Huliwaane Hnyawane Jë Së Lo La Tour de Garde Me Réveillez-vous!
1 Nyipi ewekë catre la lue zonale së La Tour de Garde me Réveillez-vous! nemene kepin? Pine laka, tro la nyipici, ene la itre alien’ej a hamëne la itre ixatua ngöne la ua, ixatua ka troa hetre thangane ka loi me ka tha ase paluakö, kowe la mele ne la itre atr enehila. Eje hi laka, alanyimu la itre atr ka wangacone la enyipiewekëne la itre ewekë ne la ua, maine thatre pena kö angatre la aqane troa hetrenyi lai. Ketre hnëqa së lai troa nyitipu Paulo aposetolo, ene la troa xatuane la itre atr troa fe la itre lue meke i angatr. — Mat. 5:3; Itre Hu. 26:18.
2 Loi e tro së a hetre mejiun, me hnëkë hynawa: Ngöne la götrane ne cainöje i epun, ke, hetre itre atr hna aceitunëne me mamoe, angatr’a kapa la nyipici. Itre xan’a ajane troa xatua angatre troa e la itre zonal. Celë hi matre, nyipi ewekë troa hetre mejiun, me xatuane la itre atr troa hane kapa la La Tour de Garde me Réveillez-vous! Loi e tro së a ce xome pala hi la itre zonal, matre hamëne itr’eje ngöne la nöjei ijin, ketre tune fe göne la itre xaa itus.
3 Nemene la nyine tro së a kuca matre troa hetre thangane la huliwa së, ene la troa hamëne la itre zonal? Qëmekene la troa tro fë itr’ej, ke, nyipi ewekë tro së a pane e hnyawa itr’ej. Pëkö xou nge atraqatre la madrine së troa hamëne itr’ej, e hne së hna atre hnyawa la aliene la itre zonal. Loi e tro pala hi së a mekune lai ngöne la easë a xötrei kapa. Eje mina fe laka, tro së a atre hmekune me iëne la itre xaa mekune ka ihmeku memine la aja ne la itre atr hne së hna troa cainöje kow. Loi e tro së a isa hnyinge ka hape: “Tro ni a amamane koi drei la hna cinyihane celë matre ketr la hni angeic? Maine föe, ketre thöth, maine ketre atr ka thele mani? Tro jë kö la mekune celë a ahlëne la ajane la ketre ka ini, maine ka faipoipo hë, maine atr ka thele pengöne la aqane angazone la fen?” Troa hetre thangane la itre zonale hne së hna troa hamëne pine laka hetre madrine së fe troa atre pengöne itr’ej.
4 Huliwaane hnyawane jë lo itre zonale hnapan: Mekune kö së troa tha nyipi ewekëne la itre zonal La Tour de Garde me Réveillez-vous! ngacama tha ase së kö hamëne itr’ej. Ngacama casi maine lue treu hë ne kapa së, ngo tha tro jë kö a wangacone itr’ej, pine laka ame la alien, ke, ka ihmeku pala hi memine la aqane mele enehila, matre ijije pala hi troa hane hamën. Maine hne së hna majemine troa xawane, ngo tha huliwaane pe, ke, kola amamane laka tha kapa madrine kö së nge tha nyipiewekëne kö së itr’ej. Eje hi laka, ame la aliene la itre zonale, ke, nyipici, celë hi matre, kola ahlëne me atrotrohninëne la itre atr troa hane kapa la itre xeni ne la ua. Hune la troa xeene me thëthëmine la itre zonal, ke, loi e tro së a catre troa hamëne mekötiine kowe la itre atr ka ajan, maine tro pena amë ngöne la ketre göhnë ka nango sihngödre maine patre kö la angetrekë hnalapan.
5 Tro la itre atr ka e la Réveillez-vous! a trotrohnine me nyipiewekëne la itre ewekë ne ua. Ame La Tour de Garde, ke, ketre jia ka sisitria, qa hnine la trengamo ne la ua hna hnëkëne kowe nöje i Iehova. Mingöminge me ihmeku la aqane cetro la lue zonale celë, nge atraqatre la thangane luej koi së ngöne la huliwa ne cainöje trotro.
6 Eje hi laka, maine hne së hna huliwane hnyawaane la itre zonale ngöne la nöjei ijin, ke, tro hë së a öhne la thangane itr’ej kowe la itre atr ka hetre aja ngöne la götrane ne la ua. Qangönelai, nyipi ewekë tro së a hetre mejiune me hnëkë hnyawa, me cainöje trotro pala hi. Maine itretre cainöjëne së la Maca ka Loi, ke, tro pala hi së asë a huliwaane hnyawa la lue zonal La Tour de Garde me Réveillez-vous!