Atrune Pi La Trenga Mo Thatraqane La Huliwa Ne Baselaia
1 Hnei Iesu hna aceitunëne la mejiune kowe la Baselaia me trenga mo ka sisitria. (Mat. 13:44-46) Hapeu, ceitune fe kö la thina së memine la aqane ujë ne la itre trahmanyi ngöne la hna aceitune hnei Iesu, lo angetre salemëne la nöjei ewekë i angatre matre troa itöne la ketre ewekë ka sisitria? Maine eje lai, ke, kola hape nyine troa kuca panëne la Baselaia i Akötresie, ngacama nyimu ejolen, nge tro fe së a sipu xele së kö.—Mat. 6:19-22.
2 Qa ngöne laka, trengamo ka tru la huliwa ne Baselaia, hawe, loi e troa hetre aja së troa atrun’ej. Nemene la hna amamane hnene la aqane nyenyape së kowe la hnaisasaqe, ene la mel? Hapeu, atrune kö së la huliwa së thatraqane la Baselaia? Ijije koi së troa eatrën, e hne së hna amamane lai, ngöne la nöjei götrane la huliwa ne cainöje trootro, ene la troa cainöje ngöne itre hnalapa trootro, maine troa kuca la itre iwaihmaca, maine pena troa inine la Tusi Hmitrötre kowe la itre atr, memine fe la troa cainöje e nöjei ijin.
3 ‘Nemene La Aqane Tro Ni a Atrune La Götrane Qang?’ Ngöne la kola xejë la macatre ne huliwa ka hnyipixe, ke, loi e tro la isa alacasi a wange hmaca lo isa hne së hna huliwa matre ijiji së troa mekune la nyine troa kuca göi troa aelëne la itre traemene tro së a cainöje trootro, nge isa hnyinge ju fe së ka hape: ‘Ijijinge kö troa hnëkë hnyawa matre hane xome la huliwa ne pionie ka ixatua e itre xaa treu, maine nöjei treu pena? E atreine ni troa thele jëne ngöne la aqane meleng, nemene la ka ajolë ni troa hane lö hnine la itre ka xomi pionie lapa?’ Tro la itre ka nyipi xome la huliwa ne pionie e 1 Semitrepa a hane sine la Ini thatraqane la itre pionie la macatre ka troa xulu.
4 Hnene la itre xaa ka cainöje trootro hna axeciëne e kuhu hni angatre troa aelëne la aqane tro angatr’a troa cainöje e nöjei ijin. Nyipici laka, huliwa lai ka hamë wene ka loi. Itre xan’a ajane troa maca ngöne la aqane troa iwaihmaca, maine pena troa nyiqaane inine la Tusi Hmitrötre kowe la itre xaa atr.
5 E atrehmekune hi së laka hna xomehnöthe la aqane huliwa së, hawe, nemene la nyine tro së a kuca matre troa atrun’ej? Hnene la itre ka eatrëne hë la itre mekune ka tru celë hna qaja ka hape troa pane eje e kuhu hni së la itre huliwa ne la Baselaia, ngacama tru la itre jol. (Mat. 6:33) Nyipiewekë la troa lapaun’atrun, me hetre mejiune ka pexeje koi Iehova. (2 Kor. 4:7) Loi mina fe tro së a thele ixatua, ene la troa sipone ielene jëne la thith. (Luka 11:8, 9) Tha tro kö së a luelue, ke, tro Iehova lai a amanathithine la itre hne së hna catre göi troa atrune la aqane tro së a cainöje trootro ngöne la huliwa i nyidrë.—1 Ioane 5:14.
6 Ithahnata jë memine la itre trejine ka atreine hë huliwaan’atrune la hnëqa ne cainöje trootro. Hnyingë angatre jë ka hape nemene la aqane kuca i angatre matre tha traqa kö koi angatre la nanazije thupene la hna cile kowe la itre itupath? Maine jë tro la hna melëne hnei angatr’a hamëne koi së la ixatua ka ijij, matre eje fe e kuhu hni së laka ame la troa atrune la aqane tro së a cainöje trootro, tha ketre ewekë kö hne së hna thatrein.
7 Ngöne la epuni a e la itre hna cinyihane e hnine La Tour de Garde, maine e hnine la Huliwa ne Baselaia ka qaja la huliwa ne cainöje trootro, ke, loi e troa wang, jëne la thith, la aqane troa trongëne la itre mekune cili. Kuca tune ju fe, ngöne la epuni a sine la itre icasikeu ne la ekalesia, maine itre asabele pena. Ame la itre mekune hna qaja celë, ke, hna eköthe hune lo cainöje hna kuca ngöne lo asabele ne sirkoskripsio, lo macatre hnapan. Kolo pane mekune qa ngöne lo itre taane mekune hna hnëkëne nyine amamane la aqane tro së a trongëne la itre ini hna hamëne jëne lai asabele.
8 Hnei Iesu hna nyipiewekëne la huliwa ne cainöje trootro, ketre huliwa ka sisitria ngöne la mele i nyidrë hune la nöjei ewekë. Hnei nyidrëti hna qaja ka hape: “Ange la tro ni a kuca la ajane la ate upi ni.” (Ioane 4:34) Hapeu, tune fe kö la mekune së? Maine ejehi, ke, gojenyine tro së hi lai a atrune la itre hnëqa së, me troa ce thawa me itre xane “la nöjei ewekë ka loi” hna xome qa hnine la trengamo së.—Mat. 12:35; Luka 6:45.