Huliwane Hnyawa Jë La Itre Itusi Së
1. Tro sa xome tune kaa la thiina i Iesu, ene la troa hetre hni ne ole kowe la itre hna amekötine hnei Iehova?
1 Thupene la hnei Iesu hna kuca la ketre iamamanyikeu, ene la troa thuane la ka ala nyim, hnei nyidrëti hna xome hnyawa pë hë la itre munën. (Mat. 14:19-21) Ame la aqane amamane Iesu la hni ne ole i nyidrë kowe la hnei Iehova hna hamën, tre, celë hi lai ketre tulu ka lolo koi së troa “olene pala hi,” hnene la hna huliwane hnyawa la nöjei hna amekötine hnei Iehova jëne la “ate thupe nyipici.”—Kol. 3:15; Luka 12:42; Mat. 24:45-47.
2. Tro sa neëne tune kaa troa aluzine la itre zonal?
2 Itre Zonal: Maine thaa hne së kö hna tro fë la itre zonale së, ijije tro sa aluzine itre ej. Maine nyimutre la itre munën, loi e tro sa acone la etrun la itre zonal hne së hna komadën. Hapeu, tune kaa fe la itre zonal ka hekö hë? Ngacama itre zonal ka hekö hë itre ej, ngo ka tru alamekene pala hi la itre hna cinyihane cili kowe la itre atr. Maine tiqa pala ha hnei itre zonale së ka hekö, haawe, maine jë ijije tro la atre thupëne la huliwa ne cainöj maine ketre qatre thup pena, a xatua së troa maca ngöne la aqane troa tro fë itre ej.
3, 4. Nemene la itre mekun nyine tro sa hnehene ngöne la easa xomi itus ngöne la Uma ne Baselaia?
3 Itre Xaa Itusi Së: Maine kola qaja la itre itusi nyine troa tro fë ngöne la treu, loi e troa pane wange ngöne la itre hnalapa së, ka hape, hetrenyi kö së la itusi cili, qëmekene troa xome lai ngöne la Uma ne Baselaia. Loi e tro sa xome la itre itus ka ijij tro sa tro fë ngöne la wiik nge maine pë hë, tro sa bëeke hmaca kowe la atre hamë itus ngöne la Uma ne Baselaia, matre troa xome itre xaa itus.
4 Ame pena göne la itre itus thatraqai së kö, laka, loi e tro hi sa sipone hi la ka ijij. Loi e tro sa cinyanyine la ëje së ngöne la götrane hna hnëkën thatraqane lai; celë hi matre, maine tro la itusi së a paatr, tre, ijije hmaca ha tro ej a bëeke koi së. Maine easa huliwane la CD-ROM Watchtower Library, nge hne së pë hë hna amë ngöne la hnalapa së la itre zonal, haawe, thaa nyipi ewekë kö tro sa sipone hmaca la itre volim ne La Tour de Garde me Réveillez-vous !
5. Nemene la nyine tro sa lapa mekun ngöne la easa tro fë la itre itusi së?
5 Itre Itusi Hna Tro Fë: Loi e tro sa catre troa tro fë la itre itusi së kowe la itre atr ka hetre hni ne ajan. Lapa mekune ju së, laka, hnëqa së lai troa pane nyithupene la itre jia ne huliwa cili ngöne la huliwa së ne cainöj. Ame la easa hamëne la ketre zonal kowe la itre atr ka hetre hni ne ajan, tre, thaa tro pi kö sa cil troa thuemacanyi angatr, laka, ijiji angatre mina fe troa sajuëne la huliwa celë hna kuca e cailo fen jëne la itre ahnahna hnei angatr hna hamën.
6. Pine nemene matre ka nyipi ewekë catr koi së la itre itusi së, nge nemene hë la aqane tro sa huliwane itre ej?
6 Nyipici laka, hnei Iesu hna kuca la ketre iamamanyikeu ngöne la nyidrëti a thewe xen ngöne la götrane ne la ngönetrei kowe la itre atr, ngo nyimutre kö la itre ijine nyidrëti a thuane la itre atr ngöne la götrane ne la ua. Öni Iesu, ka hape: “Tha tro kö a mele la ate hnei areto hmekuje hi ngo hnene la nöjei tenge ewekë asë ka xulu qa ngöne la ine ula i Akötesie.” (Mat. 4:4) Kola inine hnene la itre itusi së la itre nyipici qa hnine la Tusi Hmitrötr ka nyipi ewekë catr, göi troa hetrenyi la mele ka thaa ase palua kö. (Ioane 17:3) Haawe, thaa tro pi kö sa aluzine itre ej!