Tha Hnei Angatre Kö Hna Cile Troa Anyipicin
1 Kola wai hatrenyi së, ka hape itretre anyipici Iehova së hnene la huliwa së. Easë a anyipicine la itre thina ka loi ne la Akötresie së, ene Iehova. (Isa. 43:10, 12) Hawe, tro la isa alacasi qa thene la nöjei ka ajane troa hane löhnine la ekalesia a hane anyipicin. Tro hi a pane anyipicine jëne la huliwa ne cainöje trootro, ene la hna troa kuca ngöne itre hnalapa trootro, me e cahu gojeny, ngöne la itre hna iwaihmaca, memine fe la troa inine la Tusi Hmitrötre kowe la itre atr. Hawe, tro së asë a isa catre troa cainöj.—1 Kor. 15:58.
2 Ame itre xaa atrene la ekalesia, ke, hna tuluthe hi la hnei angatre hna atreine kuca. Itre ka tru mecin, maine itre sinatr, matre hna xom’aconyi angatr. Itre iajolë ka tru fe a xulu qa thene la itre atrene la fami ka thele icilekeu. Hna ajolëne la itre thöthi hnene la itre keme ka tha hmi kö. Ame itre ka lapa mine nöje ga pë loto, kösë kola ajolë angatre matre tha ijiji angatre kö troa hane cainöje trootro. Hna jilapa thene la itre atr ka meije catr la xou, me luelu. Hawe, ame la itre ka cainöje trootro ka tune la itre hna qaja celë, ke, hna mekune ka hape tha ihmeku kö la hnei angatre hna atreine memine la keresiano, pine laka simana la itre huliwa i angatre hui itre xan, nge tha eatrëne kö la hnei angatre hna ajane troa traqa kow. Pëkö kepine matre tro angatr’a wangacone la itre trenge catre hnei angatre hna kuca. (Gal. 6:4) Troa tingetinge la hni angatr, e tro angatr’a atre laka ka tru la madrine i Iehova kowe la itre hnei angatre hna hamëne ka sisitria thenge la isa pengöne mel.—Luka 21:1-4.
3 Thelejëne Jë Troa Cainöj: Itre thauzane lao atr ka mele hnine la cainöje trootro a amamane la aqane tro la itre atr a neëne matre tha tro kö la itre ka iajolë a thingijë i angatre troa anyipicin. Hnene la itre trejine hna isa hetre sipu mekune me thele la nöjei pengöne aqane troa cainöje e cahu gojeny. Ame la itre ka lapa hnalapa, ke, hnei angatre hna hëne la itre atr jëne telefon, ketre qëhnelö lai hna thawa atrun, matre hane cainöje koi angatr. Hnei angatre hna xomeceitune la itre atr ka traqa troa wai angatre me itre atr ka troa hane drei angatr. Ngacama, jole catre kowe la ketre föe troa cainöje kowe la itre atrene la fami ka xele ma dreng, ame pe, ke, eahlo a thupëne la nöjei ijine ka ijije troa ithahnata memine la itre atr ka lapa ezi angatr, maine itre xaa atr hnei eahlo hna ixelë memin, ngöne la eahlo a kuca la itre huliwa i eahlo.
4 Maine jë hna wathebone la ketre thöthe hnene la keme me thine troa hane cainöje trootro. Loi pe tha tro kö a goeëne lai ceitu me ketre itupathi ka tru ka jole catre e troa cile kow, hapeu pe matre tha wange pe la itre ijine cili troa cainöje kowe la itre sine i angeic, maine kowe la itre monitör, matre sipu “götrane” ne cainöje i angeice ju hi lai, nge maine jëne tro fe hë lai a inine la Tusi Hmitrötre kowe la itre xan. Ame la itre ka lapa ngöne la itre götrane ka sihngödr, ke, hnei angatre hna cinyianyi kowe la itre sine i angatr, matre hane cainöje koi angatr. Ame la itre ka catre fë la aja ka tru ne la keresiano, ke, atreine palahi angatre thele la aqane troa neëne matre “tha ite hminyaje kö, me tha ite ka tha wa kö utihë la ate hmekune la Joxu shë Iesu Keriso.”—2 Pet. 1:8.
5 Ame ngöne la huliwa ne cainöje trootro, ke, Iehova a hamë së asë la aqane ujë ka ijij, ene la troa “kuca hnin”. (Kol. 3:23) Ngacama tha ka cile huti kö la etrune la hawa hne së hna huliwa, memine la hne së hna kuca, ame pe, tha saze kö la trepene la aja së—ene la ihnimi ka nyipici ka traqa qa ngöne la “hni ka pexej.” (1 A. L. Ite Jo. 28:9; 1 Kor. 16:14) Hawe, e hne së hna nuapexejenyi së, ke, tha tro kö a traqa koi së la itre mekune ka ngazo, tune la troa mekune ka hape pëkö lapaune së, maine pëkö thangane la hne së hna huliwa ngöne la ekalesia, pine laka co hi la hne së hna atreine hamën. Tune la tulu i Paulo, ijije tro së a qaja hnyawaane ka hape ‘tha hne së kö hna juetëne la kete ewekë ka nyipi, ngo hna amamane koi nyipunie me ini nyipunie qëmeke ne la nöj.’—Ite Huliwa 20:20.