Inine Jë La Itre Xan Troa Hnimi Iehova
1. Nemene la ka ukune la itre xan troa easenyi Iehova?
1 Mekune kö nyipunie lo ijine nyipunieti petre hi a drenge la atresiwa i Iehova? Nemene la ka uku nyipunieti troa easenyi Nyidrë? Nyimutre la itre atr ka hni ka ipië ka troa qaja koi epuni ka hape, ame la ka easenyi angatr kowe la Atre Xupi së, tre, hnene la hnei angatr hna inine la itre thiina ka lolo i Nyidrë, tune la utipine memine la ihnimi Nyidrë.—1 Ioane 4:8.
2, 3. Tune kaa la aqane tro sa huliwane la itus Ini Tusi Hmitrötr matre troa xatuane la itre hnainin troa akökötrene la ihnimi angatr koi Iehova?
2 “Akötesi Shë La”: Kola amamane hnyawa jëne la itus Ini Tusi Hmitrötr la ihnimi Iehova, memine la enyipiewekëne la troa isa hetre sipu imelekeu me Nyidrë. Tune kaa la aqane tro sa huliwane la itusi celë, matre troa inine la itre xan troa akökötrene la ihnimi angatr koi Akötresie? Ame ngöne la kola wanga atrune la ketre mekun ka hnyipixe, tre, ijije tro sa xome la itre hnyinge ka troa ukune la atr troa thele mekun, tune la itre hnyinge celë: “Kola qaja amamane tune kaa hnene la mekune celë ka nyipici göne la pengö i Iehova?” maine “Kola anyipicin tune kaa hnene la mekune celë laka, Iehova hi la Tretretro ka sisitria, nge pëkö sa i Nyidrë?” Ijije tro la aqane ini celë a xatuane la hnainin troa nyiqaane eköthe la aqane imelekeu me Iehova ngöne la mele i angeice ka pexej.
3 Ame la easa xatuane la itre hnainin troa trotrohnine hnyawa la hnëqa ka sisitria, ene la troa kapa la atrehmekune ne la nyipi Akötresieti ka caas, tre, tro hë angatr a wanga atrehmekune hnyawa ka hape, “Akötesi shë la,” tune la hna qaja hnei Isaia. (Is. 25:9) Ame ngöne la easa qeje pengöne la Wesi Ula i Akötresie, tre, nyipi ewekë tro sa qaja atrune la aqane troa amanathithine la itre atr asë e celë fene hnene la kola eatre hnyawa la aja Iehova jëne la musi Iesu Keriso Joxu.—Is. 9:6, 7.
4, 5. Nemene la aliene la ihnim koi Iehova?
4 Hatrene La Ihnimi Koi Iehova: Atre hi së laka, ame la troa hnimi Iehova cememine la hni ka pexej, me u, me mekun, tre, thaa kolo hmekuje kö a qaja la itre aliene hni së koi Iehova. Nyipi ewekë fe tro sa kapa me trongëne la aqane waiewekë i Nyidrë. (Sal. 97:10) Kola mama la ihnimi së koi Akötresie jëne la hna drenge thenge hnyawa la itre wathebo i Nyidrë me catre ngöne “la thina ka hmitöte me thina ka ijiji Akötesie,” ngacama kola qëmeke kowe la itre itupath me icilekeu.—2 Pet. 3:11; 2 Ioane 6.
5 Ame la troa kuca la aja i Akötresie pine laka easa hnimi Nyidrë, tre, celë hi ketre madrin. (Sal. 40:8) Nyipi ewekë tro la hnainin a atrehmekune hnyawa laka, ame la nöjei wathebo i Nyidrë, tre, nyine loi ka epine palua kowe la itre hlue i Nyidrë. (Deu. 10:12, 13) Maine kola mele thenge la itre hna amekötine i Iehova hnene la ketre atr, haawe, angeice hi lai a amamane la ejuine la hni ne ole i angeic kowe la nöjei huliwa ka lolo i Nyidrë. Loi e troa xatuane la hnainine troa trotrohnine laka, ame la kola tro ngöne la itre jë i Iehova ka meköt, tre, eje hi lai la ka troa xatua angeic troa neëne la itre jol me akötr.
6. Nemene la itre manathithi hna troa kapa hnene la itre ka hnimi Iehova?
6 Itre Manathithi Thatraqane La Itre Ka Hnimi Akötresie: Iehova a thupëne hnyawa la itre ka hni ka ipië me ka hnimi Nyidrë, nge ketre, Nyidrëti a qaja amamane koi angatr “la nöjei ewekë asë ga jui Akötesie.” (1 Kor. 2:9, 10) Hnene la hna atrehmekune la aja i Iehova, ene pe mama cile koi angatr la itre ewekë ka troa traqa kowe la itre drai elany, nge eje thei angatre la mejiune ka catr. (Iere. 29:11) Ame la itre ka hnimi Iehova, tre, angatre pë hë a kepe thangane la ihnimi Nyidrë. (Eso. 20:6) Angatr a hnine catrëne la mejiun, ene la mele ka thaa ase palua kö, hnene la etrune la ihnimi Akötresie koi angatr.—Ioane 3:16.
7. Nemene la aliene hni nyipunie ngöne la nyipunieti a inine la itre xan troa hnimi Iehova?
7 Maine easa catre troa atrepengöne la Tretretro së e koho hnengödrai, haawe, tro hë sa catre cainöj koi itre xan. (Mat. 13:52) Drei la ketre hnëqa ka sisitria, ene la troa inine la itre xan, memine hi la itre nekö së, troa hnimi Iehova! (Deu. 6:5-7) Epi tro pala hi sa catre memine la itre hnainin, troa atrunyi Akötresie, ke, easa melëne la ‘loi atraqatre i Iehova.’—Sal. 145:7.