Ka Hnëkë Kö Epuni Kowe La Pui Ne Xeni Ngöne La Götrane La Ua?
1. Nemene la nyine troa hnëkë ngöne la easa kuca la ketre pui ne xen?
1 Atraqatre la huliwa nyine hnëkën la ketre pui ne xen. Loi e troa hetre xeni hna hnëkëne hnyawa, me ehnyapan ej nge hna troa thawa e thupen. Nyipi ewekë fe troa eköthe hnyawa la aqane troa tro fë la xeni cili. Ketre, loi e hna hnëkëne fe la götrane hnë troa xen. Nyipi ewekë mina fe tro la itre atr hna könën a hnëkë, e ka mele angatr ngöne la itre götrane gaa nany. Ngacama atraqatre la huliwa nyine troa kuca, ngo ka sisitria catre kö la madrine hna kapa qa ngöne la ketre pui ne xeni ka lolo memine la itre sinee me hnepe lapa së. Easenyi hë tro la Itretre Anyipicine i Iehova e cailo fen a ce traqa, itre gurup ka tru maine itre gurup ka co pena, troa ce pui ne xen ngöne la ijine Kovasio Ne Distrik hna hape, “Hmeke Jë!” Atraqatre la huliwa hna kuca ha göne la troa hnëkëne la porogarame me itre xaa ewekë kö. Hna könë së asë. Haawe, maine easa ajane troa sine lai me hane kepe thangane hnyawa, tre, nyipi ewekë tro së isa ala caasi a isa hnëkë hnyawa.—Ite edomë 21:5.
2. Nemene la nyine troa kuca matre troa hane sine asë la nöjei drai ne la pui ne xen ngöne la götrane la ua?
2 Loi e Tro Sa Kepe Thangane Hnyawa: Hapeu, ase hë epuni hane axeciëne la itre ewekë nyine troa kuca, matre troa hane sine asë la nöjei drai ne la pui ne xeni celë ngöne la götrane la ua? Maine ijij, thuemacane jë la maseta i epun, laka, epuni a troa sine la porogarame ka pexeje ne la kovasio, ene mina fe la pane drai. Hapeu, ase hë epuni hnëkëne amë göi loto me uma? Loi e tro la itre qatre thup a wange hnyawa maine troa xatuane la itre qatr me itre ka wezipo, memine fe lo itre ka aja ixatua.—Iere. 23:4; Gal. 6:10.
3. Pine nemene matre loi e thaa tro kö sa sine la kovasio hna kuca e cailo fen, e thaa hna könë së kö?
3 Troa hnen ngöne la itre xaa götran la itre kovasio hna kuca e cailo fen. Loi e tro sa hnehene laka, hna könëne hi la itre xaa ekalesia me itre xaa trejin ka traqa qa ngöne la itre xaa nöj, kowe la itre ijine cili. Hna hnëkën amë hnyawa hnene la filial la etrun la itre icea me itre hnahag ne otel göi troa könëne la ka ala nyim. Maine jë tro ha tru menu pala ha hnei atr, e troa sine la kovasio cili hnene la itre trejine hna thaa könëne kö.
4. Nemene la itre nyine amekunë së ka troa xatua së troa sine ngöne la qaane la porogaram?
4 Loi e tro sa hnëkë ngöne la köni drai troa canga traqa ngöne la hnë kovasio, matre troa thele göhnë së qëmekene troa nyiqaane la porogaram. Xome jë la itre hnepe menetr qëmekene troa nyiqaane la icasikeu, matre troa goeëne la porogaram hna fejan ngöne la sine pepa së. Tro lai a xatua nyipunie troa hnëkëne la hni nyipunie matre troa kapa la itre ithuemacany hna troa hamën. (Ezera 7:10) Ame ngöne la kola nyiqaane elone la miuzik ne la Baselaia, tre, loi e tro sa drenge lai cememine la madrin, me hnëkë troa hane thing la nyima ne nyiqaan me hane drenge la thith.
5. Tune kaa la aqane tro la hnepe lapa së a kepe thangane hnyawa la porogaram?
5 Maine kola ce lapa asë la itre atrene la hnepe lapa ngöne la ijine icasikeu, haawe, loi e tro la itre keme me thin a thupëne hnyawa laka, itre nekö i angatr a drenge hnyawa la porogaram. (Deu. 31:12) Kola ithuecatre koi së asë troa goeëne ngöne la itre sipu Tusi Hmitrötre së, la itre xötr hna e. Maine jë troa xatua së troa drenge hnyawa la itre ithuemcanyi hnene la hna xomi not. Tro pë hë la itre not cili a xatua nyipunie troa mekune hmaca lo itre mekun ka sisitria ne la itre cainöj. Loi e tro nyipunieti a neëne troa porotrik ngöne la ijine icasikeu maine troa mejë pena qa ngöne la göhne i nyipunie. Maine hetre mobilis i nyipunie, haawe, the nue eje kö troa ajolë nyipunie maine itre xan pena ngöne la porogaram. Thupene la itre drai ne icasikeu, ijije tro nyipunieti a ithanatane memine la itre xan la itre mekun ka ketri nyipunie ngöne la porogaram?
6. Nemene la ketre götrane ka sisitria catr ne la itre kovasio së, nge tune kaa la aqane tro sa kepe thangane hnyawa qa ngön?
6 Ame ngöne la kovasio ne distrik, tre, hetrenyi së la manathithi ka tru troa eköthe la ketre aqane imelekeu ka lolo memine la itre trejine me easë, trahmanyi me fö; nge ketre ewekë lai hna thaa öhne kö e cailo fen. (Sal. 133:1-3; Mar. 10:29, 30) Hapeu nyipunieti kö a ibozu memine la itre ka lapa ezi nyipunie, me porotrike me angatr ngöne la kola xeni hnaipajö? Celë hi la ketre thangane ka loi lai hna kapa qa ngöne la hna xeni hnaipajö me lapa ngöne la hna kovasio, hune la troa tro kowe la itre hnë xen. Loi e troa xeci e kuhu hni së laka, thaa tro pi kö sa triane la ketre ijine ka sisitria troa ithuecatrekeu—Rom. 1:11, 12.
7. Nemene la itre ewekë nyine troa hnëkën, göi heetr hne së hna troa heetrën?
7 Aqane Heetre Së: Hnei Iehova hna amekötine kowe la angetre Isaraela troa nyi hane ngöne la itre ëzine la itre ixetre i angatr, me amë la drohnu ka bulu hune la han ngöne la itre ëzin. (Num. 15:37-41) Ame la ewekë cili, tre, nyine amekunë angatr, ka hape, hna ketre aisa angatre kö troa thili koi Iehova. Ame enehila, kola mama laka thaa itretre fene kö së hnene la aqane heetre së ka metrötr me qahmihmi. Kolo mina fe lai a aijijë së troa anyipicine kowe la itre atr ka goeë së, ngöne la easa lö pi e trön thupene la porogaram matre troa xen. Haawe, loi e tro sa canga mekune hnyawa la pengöne heetr hne së hna troa heetrën.
8. Tune kaa la aqane tro sa cainöje koi itre xan, ngöne la traone hna hnen la kovasio?
8 Anyipicine Jë: Maine tro sa hnëkë hnyawa, haawe, ijije tro sa anyipicine kowe la itre atr ka mele ngöne la traone hna hnen la kovasio. Hnene la ketre trejine trahmany, ka ce tro memine la föe i angeic troa xeni ngöne la ketre hnë xen, hna köjane la badge i angeic me hnyingëne kowe la ka huliwa, ka hape: “Hane kö epuni öhne la itre atr ka athipe la itre badge celë?” Hnene lai ka huliwa hna sa, ka hape, anyimua öhnyi angatre hë angeic, nge angeic a pi atre la kepin matre kola ce athipe asë lai badge cili. Ene pe nyiqaane porotrike jë hë nyidro, nge thupene lai, hnene la trejine hna könë angeic troa hane sine la kovasio.
9. Tro sa amamane tune kaa la hni ne ole së kowe la Atre Ikep, ene Iehova?
9 Ngacama tro la itre trejine me easë a tro fë la nöjei cainöj, nge itre xan kola hnyinge kow, me itre iamacany, ngo Iehova Tretretro së e koho hnengödrai la Atre Hamë së cememine la ihnim la pui ne xeni ngöne la götrane la ua ngöne la macatre celë. (Is. 65:13, 14) Loi e tro sa amamane la hni ne ole së kowe la Atre Kepe së hnene la hna sine la köni drai asë me kapa cememine la madrin la nöjei götran ne la göxeni ne la ua hna hamë së. Hapeu, ase hë epuni hnëkëne amë la itre ewekë nyine troa kuca?
[Hna Eköhagen götran 6, 7]
Nyine Amekunë Së Göi Kovasio Ne Distrik
◼ Traem Ne Icasikeu: Troa nyiqaane la porogaram e 9 h 20, ngöne la köni drai asë. Troa fe la itre qëhnelö e 8 h e hmakany. Ame la kola nyiqaane elone la miuzik ne la Baselaia, tre, loi e tro asë hi së a ilapany, celë hi aqane tro së lai a amamane la metrötre së ngöne la kola nyiqaane la icasikeu. Troa nyipune la icasikeu e 16 h 55 e Drai Ka Tru me Mecixen, nge 16 h 00 e Sabath. Troa nyiqaane la itre Kovasio e cailo fen e Drai Ka Co e 9 h 20 nge troa fenesi e 16 h 55.
◼ Hna Acili Loto: Ame ngöne la nöjei hnë kovasio, hetre göhnë hna acili loto, me thue göhnene lo itre ka canga traqa. Troa acile ngöne la itre göhnë hna hnëkëne hë thatraqane la itre sine atr, ene hmekuje hi lo itre ka trene pepa nge hna aijijën troa cile e cili. Pine laka thaa tru kö e itre xaa ijin la hnë acili loto, loi e troa nyi aliene hnyawa la itre loto.
◼ Göi Göhnë Hnine Iuma Ne Drai: Tro hmekuje hi a ami göhnene la itre ka ce tro me easë hnine la loto ka caas, maine ka ce mele pena me easë.
◼ Xeni Hnaipajö: Ka lolo catr troa traqa fë kemej kowe la hnë kovasio, hune la troa tro trije lai hnë kovasio matre troa xomi xen ngöne la ijine xeni me mano e hnaipajö. Ijije troa amë la ketre neköi ka lepany fene la icea. Thaa hna nue kö troa traqa fë ngöne la hnë asabele la itre glasiere ka tru, me itre ver.
◼ Itre Ahnahna: Ijije hi tro sa amamane la madrine së ngöne la troa hane hamë ahnahna thatraqane la huliwa e cailo fen, hnine la Uma Ne Baselaia maine ngöne la hna kovasio. Maine kola hamë chèque, loi e troa sija la hna hape, “AEB Normandie.”
◼ Itre Eatr Me Itre Sine Mec: Kola eetr la itre ka cilëne la hnëqa hna hape Pane Ixatua, hnene laka kola hë angatr troa wang la itre jole ka pëkö pengön. Maine kola traqa la ketre ewekë ngöne la ijine kovasio, canga wange ju lai ketre trene hnëqa easenyi së matre tro angeic a hëne nyimenyimëne lo Pane Ixatua troa wai së. Maine ijij, tro pë hë a thuemacane lo numero i pital göi itre eatr ka tru.
◼ Ikaho: Thaa tro kö a saan la itre ikaho maine ketre ewekë pena ngöne la tirisite me ikaho ne la iuma ne kovasio, nge thaa tro kö a ajolëne la itre atrene la icasikeu hnene la itre ewekë cili.
◼ Itre Nyine Uku Medreng: Hna wathebone troa traqa fë la itre nyine uku medrenge ngöne la itre hna kovasio. Ngo thaa hna wathebone kö lo neköi cea i nekönatr matre tro la itre keme me thine a ati nyëne ezi angatr.
◼ Itre Nyine Troa Wange Hmaca: Loi e troa sija la sine pepa hna hape, Veuillez suivre l’intérêt (S-43) nyine hamë ithuemacanyi göne la itre atr ka hetre hni ne ajan thupene la hna sine la kovasio ne distrik. Loi e tro la itre ka cainöj a mekune troa xome la caas maine lue sine pepa cili, göne matre troa iwai hmaca. Thupene la hna sija apexejene lai sine pepa, ijije hi tro nyipunie a hamëne lai, ngöne la hna xomi tus maine pena kowe la seketere ne la ekalesia ngöne la kola bëeke koi hnalapa.—Wange ju la Huliwa Ne Baselaia ne Febuare 2005, g. 6.
◼ Itre Hna Hnëkë Göi Uma Me Loto: Kola qaja hnei Ite edomë 3:27, ka hape: “The cipane kö la loi e ate kë ewekën, e atein’ eö troa kuca.” Nemene la ewekë ka loi me ka ijije tro epuni a kuca ngöne la kovasio? Tru elanyi la itre trejine ka isa traqa qa ngöne la itre hnalapa i angatr matre troa sine la Kovasio. Loi e troa canga wange göi uma me loto. Maine jë hetre ka aja ixatua göi loto maine göi uma hnene la itre trejine ka qatre hë, me itre sine wezipo, me itre ka pionie hut, me itre xane ju kö. Ame la pane hnëqa ne la itre sinee, tre, ene la troa thupëne la itre atr ka tune lai. (1 Tim. 5:4) Ngo maine thaa ijiji angatre kö troa kuca lai, tro pena la itre trejine keresiano a hamë ixatua. (Gal. 6:10) Loi e troa xecie hnyawa kowe la itre trejine ka xomiujine la gurup, laka, ase hë lo itre ka aja ixatua a hnëkë hnyawa thatraqane la kovasio.
◼ Hna hnëkëne la itre pepa ne sipo hnalapa thatraqane la itre trejine ka sine la kovasio. Loi e troa angatr a nyialiene la itre pepa i angatr, me canga hamëne itre ej. Tro la Kometr Ne La Huliwa Ne Cainöj Ne La Ekalesia a goeëne la itre trejin ka ijij. Ketre hna amekötine lai thatraqane la itre trejin ka pë ethane la mel, memine fe la itre nekö i angatr ka loi la thiina.