötresieti a thepe angeic qaa lai.

¹¹ Itre macatre thupene lai, hnei Farao hna nue Iosefa hmaca qa hnine la kalabus, nge angeice fe hë a cilëne la götrane hnëqa ka tru e Aigupito, angeice hë la hnaaluene thupei Farao. (Genese 41:1, 37-43) Ame hë la kola hnaho hnene la föi Iosefa, “Iosefa a ati ëjene la haetra Manase ; kola hape, Ke hnei Akötesieti hna axeti ni la nöjei aköteng’ asë memine la hnalapa i kaka asë. Nge nyidëti a ati ëjene la cipa Eferaima ; kola hape, Ke hnei Akötesieti hna amana ni ngöne la nöje hna akötë ni ngön.” (Genese 41:51, 52) Hnei Iehova hna amanathithine la aqane nyipici Iosefa koi Nyidrë, ame hna aijijë angeice troa amelene la angetre Isaraela me angetre Aigupito qa ngöne la jiin. Ketre, mama cile hnyawa koi Iosefa laka, Iehova la atre amanathithi angeic.—Genese 45:5-9.

12. Nemene la aqane mele nyipici Iesu e hnine la akötr?

¹² Hnei Iesu Keriso fe hna hane catre drengethenge Akötresie e hnine la itre akötr, ame hnei Iehova hna amanathithi nyidrë. Nemene la ka xatua Iesu troa mele nyipici koi Iehova? Öni Tusi Hmitrötr: “Ate xomi hnine la sinöe ne iaxösisi nge tha nyipine la hmahma, ngöne la madine hna amë xajawa i nyidë.” (Heberu 12:2, MN) Eje hi laka, tru la madrine i Iesu troa ahmitrötrëne la ëje i Akötresie. Ketre, hna amanathithi nyidrë, ke hna kepe nyidrë hnei Keme i nyidrë, nge nyimu hnëqa hmaca kö hna kapa hnei Iesu. Öni Tusi Hmitrötr, hnei Iesu “hna lapa ngöne la götrane maca ne la therone i Akötesie.” Kolo fe a qaja ka hape: “Ase hë Akötesie nyipi atrunyi nyidëti jë draië, me hamë nyidëti la atesieti ka sisitia hune la nöjei ëjen’ asëjëihë.”—Filipi 2:9.

THA THËTHËHMINE KÖ IEHOVA LA HNE SË HNA KUCA

13, 14. Nemene la aqane goeëne Iehova la hne së hna isa kuca koi Nyidrë?

¹³ Tha luelue kö së laka, ka tru koi Iehova la nöjei ewekë hne së hna kuca koi Nyidrë. Öhne kö Nyidrëti la itre ijine easa xou, ke ame koi së thatreine kö së troa eatrëne la ketre huliwa hna ahnith koi së. Nge Nyidrëti fe a wange atrune la aliene la hni së, ngöne la easa hnehengazo göi huliwa, me hamëne la ka nyipiewekë kowe la mele ne la hnepe lapa së. Ketre, öhne kö Nyidrë la kepine matre thatreine hë së kuca la huliwa i Nyidrë tune ekö ke, wezipo hë së enehila. Loi e xecie hnyawa koi së e cili ka hape, ka tru koi Iehova la aqane nyipici së koi Nyidrë e hnine la itre hace.—E jë la Heberu 6:10, 11.

¹⁴ Ketre ame Iehova, “Ate shamatine [maine dreng] la thithi fe.” Matre tha luelue kö së laka, tro Nyidrëti lai a drei së la easa thithi koi Nyidrë. (Salamo 65:2) Tro Iehova, “Tetetroti ka ihnimi me Akötesieti ate akeukawan’ asë,” a hamë së la nöjei ewekë hne së hna ajan matre tro sa qale catre koi Nyidrë. Ame itre xa ijin, Nyidrëti a akeukawanyi së jëne la itre trejin. (2 Korinito 1:3) Madrine Nyidrë la easa hetre utipin kowe la itre atr. “Ame la ate hnime la ate pë ewekë, te, kola pane hamëne koi Iehova ; nge tro anganyidëti a të la huliwa i angeic.” (Ite Edomë 19:17; Mataio 6:3, 4) Haawe, ame la easa ham me xatuane la itre trejin, Iehova hi lai a wange atrune la loi hne së hna kuca. Matre, hetre hnei Nyidrë hna troa hamëne koi së pine lai. Ketre, hnei Nyidrëti hna axeciëne ka hape, tro kö Nyidrëti a sipu amanathithine la huliwa ka loi hna kuca.

ITRE MANATHITHI ENEHILA ME EPINE PALUA

15. Nemene la itre manathith hnei epuni hna trengeneun? (Wange ju la pane iatr.)

¹⁵ Hetrenyi thene la itre keresiano hna iën la mejiune troa kapa elanyi la edrö i angatr qaathei Iesu, ene la “korona ne la thina ka meköt.” (2 Timoteo 4:7, 8) Ngo, tha kolo kö lai a hape, ka co pë hë së koi Nyidrë ke, hetre ketre mejiune së kö. Itre milio lao “ite xa mamoe” i Iesu a trengeneune la edrö i angatr elany, ene la troa mele epine palua ngöne la Paradraiso e celë fen. Ame e cili, “tro angat’ a madine la tingetinge atraqat.”—Ioane 10:16; Salamo 37:11.

16. Nemene la aqane akeukawanyi së hnei 1 Ioane 3:19, 20?

¹⁶ Ame itre xa ijin, tro së lai a mekune ka hape, tha tru kö la hne së hna huliwa i Iehova, maine pena tha madrine kö Iehova la hne së hna kuca koi Nyidrë. Matre tro së lai a mekune ka hape, tha meköti kö tro sa kapa la itre manathithi elany. Ngo, tha tro pi kö sa thëthëhmine ka hape, “sisitia kö Akötesie hune la ite hni shë, nge kola wangate hmekune la nöjei ewekë asëjëihë.” (E jë la 1 Ioane 3:19, 20.) E hne së hna kuca la huliwa i Iehova pine laka catre la lapaune së memine la ihnimi së koi Nyidrë, eje hi lai laka, tro Nyidrëti lai a amanathithi së, ngacama ame koi së, coco hi la hne së hna kuca koi Nyidrë.—Mareko 12:41-44.

17. Nemene la itre xa manathithi hne së hna kapa enehila?

¹⁷ Iehova mina fe a amanathithine la itre hlue i Nyidrë ngöne la itre drai ne la pune la fene celë. Nyidrëti a thele jëne matre tro sa kapa la itre ithuemacanyi ka mana, me mele tingeting e hnine la lapa ne la itre trejin e cailo fen. (Isaia 54:13) Eje hi laka, Iehova ha amanathithi së enehila jëne la lapa ne la itre trejin e cailo fen, tune lo aqane ahnithe hë hnei Iesu. (Mareko 10:29, 30) Ketre, hna amanathithine la itre ka thele catrë Akötresie jëne la tingeting qaathei Nyidrë me madrin.—Filipi 4:4-7.

18, 19. Nemene la aqane goeëne la itre hlue i Iehova la itre manathithi hnei angatr hna kapa?

¹⁸ Itre hlue i Iehova e cailo fen a kapa enehila la itre manathithi qaathei Iehova. Öni Bianca qa Alema: “Tru catre la oleng koi Iehova ke, hnei Nyidrëti hna xatua ni ngöne la itre haceng, nge tha patre kö Nyidrë ngöne la ca drai. Tha tro jë kö a loi la fen celë, ngo eni pala hi a thel troa qale catre koi Iehova, nge kösë Nyidrëti pala hi a e ni hnene la lue ime i Nyidrë. E nöjei ijin eni a catr huliwa i Nyidrë, kösë sisitria kö la itre manathithi hnenge hna kapa qaathei Nyidrë hune la hnenge hna kuca.”

¹⁹ Ame Paula, ketre trejin ka 70 lao macatre qa Canada tre, hna tithi eahlo hnene la ketre mec (spina-bifida), kösë genyi hë la götrane ipië ne la ngönetrei. Öni eahlo, thatreine hë eahlo enij tune ekö, haawe, hna nyi ifegone hë la aqane cainöje i eahlo. Öni eahlo hmaca jë: “Eni a xome la nöjei pengöne aqane cainöj, tune la troa telefon, maine cainöj e nöjei ijine ka ijij. Hetrenyi thenge la ketre sine itus matre tro ni a fejane la nöjei xötr me mekune qa hnine la itre itusi së, nge tro hmaca kö ni a goeëne lapan. Hnenge hna hëne ka hape, ‘Sine Itusi Nyine Iamele.’ E tro sa wange atrune la itre hna thingehnaean hnei Iehova, tha tro kö a cile hut la kucakuca the së. Tha patre pi kö Iehova the së ngacama isa pengöne ju hë la hne së hna melën.” Ngo eje hi laka, loi e tro eö a ketre sipu mekune la itre aqane amanathithi eö hnei Iehova, memine la itre atr hnei eö hna atre. Mekune jë la aqane amanathithi eö hnei Iehova enehila, me aqane tro Nyidrëti elanyi a amanathithi eö!

20. Nemene la hne së hna lapa treqen?

²⁰ The thëthëhmine kö laka, “hete thupene atraqate” la itre thithi epun. Xecie hnyawa koi së ka hape, ‘thupene hë la hne së hna kuca la aja i Akötesie, tro hë së a hetrenyi la hna thingehnaean.’ (Heberu 10:35, 36) Haawe, thele jë së troa acatrene la lapaune së, me isine troa kuca la huliwa i Iehova. Easa mejiune laka, tro kö Iehova a amanathithi së!—E jë la Kolose 3:23, 24.