Itre Kovasio Ne Distrik—Ketre Ijine Tro Sa Hmi Cememine La Madrin
1. Nemene la itre ewekë ngöne la itre pui ne xeni ka tru e Isaraela ka ceitu memine la itre kovasio ne distrik enehila?
1 Ame ngöne la nöjei macatre, hna tro pala hi Ierusalema eë hnei Iosefa me Maria me itre nekö i nyidro, me itre xaa atr kö, matre troa sine la itre pui ne xeni ka tru. Ame ngöne la itre ijine cili, tro angatr me itre xaa sine hmi angatr a nue la itre huliwa hnei angatre hna kuca o drai, matre troa wanga atrune hnyawa la itre ewekë ne la ua ka sisitria kowe la mele i angatr. Kola aijijë angatr hnene la itre pui ne xeni cili troa sine thele la itre ewekë me ithawakeune la aqane hnimi angatre hnei Iehova, me ce ithanatane la Trenge Wathebo i Nyidrë. Ketre tro mina fe la itre kovasio ne distrik së ka troa traqa, a aijijë së troa hmi koi Iehova cememine la madrin.
2. Nemene la nyine tro epuni a hnëkëne matre troa sine la kovasio ne distrik ka troa traqa?
2 Nyipi Ewekë Troa Hnëkë Hnyawa: Tro la hnepe lapa i Iesu a trongëne la 200 lao kilomet qaa Nazareta. Ngacama thatre kö së la etrun la itre trejine me Iesu, ngo easa mekune la trenge catre hnei Iosefa me Maria hna kuca me aqane eköthe amë la tronge i angatr. Hane kö epuni hnëkëne amë la itre ewekë matre troa hane sine asë la köni drai ne la kovasio ne distrik ka troa traqa? Maine jë nyipi ewekë tro epuni a xomi ijine mano, maine troa ithanata memine la maseta i epun, maine pena troa qaja kowe la itre ka hamë ini kowe la itre nekö i epun, laka, thaa nyudrene kö a troa ini. Hapeu, hnei epuni kö hna xomi göhne i epun ngöne otel, maine sipo hnalapa pena? Ijije kö tro epuni a xatuane la ketre atrene la ekalesia ka hetre ejolene troa sine la kovasio?—1 Ioane 3:17, 18.
3. Tune kaa la aqane aijijëne hnene la itre pui ne xen ka tru e Isaraela la troa ce porotrike me ithuecatrekeu?
3 Ketre Ijine Troa Porotrik Me Ithuecatrekeu: Drei la ketre manathithi ka tru hna aijijëne hnene la itre pui ne xeni ka tru e Iudra, ene la troa ce porotrike memine la itre hlue i Akötresie me ithuecatrekeu! Thaa luelue kö së, laka, hnene la hnepe lapa i Iesu hna xomi ijine troa ce lapa memine la itre sinee ka hekö hë angatre iatre. Hna aijijë angatre mina fe hnene la itre ijine cili troa hetre itre xaa enehmu thene la angetre Iudra me angetre ethen ka ce traqa me angatr e Ierusalema maine ka lapa pena ngöne la traone cili.
4. Tro sa olene tune kaa la aqane casi së, easë itre trejine Keresiano?
4 Ame la ketre kepin matre kola könë së hnene la hlue ka nyipici me ka inamacan troa ce traqa itronyi me ce drenge la itre cainöj hna cile fë ngöne la itre kovasio ne distrik, tre, ene la tro sa ithuecatrekeu; ngo ijije tro hi la hlue a fejane la itre ithuemacanyi cili ngöne la itre itusi së. (Heb. 10:24, 25) Haawe, loi e tro sa hnëkë hnyawa matre troa canga traqa ngöne la hna kovasio, me madrine troa ce traqa itronyi memine la itre xaa trejine me easë, uti hë la kola thuemacanyi së hnene la ciaman troa isa lapa, ke, kola troa nyiqaane elone la miuzik. Ame ngöne la ijine xen, kola ithuecatre koi së troa lapa ngöne la hna kovasio matre troa ce lapa me ce porotrike memine la itre atr ka lapa ezi së. Ame la aqane casi së, easë itre trejine Keresiano, tre, celë hi ketre ahnahna qaathei Iehova nyine tro sa olene pala hi koi Nyidrë.—Mika 2:12.
5. Nemene la ka troa xatua së troa kepe thangane la porogaram?
5 Ketre Ijine Xomi Ini: Qaane lo Iesu a nekönatr, hnei nyidrëti pala hi hna xome lo itre pui ne xeni ka tru göi troa atrepengöne la Tretretro i nyidrë e koho hnengödrai. (Luka 2:41-49) Nemene la ka troa xatua së me hnepe lapa së troa kepe thangane la itre cainöj hna troa hamën? Loi e tro sa lapa hnyawa me neëne troa ithanata menu ngöne la nöjei götrane la porogaram. Thaa tro pi kö sa nue la telefone së, maine ketre ewekë pena troa ajolë së maine itre xane pena. Loi e tro sa goeëne hnyawa la atre cile fë la cainöj, me xomi not. Loi e tro mina fe sa ce lapa memine la hnepe lapa së, me thupëne laka, kola hane drenge hnyawa hnene la itre nekö së. Ame e jidr, loi e tro sa xomi ijine troa ce ithanatane me angatr la itre mekun ka ketri së.
6. Nemene la nyine tro sa hnehen göne la aqane troa heetr me isej?
6 Aqane Heetr Me Isej: Ame lo itre trehnyiwa ka saleme e kuhu ezine gojeny, tre, canga wanga atrehmekune hi angatr la hnepe lapa i Iesu memine lo itre xaa hlue ne Iudra ka traqa me tro qa hna sine la itre pui ne xeni ka tru, hnene la itre ixetre i angatr, laka, hna nyi hane la itre ëzin nge hna ami drohnu ka mamadraixötre hune itre ej. (Num. 15:37-41) Ngacama thaa kolo kö a xetrëne hnene la itre Keresiano la itre ixetr ka ketre pengöne kö, ngo kola hlemu loi hnei angatr jëne la aqane heetre i angatr ka qahmihmi me ka porop. Loi e tro sa wanga atrune hnyawa la aqane heetre së ngöne la easa traqa me tro qa ngöne la hna kovasio me ngöne fe la traon. Ngacama easa saze hna heetr thupene la porogaram, ngo loi e tro pala hi a atrune la atresiwa i Iehova hnene la aqane heetre së, me amë fe lo badge ne la kovasio. Ame ngöne la götrane cili, tro ha aisapengönë së memine la itre atr ka thaa hmi kö koi Iehova, nge tro hë lai a hetre thangane ka loi thene la itre atr ka goeë së.
7. Pine nemene matre loi e tro sa wange maine ijije tro sa saen troa ixatua ngöne la hna kovasio?
7 Kola Aja Atr Ka Ixatua: Kola ajane tro la itre atr ka nyimutre a ixatua matre troa tro loi hnyawa la kovasio. Hapeu, ijije kö tro epuni a saen matre troa hane ixatua? (Sal. 110:3) Ketre igötranene la huliwa ka hmitrötr la troa huliwa ngöne la itre hnë kovasio, nge ketre jëne cainöje mina fe kowe la itre atr. Hnene la atre cilëne la iuma ne kovasio hna haine la aqane nyidrawane hnyawa la iuma hnene la itre atr ka hamë ixatua; hnei nyidrëti hna cinyihan, ka hape: “Eni a ajane troa olene koi nyipunie la hnepe ijine celë ka sisitria hnenge hna melën. Hnenge pala hi hna drenge ka hape, ame la Itretre Anyipicine i Iehova, tre, ketre nöje ka ketre pengöne angatr hnene la aqane nyidrawane hnyawa angatr la itre iuma, ene laka porope catre ju kö hune lo qaan. Hnei nyipunie memine la organizasio i nyipunie hna amingömingöne la hnë celë thatraqane la itre atrene la nöje i nyipunie, nge atraqatre la madrine hun troa atre la itre atren ka ce huliwa nge ka lolo thiina.”
8. Nemene la itre ijine ka sisitria tro sa cainöj kowe la itre atr ka mele ngöne la traon hna hnen la kovasio?
8 Itre Ijine Ka Sisitria Troa Cainöj: Ame ngöne la traon hna hnen ngön la kovasio, tre, ala nyimu la itre atr ka troa goeëne la aqane heetre me iseji hnyawa së, memine fe la itre badge hne së hna amë; maine jë kolo lai a aijijë së troa qeje pengöne koi angatr la kovasio. Thupene la porogaram, hnene la ketre nekönatr ka foa lao macatre hna xome trongëne kowe la ketre hnë xen la ketre itus hna xötrei kapa ngöne la hna kovasio; hnei nyën hna amamane ej kowe la ketre föe ka huliwa e cili. Celë hi ewekë lai ka upe la keme me thine ne la nekönatr trahmany troa könën lai föe troa hane sine la kovasio.
9. Tro sa nyitipune tune kaa la aqane wanga atrune la hnepe lapa i Iesu la itre hna amekötine hnei Iehova ngöne la götrane la ua?
9 Hnene laka kola aijijëne lo angetre Iudra hnene la itre pui ne xeni ka tru e Isaraela troa ce madrin me ce atrepengöi Iehova, ene pe kola ajane catrëne la itre ijine cili hnei angatr. (Deu. 16:15) Atraqatre la madrine ne la hnepe lapa i Iesu troa huujëne la itre ewekë i angatr matre troa hane sine me kepe thangane la itre ijine cili. Tu së mina fe, laka, easa wanga atrune hnyawa la itre kovasio ne distrik së, me goeëne itre ej ceitu me ketre ahnahna qaathene la Tretretro së e koho hnengödrai nge ka ihnim. (Iako. 1:17) Enehila hi la ijine tro sa hnëkë thatraqane la ijine ka sisitria cili ngöne la macatre, ene la troa hmi koi Iehova cememine la madrin!