Kola Aja Trejine Trahmanyi Ngöne La Huliwa Ne Pionie
1 Hnei Paulo hna ithuecatre koi së troa ‘cate huliwa i Joxu pala hi.’ (1 Kor. 15:58) Ame kowe la ka alanyim, ke kolo lai a hape troa xome la huliwa ne pionie. Qaane lo treu semitrepa ka ase hë, 13 lao trejine ka nyixane la itre pionie!
2 Eje hi laka, alanyimu catre la itre söre ka pionie ngöne la nöje së. (Sal. 68:11) Drei la madrine ka tru kowe la ekalesia, e troa tru trootro pala hi la itre trejine trahmanyi ka hane xome la hnëqa celë! (Sal. 110:3) Trotrohnine hnyawa hi së la götrane qa ne la itre trejine trahmany, ngöne laka, angatre a troa thupëne me huliwa kowe la fami i angatr. Ame itre xane ke, angatre a catre troa hamë ixatua ngöne la ua hnine la ekalesia. Easë a madrine la trenge catre hna isa kuca hnene la itre atr celë, thatraqane la itre aja ne la Baselaia.—1 Tim. 4:10.
3 Ngo, hapeu, ijije fe kö tro epuni itre trejine trahmanyi a hane xome la huliwa ne pionie? Maine ka pionie la föe i epun, ijije kö tro epuni a hane pionie? Maine hnei epuni hë hna pane amë la huliwa cili, hapeu epuni kö a aejëne laka, ame la huliwa ka hamë madrine ka tru, ke, ene la troa nue la itre traeme së thatraqane la huliwa ne cainöje ngöne la drai ka pexej? Maine epuni petre hi a fenesi qa hna ini, hane kö epuni nyipiewekëne me thithi fë la mekune troa hane pionie, matre jëne kökötre i epuni kowe la itre xaa hnëqa ka tru, tune la troa pionie e mëëk, me ngöne la itre hnapet, maine, maine itre xaa götrane pena hna elemekene hnene la filiale i epun?—Efe. 5:15-17.
4 Hnene la ketre trejine trahmanyi hna salemëne la sosiete i angeic, ketre sosiete ka tru catr, eje a hnahone la itre trenge mani ka tru, ngo hnei angeice ju pe hi hna xome la ketre huliwa, a sine hi la drai, matre ijiji angeice ju troa pionie. Jëne la tulu ka loi hnei nyidrë hna amaman, ame qa ngöne la foa lao köni nekö i nyidrë, ala köni la ka xome la huliwa ne pionie, ngöne hë la angatre a fenesi qa hna ini. Thupene lai, madrine ka tru hmaca koi nyidrë la hnaafoane a xötrethenge la tulu hna amamane hnene la köni ka tru. Haawe, drei la manathithi ka tru hna kapa hnene la trejine celë memine la fami i angeic.
5 Ketre Qëhnelö Ka Tru Hna Thawa: Atreine tro la huliwa ne pionie a fe angangane “la qëhnelö ka ishaisha, nyine nyi gojenyi kowe la ketre huliwa.” (1 Kor. 16:9, NW) Maine jë troa huliwa angatre catr, itre pionie trahmanyi ngöne la ekalesia. Tro la aqane catre i angatre ngöne la huliwa ne cainöj, a acatrenyi angatre ngöne la ua, me akökötrenyi angatre ngöne la aqane tro angatre a kuca la itre hnëqa i angatre qa thei Akötresie. Ketre jëne troa hetrenyi la itre xaa hnëqa, la troa xome la huliwa ne pionie. Tro lai a aijijë epuni troa pionie hut, maine troa huliwa ngöne Bethela. Tru la madrine ne la itre pionie troa sine la Ini Thatraqane La Huliwa Ne Cainöj, thupene la caa macatre ne pionie. Ketre, tro la itre drikona me itre qatre thupe ka pë föen, a hane thele troa sine la Ini Thatraqane La Cainöj. Ame kowe la itre trefëne ka macaje ngöne la ua, ke, ijije tro angatre a hane mekune troa sine la Ini Ne Gileada. Maine jë tro la itre trejine trahmanyi a kökötre trootro ngöne la ua matre troa hane atreine elanyi troa wange trongëne la itre ekalesia. Nyipici, tro la huliwa ne pionie a fe angangane la qëhnelö, kowe la itre hnëqa ka tru celë ngöne la organizasio i Iehova.
6 Ame la itre trejine trahmanyi ka catre thele la nöjei pengöne troa ahmaloeëne la mele i angatr, matre ijije troa xome la huliwa ne pionie lapa, ke, tro angatre a hetrenyi la ketre madrine ka tru ka fetra qa ngöne la hna hamëne atrun.—Ite Huliwa 20:35.