Inine Jë La Itre Atr Ka Thatreine Kö e Tus
1. Nemene jol hne së hna troa qëmeke kow ngöne la hna cainöj?
1 Ame itre xaa ijin ngöne la hna cainöj, easa qëmeke kowe la ketre jol, ene la troa inine la nyipici kowe la itre atr ka thatreine e tus. Nemene la nyine tro sa kuca?
2. Tune kaa la aqane tro sa metrötrëne la itre atr ka thatreine e tus, nge pine nemen?
2 Loi e Tro Sa Metrötrë Angatr: Nyipi ewekë catre koi Iehova la aliene hni ne la ketre atr, ngo thaa ene kö la itre ini ka tru hnei angeice hna kuca. (1 Sam. 16:7; Ite edomë 21:2) Qa ngöne lai, thaa tro pi kö sa thaipiëne la itre atr ka thatreine e tus. Canga tro hi la itre atr cili a drei së, e hne së hna metrötrë angatr me xomihni ahoean. (1 Pet. 3:15) Thaa kolo kö lai a hape, nyipi ewekë tro la atr a e la ketre xötr maine ketre paragarafe pena. Hnene laka kola kökötre la atrehmekunene la atr ngöne la itre nyipici ne la Tusi Hmitrötr, ene pe hetre aja i angeice fe troa atreine e tusi hnyawa, me hane melëne la madrine ka xulu qa ngöne la hna e la Tusi Hmitrötr “e lai me jid.”—Sal. 1:2, 3.
3. Nemene la itre aqane hamë ini hne së hna troa xom, matre troa inine la itre atr ka thatreine e tus?
3 Itre Aqane Troa Inine La Tusi Hmitrötr: Ka ixatua catr la itre iatr göi troa inine me hneheen la itre mekun. Maine jë tro epuni a hnyingëne kowe la hnainin la hnei angeice hna öhne ngöne la iatr. Thupene lai, qaja jë la itre hnyinge ka ijij matre troa xatua angeic troa trotrohnine la ini hna hamëne hnene la iatr. Xome jë fe la itre xötr ka amamane la itre mekun hnei epuni hna ajane troa wanga atrune ngöne lai iatr. Ketre, ijije mina fe tro epuni a xome la itre iatr, matre troa wange hmaca la ini. Thaa tro kö a acaa tro wang asë la itre mekun. Wanga atrune jë hi la taane la ini memine la itre mekune ka sisitria ne la ini, me neëne la itre mekune ka thaa ihmeku kö memine la taan. E mekötine jë la itre xötr qa hnine la Tusi Hmitrötr, nge hnyinge jë kowe la hnainin matre troa wange, ka hape, trotrohnine jë kö angeice la hna e. Maine jë tro lai a aciane thei angeic la aja troa akökötrene la atreine troa e tus, matre tro angeic a ketre sipu thele la itre nyipici hnine la Tusi Hmitrötr.
4. Tune kaa la aqane tro sa xatuane la hnainin troa atreine e tusi hnyawa?
4 Itre Ixatua Nyine e Tusi Hnyawa: Ijije troa trotrohnine me hneheene hnyawa la itre mekun hnene la itre atr ka thatreine e maine ka nango inine troa e tus. Maine jë tro epuni a ithuecatre koi angatr troa xome la itre ikaho nyine drenge la itre itusi së. Maine tro la atr a e hmidrane la pepa me drenge lai kaho, haawe, tro hë angeic a hane atreine e tus. Ketre, ijije troa ixatua hnene la boroshür hna hape, Appliquez-vous à la lecture et à l’écriture. Ame ngöne la itre xaa götran, ijije mina fe tro la itre qatre thup a hnëkëne ngöne la ekalesia la itre ini thatraqane la itre ka thatreine e tus. Maine jë tro la itre mekune celë a xatuane la itre ka thatreine e tus, troa trotrohnine la “ite hna cinyihane ka hmitöt,” ene lo itre ka troa ainamacanë angatr kowe la mel.—2 Tim. 3:15.