Loi e Eje Thei Epuni La Aja Troa Etid Memine La Itre Atr
1 “Goeëne jë nyipunie, mate öhnejë la hna eënyi, elehmedë hë e troa menu.” (Ioane 4:35) Ame la itre trenge ewekë celë hna qaja hnei Iesu Keriso, tre, kola eatre mina fe koi së itre hlue Keresiano ne la hneijine enehila.
2 Kolo pala kö a öhne mina fe enehila la itre atr ka hetre hni ka ajan, angatr a hane thele troa kapa la itre ini qaathei Iehova. Kola mama hnyawa lai jëne la etrune la itretre drenge ka xome la bapataiso ngöne la nöjei macatre. Maine hetre hni ne ajane i epuni troa xomiujine la ketre etid, nemene la nyine tro epuni a kuca?
3 Troa Eköthe Amë La Ketre Aja Nyine Troa Eatrën: Ame la hnapan, tre, troa eje hnyawa e kuhu itre hni së la ajane troa nyiqaane me xomiujine pala hi la ketre etid. Loi e eje pala hi ngöne la itre mekuna së la aja cili ngöne la easa cainöje ngöne itre hnalapa trootro. Pine laka ame la hnëqa hna ahnithe koi së, tre, ene la troa inine la itre atr me cainöj, haawe, loi e tro asë hi së a isa thele ijine troa akökötrene la huliwa së göi troa inine la itre atr.—Mat. 24:14; 28:19, 20.
4 Itre Xaa Nyine Troa Mekune Hnyawa: Qa ne la itretre cainöjëne la Baselaia troa thithi cememine la hni ka pexej. Ame ngöne la itre xaa ijin, easa öhne la itre atr thupene la hnei angatr hna sipo ixatua ngöne la ua jëne la thith. Drei la ketre manathith laka Iehova a jëne së troa öhne me inine lai itre atr cili!—Hag. 2:7; Ite hu. 10:1, 2.
5 Hnene la ketre trejine föe hna sipone jëne la thithi matre troa hane öhnyi etid; haawe, hnei eahlo hna hamëne la itre tarak, hna hape, Ajane Kö Nyipunie Troa Atre Hnyawa La Tusi Hmitrötr? ngöne la hnë huliwa i eahlo. Hnene la ketre föe hna xome la ketre tarak me e, nge hnei eahlo hna nyiqaane troa nyialiene lo götrane nyine troa iupi fë hmaca koi Sasaiatri; ene pe hnene la trejine föe hna ithanata me eahlo, me nyiqaane troa etidi me eahlo.
6 Hetrenyi la itretre cainöj ka maca troa nyiqaane la itre etid me xomiujine itre ej; ijije hi tro angatr a xatua epuni troa eatrëne la aja i epun, ene la troa hane nyiqaane inine la Tusi Hmitrötr memine la itre atr. Sipone jë koi Akötresieti troa xatua epuni troa hane öhnyi etid, nge thele jë la nöjei aqane ixatua matre troa eatrëne la aja cili. Maine jë thaa qea kö nge tro hë epuni a madrine troa hane xomiujine me inine la itre atr la Tusi Hmitrötr.