Loi e Troa Cainöje Fë La Itre Zonal

1, 2. Tune kaa la aqane ketr la mele ne la itre atr hnene la lue zonal Réveillez-vous ! me La Tour de Garde ?

¹ “Ka lolo catr, ka ijij, nge ka ithuecatr.” “Pëkö zonal ka ithuecatr ka tun.” Itre trenge ewekë la ka amamane hnyawa la mekunane la itre ka e la zonal La Tour de Garde me Réveillez-vous ! e cailo fen. Eje hi laka, kola mama laka itre jiane huliwa ka sisitria catr la itre zonale së, matre troa ketr la “nöjei ate asëjëihë” hnene la maca ka loi.​—1 Tim. 2⁠:⁠4.

² Hnene la ketre thupëtresij ka huliwa thele manie hna kapa la ketre zonal Réveillez-vous ! ka ithanatan la ketre mekun hnei nyidrë hna ajan troa e. Ame hë thupen, nyidrëti a e la zonal ka ce tro memin, ene La Tour de Garde, kola upi nyidrë troa pane waipengöne la ini hnei nyidrëti hna lapaune kow pala hi, ene la Tirinite. Ene pe hna ahlën la aja i nyidrë. Ame hë ngöne la sikisi lao treu thupen, hna bapataiso nyidrë. Ame la ketre trahmany, tre, hnei nyidrëti pala hi hna kapa la itre zonal ngo thaa hane kö nyidrë e itre ej. Ame pena föi nyidrë, tre ka xele ma dreng la Itretre Anyipici Iehova ngo ka e pe la itre zonal hna hamën kowe la föi eahlo. Hna ketr la hni eahlo hnene la hna thingehnaean hnei Tusi Hmitrötr ngöne la paradraiso e celë fen ka tiqa hnene la itre atr ka meköt. Haawe, hetre thangane ka loi, pine laka eahlo me nekö i eahlo trahmany, memine fe la ketre trejine me eahlo föe, itre hlue i Iehova hë angatr enehila.

3. Nemene la eloine la troa ce tro fë la lue zonal?

³ Ce Tro Fë Jë Lue Ej: Tune lo hna amaman hnene lo itre ceitun, thatreine kö tro sa atre, maine troa e hnene la ketre atr la itre zonale së, maine nemene jë pena la ka troa ahlën la aja i angatr. (Ate cai. 11⁠:⁠6) Qa ngöne lai, ka loi e troa ce hamën la lue zonal La Tour de Garde me Réveillez-vous ! ngacama hne së hi hna amaman la caas ngöne la easë a nyiqaane ithanata. Ame ngöne la itre xaa ijin, maine jë ka loi e troa amaman la itre zonal ka nyimutre nge ka isapengön ngöne la easë a iwai hmaca.

4. Tune kaa la aqane tro sa eköth la huliwa ne tro fë zonale së?

⁴ Ka lolo catr troa xome la caa drai ngöne la wiik matre troa tro fë la itre zonal. Ame ngöne la Calendrier des Témoins de Jéhovah 2005, hna amë la nöjei Mecixen me hëne ka hape “Drai Ne Tro Fë Zonal.” Nge pine laka isapengöne kö la itre nöje së me isa aqane mele së, maine jë tro la itre xan a xome la ketre drai matre troa tro fë la itre zonale së. Hapeu, hne së kö hna hane amë ngöne la porogarame ne cainöje së ngöne la wiik, la caa drai ne tro fë zonal?

5. Nemene la itre ijine ka ijij nyine tro sa wangatrune pala hi, matre troa hamën la itre zonal, nge nemene la ka troa xatua së troa kuca la ewekë cili?

⁵ Loi e Tro Sa Ahnith Amë La Itre Hne Së Hna Ajan Troa Eatrën: Maine troa ahnith amë la itre hne së hna isa ajan troa kuca ngöne la treu, ene la etrune la itre zonal nyine hamën, haawe, atreine hi troa xatua së troa nyipiewekëne hnyawa la huliwa cili. Hapeu, hetre atre kö hnei epuni hna tro fë zonale lapaa kow? Epuni kö a hane hamë zonale kowe la itre atr hnei epuni hna iöhnyi memin ngöne la hna cainöje trootro? Epuni kö a hane hamën la itre zonal e cahu gojeny, me ngöne la itre götran hna thele mani, me ngöne la itre götrane gaa tru atr? Hane kö epuni xometrongën la itre zonal ngöne la itre hnei epuni hna tro, me ngöne la epuni a itö, me ngöne la itre hnei epuni hna isa pui? Thele jë la nöjei aqane troa xatuan la itre xaa atr troa hane kepe thangane ka loi qa ngöne itre zonale së La Tour de Garde me Réveillez-vous !

6. Nemene la aqane tro sa huliwane hnyawa lo itre zonal hne së hna xeene amë?

⁶ Loi e tro mina fe së a hetrenyi la mekune hna ajane troa eatrën, ene la troa hamën lo itre zonale hne së hna kapa ha e cili lo. Nge maine thaa hne së kö hna hamën la itre zonal ngöne la treu, maine cili lo lue numero ka ihmeku memine la treu ne amamane lue ej, ngo thaa ka luuzi kö itre ej ke, ka loi pala hi la itre ithuemacanyi e hnin. Hamëne jë itre ej kowe la itre atr ka ajan troa e itre ej. Ame kowe la itre atr itre milio la etrun, tre ame la lue zonal La Tour de Garde me Réveillez-vous ! tre celë hi “trenge ewekë . . . ngöne la ijin.” (Ite edomë 25⁠:11) Loi e tro sa xome itre ej matre troa xatuan la itre xaa atr itre milio la etrun, matre tro angatr a hane atre Iehova me nyihlue i Nyidrë.