Aja i Nyipunieti Kö Troa Catr Huliwa Pala Hi?
1 Hnei Iesu hna xom la Baselaia ceitun me ketre trenga mo ka tru alameken. (Mat. 13:44-46) Ame la troa tro fë la maca ka loi, tre, celë fe ketre trenga mo lai ka sisitria. Nyipi ewekë troa amë panën ngöne la mele së la huliwa ne cainöj, ngacama kola thele the së la ketre trenge catre ka tru troa hujën la mele së. (Mat. 6:19-21) Hapeu, aja i nyipunieti kö troa catr huliwa pala hi ngöne la huliwa ne la Baselaia?
2 Hanawang La Itre Trepen Ka Sisitria: Nyimutre la itre ewekë nyine troa kuca matre troa akökötren la aqan cainöjën së la maca ka loi: (1) ene la troa catr troa amë panën pala hi la itre aja ne la Baselaia ngöne la mele së (Mat. 6:33); (2) troa lapaun me mejiun koi Iehova (2 Kor. 4:1, 7); (3) troa catr sipon cememin la hni ka menyik jëne la thith, la ixatua i Akötresie (Luka 11:8-10); (4) troa trongën thenge la itre hne së hna sipon ngöne la itre thithi së—Iako. 2:14, 17.
3 Itre Aqan Troa Akökötren La Aqan Tro Sa Cainöj: Ijij tro së asë a thel troa xom pala hi la itre xaa ijin troa cainöj ngöne la treu. Ngo hne së kö hna hane thel troa xom la nöjei ijin ka ijij troa cainöj ngöne la nöjei ijin, me troa aloin hnyawa la itre aqane tro sa nyiqaan ithahnata, me troa kuca matre troa hetre thangan hnyawa la itre iwai hmaca, me catr troa xomiujin me xatuan la itre atr ka ini tus? Hapeu, ijije kö tro nyipunie a hane pionie ka ixatua maine pionie lapaa, maine troa tro troa cainöj ngöne la ketre götran gaa aja ka cainöj? Maine ketre trejin trahmany nyipunie, hapeu, ijije kö tro nyipunie a catr huliwa matre troa eatrën la itre hna amekötin göi itre ka troa cilën la hnëqa ne la drikona maine qatre thup pena? (1 Tim. 3:1, 10) Tune kaa, ijij kö tro nyipunie a hane akökötren la huliwa ne cainöje i nyipunie, hnene la troa sipo troa kuca la ketre huliwa e hnin la Bethela, maine troa sin la Ini Thatraqan la itre ka Drikona, maine troa sin la Ini hna amekötin kowe la itre Mesinare e Gileada?—Luka 10:2.
4 Hna pane ithuecatr troa pionie lapaa kowe la ketre trejin, ka huliwa ngöne la drai ka pexej koi maseta, nge ka tru la hna kuca la itre elo. Hnei angeic hna pane pionie ka ixatua me thel troa ahmaloeën la aqane mele i angeic matre troa pionie ngöne la drai ka pexej. Ame hë thupen, hnei angeic hna sin la Ini thatraqan la itre ka Drikona, a kolo fe a troa hnëkë angeic troa xome la hnëqa ka hnyipixe, ene la troa ketre atre thupën la sirkoskripsio. Atraqatr la madrine i angeice laka, hnei angeic hna kapa la ithuecatr, nge angeic a mejiun laka, tro pala kö a nyimu manathith hnei angeic hna troa kapa qa ngöne laka, angeic a mekun troa catr huliwa pala hi ngöne huliwa ne la Baselaia.
5 Iehova a amanathithin la itre ka nue la mele i angatr kowe la huliwa i Nyidrë. (Is. 6:8) Thaa tro pi kö së a nue la ketre ewekë troa sewe së troa akökötren la aqane tro së a cainöj, me kapa la itre thangan ka loi qa ngön, ene la madrin ka tru, memin la keukawa thatraqan la mele së.