Loi e Tro Palahi Së a Trongëne La Gojenyi Ka Meköt

¹ Tru la ihnimi Paulo kowe la ekalesia ne Filipi hnei nyidrëti hna inin. Nyidrëti a olene la ixatua hnei angatre hna hamën, nge hna qaja aloinyi angatr, kösë ketre nyine tulu ka loi.​—⁠2 Kor. 8:​1-6.

² Hna upi Paulo hnene la ihnimi nyidrëti ka tru troa cinyanyi kowe la itre trejine ne Filipi. Kola qaja ngöne la itus Auxiliaire, götrane 1176-7, ka hape: “Hnene la tusi nyidrëti hna ithuecatre kowe la angetre Filipi matre tha tro kö angatr’a nyenyape gufa; nyine tro pe a akökötrene thei angatre la wangatrehmekun, me adraiëne la trenge ewekë ne mele ka acatrene la lapaun, me mejiune kowe la itre hnei angatre hna troa kepe thangan.” Keukawa hnine la aqane kapa i angatr, matre kola acatrene la ihnimikeu i angatre memine la aposetolo. Loi e tro së a mekune hnyawaane la ithuecatre celë, pine laka, hetre sipu aliene la itre trenge ewekë i Paulo enehila, ene lo hna qaja ngöne Filipi 3:​15-17.

³ Nyipiewekë Catre Troa Macaje La Aqane Mekun: Ame ngöne Filipi 3:​15, ke, hnei Paulo hna cinyihan, tune la ketre atr ka tru hë lao macatren, ka qea ha la hna mel. Atre hnyawa nyidrëti la pengöne la itre trejine ne Filipi, laka angatr’a kökötre ngöne la ua, nge nyidrëti a ithahnata koi angatr, ceitu me itre keresiano ka macaj, nge ka meköti la aqane mekun. Loi e tro angatr’a hnea trepene la mekune i angatre ngöne la ipië memine la aja jëne Iesu, ke, matre tro palahi angatr’a “pë etha, me pë gelen, itre nekö i Akötesie, ka pë engazon . . . , kola adraiëne la tenge ewekë ne la mel.” (Fil. 2:​15, 16) Ame la easë a e la itre trenge ewekë i Paulo, easë a drenge laka kola ithahnata koi së. Hawe, easë a ajane catrëne troa ceitu la aqane mekune së me Iesu, me ipië, nge jëne la ipië, tro fe a kapa madrine la itre hnëqa së. Loi e tro palahi së a thithi koi Iehova, me sipo ixatua ngöne la götrane hne së hna ithahnataane celë, me ngöne la itre xaa aja së.​—⁠Fil. 4:​6, 7.

⁴ Tune la hna qaja ngöne Filipi 3:16, tro së asë a catre troa kökötre ngöne la ua. Ame la hna ithahnata “hne së hna traqa kow,” ke, kola hape “tro qëmeken, troa kökötre trootro.” Ame la itre atr ka kökötre trootro, ke, angatre palahi a “ajane la itre mekune ka hnyipixe, hetre ajane troa öhne la itre ini ka hnyipixe, maine ajane pena la itre ijine ka ijij.”[1] Hnei Paulo hna ajane kowe la itre trejine ne Filipi, tro angatr’a trotrohnine laka ame la hmi keresiano, ke, tha ka cile kö, ngo ka kökötre trootro palahi, nge tro fe a tro tune lai hnene la itre nyipi keresiano. Tro angatr’a amamane la aja i angatre troa ­kökötre ngöne la troa wai pengöi angatr, troa wangatrehmekune la itre ngazo i angatr, nge tro palahi a atrune trongën, me aloine la aqane huliwa i angatr. Kolo palahi a kökötre trootro la organizasio i Iehova e celë fen, nge kolo fe a kökötre la hlapa ne huliwa, memine la atrehmekune qa ngöne la Tusi Hmitrötr. Tro së isa alacasi a xome thatraqai së la itre xeni ne ua, matre ijiji së troa ce tro memine la organizasio, me ce huliwa memin’ej.

⁵ E Ajane Së Troa Kökötre, Ke, Loi e Tro Palahi Së a Trongëne La Gojenyi Ka Meköt: Hnei Paulo hna catre xatuane la itre trejine me nyidrë troa “tro palahi ngöne la ewekë cili.” (Fil. 3:16) Ame la hna troa ameköti së, ke, kola hape koi së, troa isa amë la itre atr me itre ewekë ngöne la itre sipu göhne i angatre kö, nge troa loi la aqane ujë. Hnene la itre keresiano ne Filipi hna isa la­paane hnyawaane la itre göhne i angatr, ene la angatr’a lapa catre ngöne la organizasio i Iehova, memine la itre trejin. Hna musinëne la mele i angatre hnene la hna amekötin, ene la ihnim. (Ioane 15:17; Fil. 2:​1, 2) Hnei Paulo hna uku angatre matre troa “ijije la thina i angatre memine la maca ka loi Keriso.” (Fil. 1:27) Ame la troa ameköti së, me troa loi la aqane ujë, ke, ka sisitria catre kowe la itre keresiano enehila.

⁶ E ajane së e troa meköti la aqane tro së, ke, loi e tro së a tro palahi ngöne la gojenyi ka cas. Kola hape koi së, casi palahi la itre ewekë hne së hna kuca. Troa hetre thangane ka loi qa ngöne la emekötine la aqane tro së, pine laka, tha pane mekune kö së la nyine tro së a kuca​—⁠hetre tulu hne së hna majemine xötrethengen.

⁷ Ame la gojenyi ka meköti qa thei Akötresie hne së hna trongën, ke, itre ewekë hna majemine kuca thatraqane la mele së, ka hetre thangane ka loi, nge thatraqai Akötresie​—⁠ame la sipu alien, ke, matre tro së a kökötre ngöne la ua, me xatua itre xane troa huliwa atrunyi koi Iehova. E ajane së troa aeatrëne la itre ewekë celë, ke, loi e troa trongëne palahi la gojenyi ka sisitria, ene la troa isa inine la Tusi Hmitrötr, me sine palahi la itre icasikeu, me tro palahi a cainöje trootro.

⁸ Itre Götrane Ka Nyipiewekë: Ame la ketre ewekë ka sisitria, ke, ene la “wangate hmekune me trotrohnin’asë.” (Fil. 1:⁠9) E tro së a isa inine la Tusi Hmitrötr, ke, kola acatrene la lapaune së, nge kolo fe a kökötre la aja së kowe la nyipici, me upi së troa kuca la itre huliwa ka loi. Ngo, hnei itre xane hna öhne laka jole koi angatre troa xötrethengene hnyawa la porogarame ne isa ini tusi angatr. Ame la kepin, ke, pëkö ijin.

⁹ Thatreine kö së qejepengöne la itre manathithi qa ngöne la hna e lapaane la Tusi Hmitrötre e nöjei drai. Ketre ini ka hetre “thangane ka loi” ngöne la nöjei götran. (2 Tim. 3:​16, 17) Nemene la aqane tro së a öhnyi ijine thatraqane la ini Tusi Hmitrötre ngöne la drai? Hnei itre xane hna amë la ijine cili e nöjei hmakanyi, ke, kola maca la mekun. Nge itre xan’a e qëmekene la troa meköl. Ame la itre föe ka lapa hnalapa, ke, loi e tro angatr’a ami ijine e itre hnaipajö, qëmekene la tro la itre xan’a bëeke qa hna huliwa maine qa hna ini. Hnei itre xane hna nyinyikön, hnene la troa e lo itus Prédicateurs e nöjei wiike ngöne la kola isa ini tus.

¹⁰ Ngöne la easë a xötrei trongëne la porogarame së, ke, ijije troa ajolen’eje hmaca hnene lo itre hna majemine kuca e cili lo. Maine jë, hne së hna majemine ekö troa pane nue la itre nyipi huliwa së troa kuca la itre xane ka tha nyipiewekë kö. Nyipici laka, jole koi së troa aca nuetrije jë hi. Tha tro kö a musinëne la aqane tro së a kuca la porogarame ne ini së hnei ketre atr; maine majane pena la itre hne së hna kuca ngöne la götrane cili. Qanyine kö la aja së kowe “la nöjei ewekë ka isa pengöne kö,” matre troa xötrethengene hnyawa la porogarame së, memine la aja së troa nyipiewekëne “la nöjei ijin” matre troa kepe thangane qa ngön.​—⁠Fil. 1:10; Efe. 5:⁠16.

¹¹ Ka nyipiewekë catre la itre icasikeu ne keresiano thatraqane la tro së a kökötre ngöne la ua, ke, kola ini së me thue ixatua. Ketre götrane ga sisitria ne la gojenyi ka meköti hne së hna trongën. Hnei Paulo hna amamane hnyawaane la enyipiewekën. Ketre ewekë lai, tha nyine tro kö a sixaan.​—⁠Heb. 10:​24, 25.

¹² Nemene la aqane tro së a amamane la aja së troa trongëne la gojenyi ka meköt, hnene la aqane hnëkëne së la porogarame ne huliwa ngöne la wiik? Hnene la itre xane hna thele ijine troa kuca la itre sipu huliwa i angatre kö ngöne lo itre ijine icasikeu, ame pe, tha ka loi kö lai, pine laka sisitria la itre icasikeu hune la nöjei ewekë. Troa nyipiewekëne la itre icasikeu ne la wiik, nge tro pë hë a kuca la itre xaa ewekë e itre ijine pë reinio.

¹³ Hnene la aqane hnëkëne hnyawa hne së la porogarame memine la aqane ixatuanekeune la itre jole ngöne la hnalapa matre ce ijiji së asë troa sine palahi la nöjei icasikeu asë ngöne la wiik. Ngöne la itre drai ne la wiik, ke, tru la itre jole së, celëhi matre kösë kola nyimenyimë së hnei traem. Kola hape, maine ijij, ke, loi e troa canga kuci xen, matre hetre ijine troa xen, me hnëkë, me canga traqa qëmekene la kola nyiqaane la icasikeu. Hawe, ijije tro la itre atrene la fami a ixatua ngöne la nöjei götran.

¹⁴ Nyipiewekë catre tro palahi a cainöje trootro, e ajane së troa lapa palahi ngöne la gojenyi ka meköt. Easë a wangatrehmekune la etrune la hnëqa së, ene la troa cainöjëne la maca ne la Baselaia. Celëhi matre kola qeje së ka hape itretre anyipici Iehova. (Isa. 43:10) Pine laka, ketre huliwa lai ka sisitria, nge ka hetre thangane ka loi, ngöne la hnedrai së enehila, hawe, tha tro kö së a wang’acone la götrane huliwa celë ngöne la porogarame së. Hnei Paulo hna hamëne la ithuecatr, kola hape: “Tro sha hamëne pala hi la huje ne atrunyi Akötesie jëne nyidë, celë hi wene la ite ukeineqe shë kola olene kowe la atesiwa i nyidë.”​—⁠Heb. 13:⁠15.

¹⁵ Ngöne la easë a hnëkëne la porogarame së kowe la wiik, ke, loi e troa ami ijine thatraqane la huliwa ne cainöje trootro. Nyimu ijine icasikeu ne cainöje trootro e nöjei wiike thatraqane la ekalesia, ngo qanyine kö la isa alacasi troa mekune la ijine ka ijije koi angeice matre tro palahi a hane sin. Ngo loi e troa huliwa ceitune ngöne la nöjei götran, tune la troa cainöje trootro ngöne itre hnalapa, me trofë zonale me itus, troa kuca la itre iwaihmaca, me inine la Tusi Hmitrötre kowe la itre atr. Loi fe tro së a troxome me easë la itre itusi göi troa cainöje e cahu gojeny, me thupëne la nöjei ijine ka ijije tro së a nyiqaane ithahnata. Pine laka, hne së hna majemine ce tro memine la itre trejin, ke, loi e tro së a atrepengöne la porogarame i angatre matre tro së a iöhnyine la ijine ka ijije troa ce cainöje trootro.

¹⁶ Loi e tro së a catre cainöje trootro, ngacama alanyimu la itre atr ka tha nyipiewekëne kö la maca ka loi ngöne la götrane së. Atre hnyawa hi së laka ala xalaithe hi la itre atr ka troa kapa. (Mat. 13:15; 24:⁠9) Hnei Iehova hna upi Ezekiela troa cainöje kowe la itre atr ka ‘ena, cate meke me xeti hni.’ Hnei Iehova hna thingehnaeane troa xatua Ezekiela matre “acatene la göpadi angeice hmekune la göpadi angat,” tune la “samira cate hune la aköhat.” (Ezek. 2:​3, 4; 3:​7-9) Loi e tro së a hetre xomihni matre tro palahi së a cainöj.

¹⁷ Itre Tulu Ka Loi Nyine Troa Xötrethengen: Troa elë la hne së hna cainöje hnene la tulu qa thei itre xan. Hnei Paulo me itre sine i nyidrë hna hamë tulu ka loi, me xatuane la itre xane troa nyitupu nyidrë. (Fil. 3:17) Nyidrëti a trongëne palahi la gojenyi ka meköt, me nyipiewekëne la nöjei götrane ka troa acatrene la lapaune i nyidrë.

¹⁸ Ame fe enehila, ke, tru catre la itre tulu nyine thue catre koi së. Ame ngöne Heberu 13:​7, hnei Paulo hna hamë ixatua, kola hape: “Mekuneju kowe la ite mekene i nyipunie . . . mekune ju la pune la thina i angat; nge nyi tupune ju la lapaune i angat.” Ejehi laka, Keriso la tulu së, ngo loi fe tro së a xötrethenge la lapaune ne la itre meken. Tui Paulo, tro la itre qatre thup’a trotrohnine hnyawane laka nyipiewekë catre tro angatr’a amamai tulu ka loi. Qa ngöne laka, isa pengöne la itre aqane mele së, loi e tro së isa alacasi a amamane la aja së troa trongëne palahi la gojenyi ka meköt, ene la troa amë panëne la itre huliwa ne la Baselaia. Ngacama, tru la itre huliwa qa ngöne la itre hnëqa, me ngöne la fami, ngo ame pe, ke, tro palahi a aeatrëne la porogarame hna hnëkën, ene la troa isa ini Tusi Hmitrötr, troa sine la nöjei icasikeu, me hamë tulu ngöne la huliwa ne cainöje trootro. E maine tro la itre qatre thup’a amamane laka angatr’a ‘musinëne aloine la lapa i angatr,’ ke, troa xatuane la nöjei atrene la ekalesia troa trongëne palahi la gojenyi ka meköt.​—⁠1 Tim. 3:​4, 5.

¹⁹ Itre Mekune Hna Axeciëne Thatraqane La Macatre Ne Huliwa Ka Hnyipixe: Ketre ijine ka ijije la kola nyiqaane la macatre ne huliwa ka hnyipixe göi troa mekune la aqane trongëne së la gojenyi ka meköt. Nemene la hna amamane hnene la huliwa së lo macatre ka ase hë? Hapeu, ijije kö tro së a aelëne la itre hne së hna huliwa, maine tro palahi a ceitune memine lo? Maine jë, jui la aqane isa inine së la Tusi Hmitrötr. Maine, hne së pena hna traqa lapa ngöne la nöjei icasikeu, maine pena hne së hna hane pionie ka ixatua matre kola elë la itre hawa, ke, tru la huliwa së. Maine pena, hetre itre ewekë ka loi hne së hna kuca kowe la itre xaa keresiano, matre loi la aqane ujë së kowe la itre xane e hnine la ekalesia, maine e hnine la fami. Maine ejehi, ke, tro së a madrine laka easë a trongëne la gojenyi ka amadrinë Akötresie, drei la nyipi kepine hne së hna “amanamanane pala hi.”​—⁠1 Thes. 4:⁠1.

²⁰ Hapeu, e tha trongëne hnyawaane kö së la porogarame së? Nemene la ka ajolë së ngöne la ua? Hapeu, hetre kepine kö ka acilë së troa kökötr? Troa nyiqaane hetre loi e hne së hna sipo ixatua koi Iehova. (Fil. 4:​6, 13) Qaja amamane jë la itre aja i epuni kowe la sine la fami, me sipo angatre troa hane ixatua matre ijiji epuni troa trongëne hnyawaane la porogarame i epun. E hetre jole hnei epuni hna öhn, ke, sipo ixatua jë kowe la itre qatre thup. E easë a catr, me trongëne la hnei Iehova hna amekötin, ke, tha luelue kö së laka “tha ite hminyaje kö, me tha ite ka tha wa kö” së.​—⁠2 Pet. 1:​5-8.

²¹ Ame la troa trongëne la gojenyi ka meköt, ke, kola thuejë së troa kapa la itre manathithi, nge ka tru catre la thangane e tro së a catr. Hawe, pine la ka xeci e kuhu hni epuni troa trongëne la gojenyi ka meköt, “the witi kö ngöne la huliwa; catejë la hni; nyi hluenejë la Joxu.” (Rom. 12:⁠11)​—⁠E maine epuni a ajane hmaca la itre xaa ithuemacanyi göne la taane celë, ke, goeëne jë la La Tour de Garde ne 1 Mei, macatre 1985, götrane 13-17.