Aqane Troa Xatuane La Itre Ka Thatreine e

1. Nemene la ejolen la troa cainöje kowe la atr ka thatreine kö e?

¹ Ame la itre xa atr, tre ka pi porotrikë Tusi Hmitrötr hi angatr, ngo canga cile hmaca ju hi angatr, ke tha nyipi atreine hnyawa kö angatr e tus. Celë hi kepin matre, maine hne së hna hamëne lo itus Ini Tusi Hmitrötr, tre jole troa ce ithanatane me angatr la easa bëeke hmaca. Tro sa xatua nyudreni tune kaa? Celë hi lai hna hnyingëne kowe la itre trejin qa ngöne la 20 lao nöj. Hane hi cahu aqane kuca i angatr.

2. Nemene la itre xa jia ne huliwa ka loi göne la itre ka thatreine e?

² Maine jol, maine thatreine pena lai atr e, nyiqaane ce wange ju me angeice lo boroshür Écoutez Dieu, maine pena, Drei Akötresieti Jë Matre Mele Epine Palua. Ame la ketre trejin qa Amerika, ka pionie, tre angeic a pane amamane ju kowe lai atr la lue boroshür, nge angeic pë hë a hnyinge jë ka hape, nemene boroshür la hnei angeic hna pi ithanatan. Kola qaja hnene la hnalapa ne thewe huliwa ne Kenya ka hape, lue jia ne huliwa lai ka lolo catr koi angetre Afrique, pine laka, ame thei angatr, tre kola ini itre atr jëne la itre ifejicatre, ngo tha kolo kö a hane hnyingëne la mekuna i angatr. Celë hi matre, ma tro hi a hmaloi koi itre atr ka qa hna ini troa hane qaja la mekuna i angatr, ngo ame göi itre ka tha hane kö ini aqeany, tre hmahma pë hë angatr. Maine ka nango atreine e lai atr, ka loi troa nyiqaane jëne lo boroshür Itre Maca Ka Lolo Qaathei Akötresie! maine Ijije Fe Tro Nyipunie a Ce Sinee Me Akötresie! maine pena, jëne lo itus Trenge Edromë Qa Hnin La Tusi Hmitrötr.

3. Nemene la nyine tro sa kuca, matre hetre thangane la hne së hna ini Tus memine la itre ka thatreine e?

³ Qaja Aloinyi Nyudreni Jë: Ame la itre xa atr ka thatreine kö e, tre tro angatr a hmahma, maine mekune pena ka hape, pëkö hnei angatr hna hane atre. Celë hi kepin, matre ame la pane nyine troa kuca, tre ene la troa xatua angatr troa trije lai hmahma. Ala nyimu la itre atr ka thatreine kö e, ngo ka inamacan, nge ka atreine inine la itre ewekë. Metrötrë nyudreni ju së, nge nyipi nyudreni ju fe. (1 Pet. 3:15) Tro hë angatre lai a pi sisedrëne la ini Tus, e tro angatr a öhne ka hape, tha gufa kö la itre trenge catre i angatr, nge hetre thangane fe thei angatr la hna ini Tus. Qa ngöne lai, the cile kö së troa qaja aloinyi nyudren.

4. Tro sa xatuane tune kaa la itre ka thatreine kö e, troa hnëkëne la ini Tus i angatr?

⁴ Ngacama thatreine hnyawa kö lai hnainine e, ngo thuecatre i angeice jë pe troa hnëkëne hnyawa la ini Tusi angeic. Ame la itre xa trejin qa Afrique du Sud, tre hnei angatr hna up la itre ka ini Tusi me angatr troa sipo ixatua thene la itre sinee i angatr ka atreine e. Ame la ketre trejin qa Agele, tre hnei angeic hna hamëne la sipu itus i angeic hna sija ha, matre tro lai atr ka ini Tus a öhn ka hape, hmaloi hi troa canga sa, jëne la itre mekune hna sija. Ame la ketre trejin qa Inde, tre angeic a ithuecatrene la itre ka ini Tusi me angeic troa canga goeëne la itre iatr ne lai ini hna troa ce ithanatan, me thele la itre ini.

5. Nemene la aqane tro sa ini Tus kowe la atr ka thatreine hnyawa kö e?

⁵ The Nyimenyime Kö: Ame hë la epuni a ini Tusi memine lai atr, wange mekötine ju la itre aliene ka tru ne la ini, nge xatua angeice jë troa trotrohnine hnyawa la itre aliene cili. Ame la kola xötrei ini Tus memine lai atr, tre ma loi tro hi a nyiqaane hnei 10 maine 15 lao menetr. The kuca asë kö lai mekene tus, ngo xome ju hi la ka ijij. Maine tha ka e nyimenyime kö lai atr, tre nango treqe angeice hnyawa ju kö. Tro kö angeice lai a isiine troa atreine e tus hnyawa, nge tro fe ha kökötre trootro la ihnimi angeice koi Iehova. Ngo ame la qâ së, göi troa xatua angeic, tre ene la troa canga hë angeice troa hane sine la itre icasikeu, ngöne lo easa xötrei nyiqaane la ini Tus.

6. Tro sa inine tune kaa la itre atr troa e tus?

⁶ Maine tro la itre ka ini Tus a inine troa e hnyawa, tro hë angatre lai a canga macaje ngöne la götrane la u. (Sal. 1:1-3) Hnene la itre xa trejine hna xatuane la itre ka ini Tus jëne lo itus Appliquez-vous à la lecture et à l’écriture. E ase mina ha angatre ini Tus, angatr a pane xome la itre xa hnepe menetr göi troa inine e tus. Maine kola nango patre la aja thene lai ka ini Tus, thuecatre i angeice hmaca jë, qaja jë koi angeice la itre ewekë hnei angeice hna atreine kuca ha enehila. Qaja ju koi angeice ka hape, tro kö Iehova a amanathithine la itre trenge catre i angeic, nge thuecatre i angeice jë troa sipo ixatua thei Iehova. (Ite edomë 16:3; 1 Ioane 5:14, 15) Hnene la itre xa trejine qa Agele hna qaja kowe la itre ka ini Tus ka hape tha tro kö a nyimenyim menu; ngo troa pane atre hnyawa lo itre mataitus. Thupene jë hi lai, troa inine la aqane troa thele me e la itre xötr ka mama hnine la itre itus. Nge ase jë hi lai, tro ha e la itre itus ka hmaloi troa e. Ame la aqane tro sa xatuane la itre atr ka thatreine e, tre ene fe la troa ahlëne la aja i angatr troa e tus.

7. Hnauëne laka, tha tro kö sa cipane la nyipici kowe la itre atr ka thatreine kö e tus?

⁷ Tha Iehova kö a wang acone la itre atr ka tha hane kö ini aqeany. (Iobu 34:19) Ame la hnei Iehova hna goeën, tre ene la aliene hni ne la atr. (1 A. l. ite jo. 28:9) Qa ngöne lai, the cipane kö la nyipici kowe la itre atr ka thatreine hnyawa kö e tus. Tru catre la itre jia ne huliwa ka troa xatua epun troa ini Tusi me angatr. Ame hë e thupen, tro hë së lai a ini angatr, jëne lo itus Ini Tusi Hmitrötr, matre tro hë angatr a atrepengöne hnyawa la Tusi Hmitrötr.