Akökötrene Jë La Itre Hna Majemine Ka Loi, Menuëne Jë La Itre Manathithi Ka Tru
1. Pine nemen matre ka loi e troa pane wange hnyawa la itre hnei nyipunieti hna majemine kuca ngöne la ua?
1 Ame ngöne lo easa xötrei hane hmi, easa catre thele troa kuca la itre huliwa i Akötresie, tune la troa inine la Tusi Hmitrötr, me itre icasikeu ne la Keresiano, me cainöje trootro, me thith. Ame hë la thangane la hna amanathithine la huliwa së hnei Iehova, tre, kola kökötre hnyawa la aqane imelekeu së me Iehova. Maine jë nango nyimu macatre hë thupene lo hne së hna xome la bapataiso. Hapeu, easë pala hi a xome lo itre hne së hna majemine kuca ka loi tune ekö lo easa xötrei hane hmi?
2. Tro sa kepe thangane tune kaa la hna e o drai la Tusi Hmitrötr?
2 Loi e Troa Wange Hnyawa La Itre Hna Majemine Kuca: Hapeu, ewekë hne së hna majemine la troa e la ketre götrane ne la Wesi Ula i Akötresie ngöne la nöjei drai? Drei la itre manathithi hne së hna kapa qa ngön! (Ios. 1:8; Sal. 1:2, 3) Ame ekö e Isaraela, tro la nöjei joxu a e “ngöne la nöjei drai ne mele i [angat]” la Trenge Wathebo hna fejan. Nemene la itre thangane lai? Troa hetre hni ne ipië la joxu me inine troa xoue Iehova, ene pe thaa tro kö angeic a hutrö kowe la itre hna amekötine hnei Nyidrë. (Deu. 17:18-20) Ketre tune fe enehila, laka, maine tro sa e pala hi la Tusi Hmitrötr, haawe, tro ha xatua së matre thaa tro kö a qeje gele së nge tro sa hni ka menyik e nyipine la fene ka ngazo celë, nge ka iajojezi. Kolo mina fe a xatua së troa atreine tro fë hnyawa la maca ka loi.—Fil. 2:15; 2 Tim. 3:17.
3. Nemene la itre manathith hne së hna kapa qa ngöne la hne së hna sine pala hi la itre icasikeu?
3 Hnei Iesu hna majemine troa tro kowe la sunago, ke e cili la hna ithanatane la itre xötr ne la Tusi Hmitrötr. (Luka 4:16) Celë hi ewekë lai ka xatua nyidrëti troa cile kowe la itre akötr ka troa traqa koi nyidrë. Kola acatrene mina fe la lapaune së hnene la itre ini ne la ua hna hamëne jëne la itre icasikeu ne la ekalesia, memine fe la aqane “ithuecatrekeu” la itre ka sine itre ej. (Rom. 1:12) Maine tro pala hi sa ce memine la itre trejine me easë, tro ha xatua së troa xomihnine la itre ejolene la itre drai hnapin. (Heb. 10:24, 25) Celë jë pala kö ketre hne së lai hna majemine kuca, la troa hane sine pala hi la nöjei icasikeu asë?
4. Tro sa kepe thangane tune kaa la hna cainöje trootro ngöne la nöjei wiik?
4 Kola qaja koi së hnei Tusi Hmitrötr laka, hnene la itre aposetolo hna tro fë la maca loi “o drai ngöne la ēnē me nöjei hnalapa.” (Ite hu. 5:42) Maine thaa ijije kö koi së troa hane cainöje ngöne la nöjei drai, ijije kö tro sa majemine troa xome pena la itre xaa aqane troa cainöj ngöne la nöjei wiik? Maine tro sa kuca tune lai, tro hë së a atreine xome me tro fë hnyawa la Wesi Ula i Akötresie, nge troa hetre itre ewekë hne së hna melën nyine ithuecatre koi së, itre thangane ka loi qa ngöne la hne së hna ce thawa la nyipici ne la Tusi Hmitrötr memine la itre xaa atr.
5. Pine nemen matre nyipi ewekë catr troa thithi pala hi koi Iehova?
5 Hna amanathithi Daniela perofeta hnyawa qa ngöne la hnei nyidrë hna nyihlue i Iehova “o drai” ngöne la mele i nyidrë ka pexej. Kolo lai a qaja la hna majemine kuca hnei Daniela, ene la troa catre thithi pala hi koi Iehova. (Dan. 6:10, 16, 20) Ketre tune mina fe laka, maine tro sa thithi hnyawa pala hi koi Iehova, tro hë Nyidrëti a amanathithi së jëne la uati hmitrötre i Nyidrë. (Luka 11:9-13) Ketre, tro Iehova a drei së me easenyi së, me aijijë së troa acatrene hnyawa la aqane imelekeu së me Nyidrë. (Sal. 25:14; Iako. 4:8) Drei la ketre manathithi ka tru! Qa ngöne lai, epi tro sa catre huliwa hnyawa matre troa xome pala hi la itre hna majemine kuca ngöne la götrane la ua, me hane kapa la itre manathith qaathei Iehova.