Tro Kö Së a Hane Kepe Thangane Ka Loi?
1 Nyimutre la itre atr enehila, ka ajane troa atre la aqane troa cile kowe la itre jol me thele troa hetre mele ka loi. Canga saqe angatre troa xome la itre itus, me thele la itre gurupe me itre organizasio ka hamë ixatua ngöne la aqane troa hetrenyi la mele ka loi. Maine jë tro itre xane a qaja la itre hnepe thangane ka loi hnei angatre hna kapa. Maine tro sa goeëne la pengöne la mele ne la nöjei atr enehila, hapeu, tingetinge kö, nge hetre madrine i angatre kö qa ngöne la itre ini hnei angatre hna kapa qaathei atr? Ohe, thatreine kö tro sa jele nyipicine lai.—1 Kor. 3:18-20.
2 Ame ngöne la ketre götran, kola hamëne gufane koi së hnene la Atre xupi së la ini ka sisitria nyine ixatua, kowe la nöjei atr asë ka troa drei Nyidrë. Aja i Nyidrë tro së isa ala caasi a kepe thangane ka loi, qa ngöne la ini Nyidrë. Hnei Nyidrëti hna hamëne gufane la Wesi Ula i Nyidrë, matre troa eatrongëne la itre atr ngöne la gojenyi ka meköt, nge hnei nyidrëti hna aijijëne la maca ka loi ne la Baselaia troa haöthe la fene hnengödrai asë. (Sal. 19:7, 8; Mat. 24:14; 2 Tim. 3:16) Haawe, troa mele madrine la atr, e hnei angeice hna wangatrune hnyawa la itre trenge wathebo i Iehova.—Is. 48:17, 18.
3 Sisitria catre kö la itre eamo hna hamëne hnei Iehova, hune la itre itus, maine hune la itre aqane waiewekë nyine thele mele ka loi hna hamëne hnene la fen. Eje hi laka, maine tro së a thele troa trongëne asë la itre hna amekötine hnei Iehova hnine la Wesi Ula i Nyidrë, nge hna ini së hnene la organizasio i Nyidrë, haawe, tro ha hetre ixatua ka lolo koi së, nge itre manathithi ka hut hne së hna troa kapa.—1 Pet. 3:10-12.
4 Itre Manathithi Qa Hnine La Itre Icasikeu Ne La Ekalesia: Enehila, Iehova a wangatrunyi së qa ngöne laka, Nyidrëti a ini së la itre jë i Nyidrë, nge easë a kepe thangane ka loi la itre ini qaathei Nyidrë. Kola mama la ihnimi nyidrë, jëne lo faifi lao icasikeu së ngöne la wiik. Kola kökötre la atrehmekune i Nyidrë the së, ngöne la easë a sine la itre icasikeu cili. Easë a inine la aqane troa hmekëne la itre ewekë ka ngazo qa ngöne laka easë a thele troa qale koi Iehova. Ene pe pëkö jëne troa qeje engazone la aqane ujë së.
5 Hetre ketre ewekë fe nyine troa kuca. Jëne la itre icasikeu, ijiji së fe troa hane “atrun.” (2 Kor. 6:13) Kolo lai a qaja ka hape troa thele jëne troa atre hnyawa la itre xaa trejine ngöne la ekalesia. Tune la hnei Paulo aposetolo hna cinyihane koi angetre Roma, tro hë së a ithuecatrekeu. (Rom. 1:11, 12) Ngöne la nyidrëti a cinyanyi koi angetre Heberu, hnei nyidrëti hna hajine lo angetre majemine trije la icasikeu i ange Keresiano.—Heb. 10:24, 25.
6 Atraqatre mina fe la madrine së, e hne së hna hane sikusikune la mele ne la itre xan. Hetre nyipi aja së troa thele la nöjei aqane tro la itre xane a hane kapa la nyipi manathith. Qa ngöne lai, nyine loi koi së isa ala caas me angetre lapa easenyi së la itre icasikeu. Ame la hna thele the së, ke ene la tro sa amamane hnene la hni ka pexej, la ajane troa ce huliwa me Iehova.
7 Hnei Paulo hna haji Timoteo tune lai, ngöne la nyidrë a cinyanyi ka hape: “Loi e majemin’ eö troa tune la thina i Akötesie.” (1 Tim. 4:7) Isa hnyinge jë së ka hape: ‘Eni kö a hane majemine troa melëne la ini hnenge hna kapa? Eni kö a thele troa kepe thangane la itre hnenge hna drenge ngöne la itre icasikeu?’ Troa eje la mekune së, e hne së hna wangatrune la itre hne së hna drenge ngöne la itre icasikeu, me thele troa trongëne la hne së hna inin. Nyipi ewekë tro sa atreine goeëne la itre trejine ka hamëne la itre ini, cememine la itre lue meke ne lapaun, matre tro sa atrehmekunyi Iehova hnyawa, Nyidrë lo Atre Ini ka Sisitria, ka inine la itre atr.—Is. 30:20.
8 Ini Ne Cainöje Trootro Qaathei Akötresie Me Icasikeu Ne La Huliwa: Lue icasikeu la ka xatua së troa maca troa cainöj. Tune la Ini Ne Cainöje Trootro Qaathei Akötresie laka—ketre ini, itre hnainine a troa kapa la itre ini me itre ihaji qa ngön. Jëne tro hi së lai a kökötre trootro matre atreine së troa cile fë cainöj, me maca troa inine la Wesi Ula kowe la itre xan. Ngo maine easë a ajane troa kepe thangane la ini cili, haawe, loi e tro së a hane hamëne la ëje së ngöne la hna ini cili, me sine ej, me kuca pala hi la itre xötreqa, me hnine hnyawa itre ej. Tro hë së a maca trootro ngöne la aqane hamë cainöj, e hne së hna kapa, me trongëne la itre ihaji hna hamëne hnine la ini cili.
9 Kola ini së hnene la Icasikeu Ne La Huliwa, la enyipi ewekëne la huliwa ne cainöje ne la Keresiano, me amamane la aqane tro së a inine la itre atr ngöne la hna cainöj. Hapeu, easë kö me hnepe lapa së a hane kepe thangane hnyawa la lue icasikeu cili? Hna qaja hnene la lue trefëne keresiano ka hape: “Ame ngöne la ketre ijine Icasikeu Ne La Huliwa, hna qaja ka hape, nyipi ewekë troa goeëne la topike ne la drai hnene la hnepe lapa. Thaa ewekë kö hnei nyiho hna lapaa kuca, ngo enehila nyiho hë a hane kuca tune lai.” Nemene hë la thangane koi nyidro? Öni nyidroti ka hape: “Nyipi lolo hë la itre porotrike i nyiho ngöne la nyiho a xen. Pë hë iwesitrë ngöne la nyiho a xeni hej.” Hapeue fe itre nekönatre ka co, angatre kö a hane kepe thangane la itre icasikeu? Eje hi. Önine fe la thine ka hape: “Hetre thangane catre la itre icasikeu kowe la itre nekö i nyiho. Ame ngöne la ketre ijin, hnei nyiho hna ea la nekö i nyiho, a kola qeje trenga thoi. Ngo ame ngöne lai wiike cili, hna cile fë la ketre cainöje ka qeje pengöne la qeje trenga thoi. Kola hmahma la nekö i nyiho, ame hnei nyëne hna goeë keme i nyën, me canga lapa ngöne icea i nyën. Ketre atre hë angeice la nyine troa kuca, qaane ju hi lai, thaa thoi hmaca kö angeice koi nyiho.”
10 Kola madrine fe hnene la ketre trejine föe ka pionie, qa ngöne laka, hetrenyi la itre mekune nyine ixatua göi cainöj, a hna hamëne jëne la Icasikeu Ne La Huliwa. Pine nemen? Öni angeice ka hape: “Eni pala pë hë a kuca xanëne la huliwa ne cainöj. Ame ngöne la itre xaa ijin, eni a mekune ka hape, thaa tro jë kö a hetre thangane ka loi la itre ixatua hna hamëne hnine la Huliwa Ne Baselaia. Ngo ame la eni a drenge hnine la icasikeu ka hape, loi e troa tupathe itre ej, ene pe kola traqa la pi ajanenge troa trongëne lai itre mekune cili. Celë hi matre madrine ni troa xome la huliwa ne cainöj!” Thupene la itre wiike ka nyimutre ne trongëne angeice la itre mekune nyine ixatua, matre troa nyiqaane etid memine la itre atr ngöne la kola xötrei iöhny, ene pe hna xejë jë la etid memine la ketre jajinyi ka sipo ixatua ngöne la thith.
11 Maine easë a drenge la ketre cainöj, nge kola hamëne la itre eamo ngöne la isa aqane tro së a ië ewekë, hapeu, easë kö a qatixenyëne hnyawa me drenge atre laka, Iehova hi lai a ithahnata koi së? Celë hi hna mekune hnene la ketre trejin. Hnei angeice hna qaja ka hape: “Hna cile fë e cili lo ngöne la ketre icasikeu la ketre cainöj, kola ithahnatane la itre elo ka loi kowe la itre keresiano, me itre elo ka ngazo. Ka majemine ni goeë ijei ngöne televizio. Ngo thupene hë la icasikeu cili, eni a mekune e kuhu hninge laka, ka ngazo la elo cili kowe la itre Keresiano. Haawe, thaa hane hmaca kö ni wai ijei.” Eje hi, ngacama hna ajane pala hi hnene la trejine troa wai isi, ngo hnei angeice hna pane ipië, me kapa la itre mekuana i Iehova.—Sal. 11:5.
12 Cainöj Kowe La Ka Ala Nyim, Ini La Tour de Garde, Me Ini Tus Ne La Ekalesia: Easë a drenge ngöne la nöjei wiike la itre cainöje kowe la ka ala nyim, kola ithahnatane la itre topike ka nyimutre qa hnine la Tusi Hmitrötr. Nemene la hne së hna kapa qa ngöne la itre cainöje cili? Hna qaja hnene la ketre keresiano trahmanyi la itre manathithi hnei nyidrë hna kapa: “Hna ithahnatane la itre wene ne la ua ngöne la ketre cainöje koi nöjei atr. Hna qaja hnene la ka cile fë la cainöje la hnei nyidrë hna kuca matre troa eëne la itre wene ne la ua cili; hnei nyidrëti hna iëne la ketre thiina ka loi, me melëne ngöne la wiik. Ame hë ngöne la pune la wiik, hnei nyidrëti hna mekune hmaca la aqane eëne nyidrë lai thiina cili, ngöne la nöjei huliwa hnei nyidrëti hna kuca. Thupene lai, hnei nyidrëti hmaca hna melëne le ketre thiina wene la ua ngöne la ketre wiik. Öni nyidrë, lolo catre la aqane kuca celë, nge hnenge hna pane nyiqaane qaatheng.” Drei la eloine la troa trongëne la itre hna inin!
13 Kola ini së hnene la ini La Tour de Garde troa trongëne la itre trepene meköti ne la Tusi Hmitrötr, ngöne la nöjei götrane la mele së. Kola xatua së matre thaa tro kö a gomegome la itre mekuna së memine la itre hni së, hnene la itre ejolene la mel. Kola xatua së fe troa ahnyipixene la aqane trotrohnine la ketre mekune qa hnine la nyipici. Tune lo inamacane hne së hna kapa jëne la itre ini ne La Tour de Garde ne 1 Mei 1999, hna hape: “Tro kö a traqa la itre ewekë cili,” “Loi e troa atreine waiewekë la atre e,” “Loi e hmeke së me catre huliwa hnyawa!” Hetre thangane kö koi së la itre ini cili? Easë kö a amamane hnene la itre huliwa së ka hape, easë a wangatrune la aqane hmekë së hnei Iesu göne la itre drai elany? Easë kö a canga hane hnëkë kowe la itre itupathi elany, e öhne jë së la “ewekë ka sis, ate angazon, kola cile ngöne la ga hmitöt?” (Mat. 24:15-22) Kolo kö a mama ngöne la itre aja së memine la itre aqane mele së, laka, thaa easë kö a thele troa hetrenyi la itre mo ne ngönetrei, ngo kolo pe a ahmitrötrëne la ëje i Iehova, ewekë ka sisitria koi së? Hapeue enehila, easë kö a inine troa isa kepe thangane qa ngöne la ini ne La Tour de Garde?
14 Mekune ju la itre ini ka nyimutre hne së hna kapa ngöne la Ini Tus ne la ekalesia e nöjei wiik. Enehila, easë a inine lo itus Prophétie de Daniel. Tune kaa lo foa lao treu ne inine hë së la tusi Daniela, hna akökötrene kö la lapaune së ngöne la nöjei wiik? Tui Daniela perofeta hnimina i Iehova, easë mina fe a hane acatrene la lapaune së matre ijije tro fe së a hane cile catre ngöne la nyipici.
15 Iehova a Ini Së Troa Mele Madrin: Easë a neëne la itre akötre ka tru, e hne së hna wangatrune la itre trenge wathebo i Akötresie. Ketre, easë a melëne la ketre aqane mele ka hamë madrine koi së. Maine tro së a nue Iehova troa eatrongë së, haawe, thaa tro kö së a itre ka goe hmekuj, ngo tro fe hë së a hane xome la huliwa i Nyidrë. Nge itre atr ka madrine la itre ka kuca la huliwa i Akötresie.—1 Kor. 3:9; Iako. 1:25.
16 Loi e tro sa mekune hnyawa, la aqane tro sa trongëne la itre hne së hna drenge hnine la itre icasikeu ne la ekalesia. (Ioane 13:17) Nyihlue i Akötresieti jë së, hnene la hni ka pexej. Tro hë a elitrauje la madrine së. Tro hë a nyipi ewekë me tiqa hnei lolo la mele së. Nyipici, tro hë së a kapa la itre manathithi ka nyimutre.