Hapeue Nyipunie Itre Hlue i Iehova, Ijije Kö Tro Epuni a Hane Pionie?
1 Ame lo ijine kola icasikeu ne distrik: “Itretre trofë la lai i Akötresie.” Hna hnyingëne ka hape: “Ijije kö tro epuni a hane pionie? Tro kö epuni elanyi a pionie?”. Itre hnyinge lai nyine tro së a mekune me wang’ atrun, pine laka easenyi catre hë amagedo, celë hi matre nyipi ewekë tro së a catre trofë la maca ka loi, ke xoxopatre la ijin. — 1 Kor. 7:29a.
2 Ame la huliwa ne pionie, ke tha ka hmaloi kö. Ngo ejehi laka, loie tro së a hane inine troa hetrenyi la ca porogarame ka loi nyine xötrethenge. Kete matre “tha gufa kö” la huliwa së koi joxu (1 Kor. 15:58). Nyipici laka tha ijije kö tro së a xome ceitunëne lai memine la itre xa ewekë hne së hna ajane me mekune troa kuca, nge atre hi së laka kola aluzi traeme me trenge catr. Maine hnimi Iehova hne së, ejehi laka troa hetre ajan’ atraqatr troa nyi hlue i Nyidrë, celë hi matre nyimutre la ka mekune troa pionie. — 1 Ioane 5:3; Hna Ama. 4:11.
3 Nyimutre la itre hlue i Iehova thöthi ka fenesi qa hna ini; celë hi matre angatr’ a mekune troa pionie. Nyipici angatre hi lai pine laka, nemene la ka sisitria e hune la troa huliwa huti kowe la Baselaia (Mat. 6:33)? Nyipi ewekë troa trofë trongëne la maca ka loi ne la Baselaia ke huliwa i Akötresieti lai. Celë hi matre manathithi lai thupëtresiji atre wangatrehmekune hnyawa me trongën’ ej! — Mat. 24:14.
4 Hapeue itre keme me thin, xatuane kö epuni me upe la itre neköi epun, troa saene troa huliwa huti kowe la Baselaia? Trotrohnine hnyawa kö angatre la mekune ka eje thei epun, ene la troa kuca lai huliwa cili ka sisitria, hnene la hni angatre ka pexej, me u, me mekun, me trenge catre ka pexeje i angatr (Mar. 12:30)? Ketre, nyimutre la itre ka mekune me ajane troa pionie lapa, celë hi matre xome palahi angatre lo pionie ka ixatua e angatre petre kö a ini. Nge madrine catre Iehova la aqane ujë cili! — Itre Edomë 27:11.
5 Ejehi laka tha ijiji easë asë kö troa xome la huliwa ne pionie. Ngo isa hnyinge ju së me wangatrehmekune hnajëne la thithi ka hape; hapeue ka faipoipo, maine ka tha faipoipo pena, nekön, maine qatre pena; tuneka, easë kö a nyi hlue i Iehova hna jëne la huliwa ne pionie, troa cainöjëne la maca ka loi (Kol. 3:23)? Alanyimu mina fe la itre ka xötrei faipoipo ka mekune troa ixatua atraqatre troa cainöje trotro; celë hi matre ala casi qa thei nyidro, maine nyidroti asë pena a xome jë la huliwa ne pionie.
6 Maine e nango jole epuni troa xome la huliwa ne pionie lapa enehila, tune ka matre pionie ka ixatua pena? Ejehi laka alanyimu catre la itre ka hnëkë kowe la treu eiperem. Tuneka matre ce xome pe me angatr? Ejehi laka tro Iehova a amanathithine hnyawa la itre hlue i nyidrë, nge troa nyipi atraqatre la manathith, e hna huliwa palahi kowe la Baselaia; ene lo troa thele la itre mamoe i Akötresie. — Itre Hu. 20:35.