Nemene La Hna Troa Kuca Hnene La Baselaia i Akötresie?

ITRE HNA KUCA HA HNENE LA BASELAIA

Ame ngöne la tane mekun ka ase hë, hne së hna ce wang la hatren hna qaja hnei Iesu. Kolo hi lai a amamane laka, ase hë acil la Baselaia i Akötresie e hnengödrai, nge Iesu Keriso la joxu.

Öni Tusi Hmitrötr, ame la kola acili joxu Iesu, hnei nyidrëti hna ukapië Satana me itre dremoni qa hnengödrai. Qane ju hi lai, tro hi angatr a lapa e celë fen. Celë hi kepin matre, qane lo 1914, kola gomegom la fen.—Hna Amaman 12:7, 9.

Ngacama kola ngazo la fen, ngo Iesu, joxu ne la Baselaia i Akötresie a xatuane la itre atr. Jëne la huliwa ne ini Tusi Hmitrötr e cailo fen, nyimutre la itre atr ka inine la itre trepene meköt ne la Tusi Hmitrötr, me trongën itre ej. (Isaia 2:2-4) Kola xatuane la itre milio lao atr troa madrin ngöne la fami, me hetre aqane waiewekë ka loi göne la huliwa, me itre mo matre tha tro kö a musinë angatr hnene lai. Kola ini angatr troa mele ka loi enehila, me saze matre troa kepe angatr ngöne la Baselaia i Akötresie.

ITRE HNA TROA KUCA HNENE LA BASELAIA

Ngacama Iesu la ka musi e hnengödrai, ngo itre atr palahi la ka musi e celë fen. Hnei Akötresie hna upi Iesu ka hape, “Musinënejë nyipëti la nöjei ithupëjia me nyipë.” (Salamo 110:2) Easenyi hë tro Iesu a apatrene la itre ka icilekeu memine la Baselaia, me axapone la hni ne la itre ka drengethenge Akötresie.

Hane hi la hna troa kuca hnene la Baselaia i Akötresie:

• Troa lepe apatrene la itre hmi ka thoi. Troa apatrene la itre hmi ka silitrengathoi Akötresie, me ahacene la mele ne la itre atr. Tusi Hmitrötr a aceitunëne la nöjei hmi ka thoi me ketre föe ne gojeny. Troa asesëkötrëne la itre atr la kola apatrene ej.—Hna Amaman 17:15, 16.

• Troa apatrene la musi atr. Tro la Baselaia i Akötresie a apatren asë la nöjei musi atr.—Hna Amaman 19:15, 17, 18.

• Troa apatrene la itre atr ka ngazo. Tune ka la itre atr ka catre fë mekun, me ka xele ma drei Akötresie? “Ngo troa thupa tije la ite ka ngazo qa ngöne la nöj.”—Ite Edomë 2:22.

• Troa apatrenyi Satana me itre dremoni. Thatreine hë Satana me itre dremoni troa “amenune la itre nöj.”—Hna Amaman 20:3, 10.

Tune ka ha la mel fene la Baselaia i Akötresie?

ITRE HNA TROA KUCA HNENE LA BASELAIA KOWE LA ATR

Pine laka, Iesu a mus qa hnengödrai, tru catr kö la hnei nyidrëti hna troa kuca koi së hune la ketre atr. Troa ce musi me nyidrë hnene la ala 144 000 lao atr hna iën qa la fen. (Hna Amaman 5:9, 10; 14:1, 3) Tro nyidrëti a eatrën la aja i Akötresie e celë fen. Nemene la itre manathith hne së hna troa kapa e celë fen, fene la musi ne la Baselaia?

• Troa apatrene la itre sine mec, me mec. “Tha tro kö a qaja hnene la ate lapan’ eje, ka hape, Ini a mec” nge “Pë hmaca kö mec.”—Isaia 33:24; Hna Amaman 21:4.

• Troa tingeting me pëhë hna mecin. “Tro ha tru la tingetinge ne la ite nekö i nyipo” nge “ tro angat’ a isa lapa fene la ite vine i angate me fene la ite hmejienge i angat ; nge pëkö ate troa aqounyi angat.”—Isaia 54:13; Mika 4:4.

• Troa hamë huliwa ka loi. “Tro la ite hnenge hna iëne a mele ahoeane kowe la huliwa ne la ite ime i angat. Tha tro kö angat’ a huliwa gufa.”—Isaia 65:22, 23.

• Tro porop la ihnadro. “Tro la hnapapa memine la ga qaqacil’ a madin’ it’ ej, nge tro la hnit’ a aciacin, me enge tune la peledë.”—Isaia 35:1.

• Troa inine la itre atr la aqane troa hetrenyi la mel ka epin palua. “Nge ame la aqane troa hetrenyi la mele ka pë pun, tre, tro angatr a atrepengöi nyipë, Akötresie ka cas, memine la hnei nyipëti hna up, Iesu Keriso.”—Ioane 17:3.

Aja i Akötresie tro epuni a kapa la itre manathithi cili. (Isaia 48:18) Tro la tane mekun ka troa xulu a amamane la nyine tro epuni a kuca enehila matre troa hane kapa la itre manathithi cili.