Kolo Pala Hi a Acatrene La Lapaune Së Hnene La Hne Së Hna Cainöj
1. Nemene la thangane hne së hna kapa qa ngöne la hna cainöj?
1 Ijije troa acatrene la aqane imelekeu së me Iehova me akökötrene la madrine së, hnene la hna catre cainöj. Nyipici, ame la pane ewekë ka uku së troa cainöj, tre, ene la troa amadrinë Iehova. Ngo maine tro sa drengethenge la hna amekötin troa “cainöjëne la wesi ula,” tre, tro hë sa kapa la itre manathithi qaathei Iehova me kepe thangane ka loi ngöne la itre xaa götran. (2 Tim. 4:2; Is. 48:17, 18) Tune kaa la aqane tro la huliwa ne cainöj a acatrene la lapaune së me ithue madrine së?
2. Tune kaa la aqane tro la huliwa ne cainöj a acatrene la lapaune së?
2 Kola Acatrene La Lapaune Së Me Amanathithi Së: Kola xatua së hnene la huliwa ne cainöj troa mekune hnyawa la itre manathithi ne la Baselaia, ngo thaa tro pe a hnehengazone menune pala ha la itre jol hne së hna qëmeke kow. (2 Kor. 4:18) Maine tro sa qeje pengöne la itre ini qa hnine la Tusi Hmitrötr, haawe, tro hë lai a acatrene la lapaune së kowe la itre hna thingehnaeane hnei Iehova me akökötrene mina fe la hni ne ole së kowe la nyipici. (Is. 65:13, 14) Ame la easa xatuane la atr troa kökötre ngöne la götrane la ua matre thaa tro kö angatr a “itete fen,” kolo fe lai a acatrene la aja së troa iananyi memine la fen.—Ioane 17:14, 16; Rom. 12:2.
3. Tune kaa la aqane tro la huliwa ne cainöj a xatua së troa eëne la itre thiina ne Keresiano?
3 Kola xatua së fe hnene la hna catre cainöj, troa eëne la itre thiina ne Keresiano. Drei la ketre ceitun, kola xatua së troa eëne la hni ne ipië hnene la hna catre “xome la nöjei pengön’ asë thatraqane la nöjei ate asë.” (1 Kor. 9:19-23) Pine laka easa cainöj kowe la itre atr ka “kucakuca . . . me isa ije hë tune la nöjei mamoe ka pa ate thupën,” haawe, kolo lai a xatua së troa hetrenyi la utipin me atreine trotrohnine la aqane mele i angatr. (Mat. 9:36) Ketre, easa inine troa xomihni ahoean ngöne la easa cile hut, ngacama thaa semesine së kö hnene la itre atr maine icilekeu pena. Tro ha akökötrene la madrine së e hne së hna nue la mele së troa xatuane la itre atr.—Ite hu. 20:35.
4. Tune kaa la aqane goeëne nyipunie la huliwa ne cainöj?
4 Drei la ketre manathithi ka tru troa kuca la ketre huliwa ne cainöj ka atrune la Atre nyine tro hmekuje hi sa thili kow! Eje hi, kola acatrene la lapaune së hnene la huliwa ne cainöj. Nge ketre, ej a hamë manathithi ka tru kowe la itre atr ka catre troa ‘anyipicine la maca ka loi.’—Ite hu. 20:24.