Itre Zonale a Qaja La Baselaia
1 Hlemu catre së Itretre Anyipici Iehova, pine laka, easë a catre cainöjëne la Baselaia i Akötresie. Hetre thangane catre la itre zonale së La Tour de Garde me Réveillez-vous!, thene la itre atr, itre milio la etrun, ngöne laka, kola xatua angatre troa atre la itre mekune i Akötresie. Itre eje a qatrenge la maca ka loi, ka ithuemacanyine la sipu mejiune thatraqane la itre atr, ene la Baselaia i Akötresie e hnengödrai.
2 Kola troa hamë ixatua hnene la itre zonal, thatraqane la itre jole hna cile kow hnene la itre atr—ene la itre jole ka eje ngöne la itre mekune i angatr, memine la aqane ce mele i angatre me itre xaa atr, me ngöne la götrane la ua. Kola mama ngöne la nöjei götrane laka, kolo pala hi a ngazo catre la aqane ujë ne la itre atr, nge kola kaqa fe la aqane mele ne la fami, qa ngöne lai, kola hamëne koi angatre hnene la itre zonal, La Tour de Garde me Réveillez-vous!, la ixatua ngöne la aqane troa trongëne la itre trepene meköti ne la Tusi Hmitrötr, matre nyine thupëne hnyawa la mele i angatr. Celë hi matre, loi e troa hetrenyi the së la ajane me madrine troa tro fë la itre zonal, me hane abone fe la itre atr ngöne la itre treu eiperem, me mei.
3 Hetrenyi e Hnine Itre Ej La Hna Ajane Hnene La Itre Atr: Thaa sihngödri kö la lue zonal, La Tour de Garde me Réveillez-vous! kowe la itre asë e celë fen, pine laka, hna ujëne lue eje ngöne la nyimu qene hlapa hna trotrohnine hnei angatr. Qa ngöne lai, atrepengöne hnyawa hi la itre atr la itre zonale së. Hanawange cahu itre xaa kepine matre kola pi e itre eje hnene la itre atr:
◼ Pine laka, itre zonale ka pë ethan, nge ka qaja la nyipici, haawe, kola amamane la eisapengönene la loi memine la ngazo.
◼ Itre eje a hamëne la mejiune kowe la ketre paradraiso ka troa xulu, ewekë hna thingehnaeane hë hnei Akötresie, laka, troa acile hnene la Baselaia i Nyidrë.
◼ Nyimutre catre la itre topike ka isa pengöne hna ithahnatane hnine itre ej, itre mekune hna pi atre hnene la nöjei atr asë, ngacama isa kö la pengöne memine la aqane mele i angatr.
◼ Thaa qea menu kö la itre hna cinyihan, nge hetre ini hna xome qa ngön, nge hetre nyine jele nyipicin, ketre, thaa ka iwangatrehmekunyi atr kö, nge ka sajuëne la itre trepene meköti Akötresie.
◼ Canga hetre ajane hi the së troa goeën, hnene laka, nyimutre la itre iatr ka lolo, nge ketre, hmaloi troa e itre ej, pine laka, thaa jole kö la aqane cinyanyine la itre mekun.
4 The Hnöthe Kö La Aqane Troa Tro Fë Itre Ej: Troa hetre thangane ka loi la tro fë zonale së, e hne së hna hnëkëne hnyawa la itre aqane nyiqaane ithahnata së, me itre hawa së, me amekötine la itre nyine kuca thatraqane la huliwa ne cainöj. Hetrenyi la itre mekune ka lolo catre hna hamëne ngöne la itre Huliwa ne Baselaia ne semitrepa 1995 me okotropa 1996, loi e troa wange hmaca, me trongëne itre ej.
5 Loi e Troa Atre Hnyawa La Aliene La Itre Zonal: Ame ngöne la epuni e la ketre zonal, nyipi ewekë tro epuni a mekune la itre atr ka troa xome ej. Thele jë la itre mekune ka ijij, maine itre xötre pena qa hnine la Tusi Hmitrötr, nyine tro epuni a ce xome memine la aqane nyiqaane ithahnata i epun. Mekune ju fe la hnyinge nyine tro epuni a xom, ngöne la epuni a xötrei iöhnyi memine la itre atr, me thele troa ahlëne la aja i angatre kowe la topik.
6 Loi e Hmekune La Itre Atr La Aqane Nyiqaane Ithahnata: Loi e troa hnëkëne la ketre aqane nyiqaane ithahnata ka thaa jole e troa trotrohnin, nge ka ihmeku memine la aqane mele ne la itre atr hna troa iöhnyi memin, maine ketre trahmany, me ketre föe, me ketre qatre pena, maine ketre thöth, me ketre atr hne së hna atre, maine ketre trehnyiwa pena.
7 Loi e Hnëkë Pala Hi Së Troa Tro Fë La Tour de Garde Me Réveillez-vous! : Atreine hi tro së a xometrongëne la itre zonale së ngöne la itre gojenyi ne easë a troa ihamë, me ngöne fe la easë a troa itö, hnene laka, hmaloi troa amë itre eje hnine la watreng, me hnine la ketre watrenge nyine fena trongën, maine hnine la poosi ne itrauzizi së. Hamëne ju itre eje kowe la itre sinee së, me itre ka lapa easenyi së, me itre sine huliwa së, me itre sine ce ini me easë, maine itre ka ini së pena. Loi e troa sa la caa drai ngöne la wiik, matre troa tro fë la itre zonal.
8 Loi e Troa Wangatrune Hnyawa Hne Së La Itre Zonal: Thaa tro jë kö a gufa la aliene la itre zonal. Thaa hnene kö laka, ka hekö hë la itre xaa zonal, ke thaa nyipi ewekë fe hë la maca hnene itre eje hna qatreng. Ketre, maine tro së a thele troa pane tro fë asë la itre zonale hne së hna kapa, haawe, thatreine kö troa hetre hna amë xawane pe ngöne la ita ne ati itus.
9 Hetre Thangane La Hna Cainöje Ngöne Nöjei Ijin: Sisitria la aqane troa tro fë zonale celë, ke nyimutre catre hna troa hamëne kowe la itre atr. Ame la itre xaa ka cainöj, angatre a thele troa cainöje ngöne la nöjei ijine angatre a troa itö.
10 Lolo Mina Fe Troa Cainöje Ngöne Itre Magazë: Xalaithe hi la itre magazë ka pë atren. Ala nyimu la itre ka huliwa hnine la itre magazë, ka loi thiina, nge nyimutre catre angatr, itre ka ajane troa xome la itre zonal. Xome jë la itre hna cinyihane ka ihmeku memine la ketre magazë hnei epuni hna troa wang.
11 Hetre Thangane Fe La Itre Gojenyi Ne Zonal: Pine laka, kola alua kapa la itre zonale ngöne la treu, haawe, thaa jole kö e troa traqa fë pala hi la itre zonale ka hnyipixe kowe la itre atr ka e itre ej, me amamane koi angatre la itre hna xötrei kapa. Loi e tro pala hi së a iwai hmaca, thaa göi tro hmekuje kö hamë zonal, ngo göi tro fe a akökötrene la aja ne la itre atr kowe la Tusi Hmitrötr. Sisitria fe la itre gojenyi ne zonal, celë fe itre jëne troa etidi memine la itre atr.
12 Catre Pi Ngöne La Treu Eiperem Me mei: Hetrenyi hë la mejiune thene la itre atr, itre milio, ka madrine troa e la lue zonal, La Tour de Garde me Réveillez-vous! Pine laka, hetre thangane ka lolo itre eje ngöne la kola cainöjëne la Baselaia, haawe, thaa tro pi kö së a thëthëhmine troa xometrongëne itre ej, me hamëne itre eje ngöne la nöjei ijin. Epi tro la itre treu eiperem, me mei a lue treu ka sisitria koi së isa ala caas, ngöne la kola troa tro fë la itre zonal!