Ijije Kö Tro Epuni a Akökötrene La Huliwa Ne Cainöje i Epun?
1. Nemene la ewekë ka sisitria nyine troa kuca ngöne la huliwa ne cainöj, nge pine nemen?
1 Ame ngöne la Iesu a öhne la aja ka eje thene la ka ala nyimu kowe la maca ka loi ne la Baselaia, tre, nyidrëti a ulatine ju kowe la itretre drei nyidrë troa “xëwe kowe la Joxu ne la meledrai, mate upepi la angete troa menue kowe la meledrai i anganyidë.” (Mat. 9:37, 38) Sisitria pala kö la nyine troa kuca enehila hun ekö, ke, easa melëne la itre hawa tixenuë ne la ijine meledrai. Kolo lai a hape, loi e tro sa wange hnyawa me thithi fë la aqane troa akökötrene la huliwa ne cainöje së.—Ioane 14:13, 14.
2. Tune kaa la aqane kapa hnei itre xan la ihë göi troa akökötrene la huliwa ne cainöj?
2 Aqane Akökötrene La Huliwa Ne Cainöj: Ala nyimu hë la ka hane xome la huliwa ne pionie hnene la ixatua qaathei Iehova. (Sal. 26:2, 3; Fil. 4:6) Ame itre xan, angatr a xome la caa treu ne pionie ka ixatua, maine anyimua xome pena ngöne la macatre. Ketre jëne tro lai a akökötrene la huliwa ne cainöje i angatr. Hnene laka atraqatre la madrine i angatre qa ngöne la hna xome la huliwa cili, ene pe mekune jë fe angatre troa hane pionie lapaa.—Ite Hu. 20:35.
3. Maine hnei epuni hë hna hane pionie, nemene la nyine tro epuni a wanga atrun enehila?
3 Ijije Kö Tro Epuni a Xome Hmaca La Huliwa Ne Pionie?: Maine hnei epuni hë hna hane pionie, epuni jë a mekune madrine la ijine cili. Hane fe kö epuni mekune me sipone ngöne la thithi matre troa xome hmaca la huliwa ne pionie? Maine jë paatre hë lo itre ewekë ka ajolë epuni troa pionie, ene pe ijije hmaca ha koi epuni troa xome la hnëqa cili ka lolo.—1 Ioane 5:14, 15.
4. Nemene la huliwa ka ketre pengöne hna aijijë së asë troa kuca?
4 Easenyi catre hë matre fenesi pi la huliwa ne menue. (Ioane 4:35, 36) Epi tro sa wange hnyawa la aqane mele së me atrehmekune fe la itre ewekë nyine troa nango sazen, matre tro sa akökötrene la huliwa ne cainöje së. Maine thaa ijiji së kö troa akökötrene la huliwa ne cainöje së, ijije kö tro sa thele jëne troa hetre thangane la hne së hna cainöj? (Mar. 12:41-44) Drei la ketre manathithi ka tru kowe la itre ka saze la aqane mele i angatre enehila troa hane catre xome la huliwa ne menue!—Sal. 110:3.