Ixatua La Troa Cainöj Matre Troa Xomihniahoeany
1 Wesi Ula a ixatua troa “nyenyape fë la xomi hnine ngöne la hna isasaqe hna amë qëmeke shë.” (Heb. 12:1) Tune la ka nyinyap a thele troa xomihniahoeany matre troa hun, nyipi ewekë fe koi së la thiina cili matre troa kapa la mele ka epine palua. (Heb. 10:36) Tune kaa la aqane tro la cainöje trootro a xatua së troa xomini ahoeanyi uti hë la pun?—Mat. 24:13.
2 Hna Ithuecatr Koi Së Ngöne La Ua: Maine tro sa cainöjën la hnei Tusi Hmitrötr hna thingehnaean ka lolo göi fene ka hnyipixe, tro ha mele pala hi la mejiune cili ngöne la itre hni së. (1 Thes. 5:8) Ame la easë a xome pala hi la huliwa cili, aqane tro hi së lai a hane ce thawa memine la itre xan la nyipici qa hnine la Tusi Hmitrötr. Qa ngöne la hne së hna isigöline la lapaune së, tro ha acatrene la mele së ngöne la ua.
3 Nyipi ewekë tro sa pane trotrohnine hnyawa la nyipici hnine la Tusi Hmitrötr, matre atreine troa inine hnyawa fe la itre xan. Loi e tro sa thele me sine la itre mekun. Hnene la trenge catr hne së hna kuca, tro ha jui la atrehmekune së, me acatren la lapaune së, me aegöcatrenyi së ngöne la ua. (Ite edomë 2:3-5) Qa ngöne lai, tro sa egöcatr ngöne la ua, e hne së hna hane xatuan la itre xan.—1 Tim. 4:15, 16.
4 Ame la ketre götrane ka tru ne la “ixete ne ishi ka pexeje i Akötesie,” tre, troa catre cainöj. Nyipi ewekë koi së lai, matre tro sa atreine cile koi Diabolo me itre dremoni. (Ef. 6:10-13, 15) Maine tro sa catre huliwa i Akötresie, troa lolo pala hi la itre mekune së, nge thaa tro kö a angazone itre ej hnene la fene i Satana. (Kol. 3:2) Ame la easë a inine la itre xan la itre jë i Iehova, easë pala fe a isa mekune la itre aqane tro sa thiina ka lolo.—1 Pet. 2:12.
5 Hna Ithuecatr Hnei Akötresie: Kola ini së hnene la huliwa ne cainöj, troa mejiune koi Iehova. (2 Kor. 4:1, 7) Drei la ketre ewekë ka lolo! Thaa kolo hmekuje kö a xatua së troa cainöj hnene la hna catre mejiune koi Nyidrë, ngo göi tro fe a cile kowe la nöjei ejolene la mel. (Fil. 4:11-13) Nyipici, ame la jëne troa xomihni ahoeany, tre, troa inine troa mejiun koi Iehova. (Sal. 55:22) Ngo eje hi lai laka, huliwa ne cainöj a xatua së troa xomihni ahoeany.