Itre Aqane Tro Së a Akökötrene La Huliwa Ne Cainöje Së
1 Kola e la 40 lao macatre enehila, qaane lo kola amamane hnine la zonal, La Tour de Garde ne 15 Januare 1995, la ketre hna cinyihan; ame la taane ej, ke, hna hape, “Hapeu, Epuni Kö a Kuca Asë La Hnei Epuni Hna Atrein?” Eje a amamane cememine la ihnim, laka, atreine hi troa kökötre hnyawa la itretre nyihluei Iehova ngöne la aqane tro angatre a isa catre tro fë la maca ka loi; qa ngöne lai, kola kökötre mina fe la huliwa i angatre kowe la Baselaia. Kola trongëne fe la eamo ka lolo celë enehila, matre easë a catre kuca asë pala hi la hne së hna atreine matre troa hetre thangane ka loi la huliwa së.
2 Troa eköthe asë la nöjei huliwa së hnene la hna amekötine ka tru celë hna hape: “Qâ i’ö troa aja [“Iehova,” MN]” Akötresi’ö hnene la hni’ö ka pexej, me u i’ö ka pexej, me mekune i’ö ka pexej, me tenge cate i’ö ka pexej.” (Mareko 12:30) Loi e tro së a amamane hnyawa la ihnimi së ka pexeje koi Iehova, me xome la nöjei ijine ka ijije koi së troa sisedrëne la huliwa ne Baselaia i Nyidrë. Hanawange cahu itre xaa jëne tro së a akökötrene la huliwa ne cainöje së.
3 Xome Jë Së La Hnëqa Së: Ame koi itre trejine ke, loi e tro angatre a thele troa hane drikona, nge thupene lai troa hane qatre thup. Hetrenyi hnine la zonal, La Tour de Garde ne 1 Semitrepa 1990, la lue hna cinyihane hna hape “Hetre Aja i Epuni Kö Kowe La Ketre Hnëqa?” nge “Ijiji Epuni Jë Fe Hë Troa Hane Xome La Hnëqa?;” jëne lue ej, ke, hna upe la itre trejine ka nyimutre, matre tro angatre a hmala troa xome la itre hnëqa hnine la ekalesia. Sipone jë kowe la itre qatre thupe ne la ekalesia troa hamëne la itre mekune nyine ixatua, ngöne la aqane troa xemine lai mekun, me thele troa maca ngöne la götrane la ua.
4 Hna hëne la itre qatre thup, me itre drikona ka thaa faipoipo petre kö, troa mekune hnyawa la aqane tro angatre a hane wangatrune la Ini Thatraqane La Itre Drikona. Ijije tro epuni a atrepengöne hnyawa la ini cili, jëne la itre mekune e hnine la Index des publications de la Société Watch Tower ne macatre 1986-1995, 1996, ame la tane ke hna hape, “Ini Thatraqane La Itre Drikona.” Hapeu, öhne fe kö epuni laka, hna thawa qëmeke i epuni ‘la qëhnelö ka ishaisha thatraqane la huliwa ne cainöj’? (1 Kor. 16:9a) Nyimutre la itre trejine ka lö hë ngöne la qehnelö cili, nge thaa hane kö angatre ekö mekune la itre hnëqa ka lolo hna troa kapa. Enehila, atraqatre la madrine i angatre troa huliwa ngöne Bethela, maine troa cainöje trootro tune la itre mesinare, maine tune pena la atre thupëne la sirkoskripsio.
5 Cainöje Jë Ngöne La Drai Ka Pexej: Ame koi itre thöthi ka fenesi la itre ini ka tru, nge ka trene pepa, me itre föe ka lapa hnalapa, me itre ka retraite, loi e tro angatre a wangatrune hnyawa la huliwa ne pionie. Wange ju la sinecetrone la Huliwa ne Baselaia ne Julai 1998, nge ithahnata jë memine la itre trejine ka mele tune lai, nge ka xome la huliwa ne pionie. Maine jë tro ha upi epuni troa hane akökötrene la aqane cainöje i epun, hnene la hna pionie tui angatr. (1 Kor. 11:1) Hapeu, ijije kö troa akökötrene la huliwa ne cainöj, matre troa eatrëne la 70 lao hawa ngöne la treu, ene pe hane jë fe pionie lapa?
6 Kola e enehila e cailo fene la 17 000 nge hetre munën, lao trejine trahmanyi me föe ka huliwa hnine la itre Bethela. Kola ce ithahnatane ngöne lo Huliwa ne Baselaia ne Maac 1995, la nyine troa kuca matre troa hane huliwa hnine la itre biero me hnine la Bethela. Hapeu matre hane fe epuni e lai, me wange maine jë ijiji epuni fe troa hane xome la huliwa ka lolo catr nge ka sisitria, ene la troa huliwa hnine la Bethela?
7 Tro Jë Kowe La Itre Götrane Gaa Aja Ka Cainöj: Hapeu, epuni a mele ngöne la ketre götrane hna kuca lapaane, nge nyimu trejine ka ce xomexatuane la itre hnëqa? Hane kö epuni mekune la aqane tro epuni a hane akökötrene la huliwa ne cainöje i epun, hnene la troa tro kowe la ketre götrane gaa aja ixatua catr? Maine jë troa tro kowe la ketre götrane ka easeny, gaa aja trejine matre troa ixatua cainöj. (Mat. 9:37, 38) Loi e troa pane mekune hnyawa la nyine troa kuca, me thele ewekë ngöne la thith. (Luka 14:28-30) Ce ithahnatane jë memine la itre qatre thup, nge memine la atre thupëne la sirkoskripsio, la aja ka eje thei epun. Tro hë angatre a ce wange hnyawa me epuni la ewekë ka loi, maine tro ha tro enehila, maine troa pane hnëkë. Maine epuni a ajane troa cinyanyi koi Sasaiatri matre troa hnyingëne la götrane ka ijije tro epuni a tro kow, loi e troa eje fe hnine la tusi epuni la tusi hna saene hnene la Kometr Ne Cainöje Trootro Ngöne La Ekalesia.
8 Loi e Kökötre Lolo Hnyawa La Huliwa Së: Atreine troa pexeje hnyawa la huliwa së, e kökötre lolo la itre aqane cainöje trootro së. Hapeu, epuni kö a kuca asë la itre aqane troa tro fë la maca ka loi, tune la troa cainöje ngöne itre hnalapa trootro, me ngöne la nöjei ijin, memine fe la troa iwai hmaca, me troa nyiqaane inine la Tusi Hmitrötr? Maine epuni a etid memine la ketre atr, hane kö epuni thele troa maca hnyawa la aqane hamëne epuni la ini? Maine jë loi e troa pane wange hmaca la sinecetrone la Huliwa ne Baselaia ne Juun 1996, göi itre mekune nyine troa xatuane la itre hnainine matre tro angatre a hane sa xepu, me xome la bapataiso.
9 Hetrenyi hnine la itus, Organisés pour bien remplir notre ministère mekene 9, la itre xaa mekune ka lolo catre nyine xatua së troa akökötrene me aloine la aqane tro së a xome la huliwa ne cainöje trootro. Eje hi laka, easë asë hi a ajane troa kuca la hne së hna atreine ngöne la huliwa i Akötresie. Hapeu matre pane mekune hnyawa fe hnei epuni la itre hnei epuni hna ajane troa kuca ngöne la götrane la ua? Trongëne jë la itre mekune ngöne 1 Timoteo 4:15 kola hape: “Mekune ju eö la nöjei ewekë celë; majemine jë eö kow’it’ej; mate mama pi la tropane la huliwa i’ö kowe la nöjei ate asë.”