Atrunyi Iehova Jë o Drai
1. Nemene la aja ka catre thene la itre hlue i Akötresie, nge pine nemen?
1 Hnei Davita joxu hna qaja amamane la aja ka catre thei nyidrë troa atrunyi Iehova “o drai” uti hë epine palua. (Sal. 145:2, 7, 21) Hetrenyi mina fe së la itre nyipi kepine matre troa atrunyi Iehova o drai.—Sal. 37:10; 145:14, 18; 2 Pet. 3:13.
2. Tune kaa la aqane tro la itre fami a atrunyi Iehova o drai?
2 Troa Atrunyi Iehova Ngöne La Hnalapa Së: Hetrenyi së la itre itus ka ithuecatr göi troa porotrikëne la itre mekune ngöne la ua, tune la easa ce wange la topike ne la drai, me ce ini tusi memine la hnepe lapa së, me hnëkëne la itre icasikeu ne la ekalesia. Nyimutre la itre fami ka majemine ce traqa itronyi ngöne la hnepe hawa ne la drai, maine jë troa ce xen. Ene pe itre ijine ka ijije lai troa porotrike me atrunyi Iehova. Ame la itre mekune hna ithanatane me eköthe hnene la itre keme me thin, tre, ketre ixatua fe lai troa hiane la itre nekö i angatre ngöne “la ini me ihaji ne la Joxu.”—Efe. 6:4; Deu. 6:5-7.
3. Nemene la hna aijijë së troa kuca ngöne la easa ce cainöje maine ce icasikeu pena memine la itre trejine me easë?
3 Troa Atrunyi Iehova Cememine La Itre Trejin: Ame la easa ce cainöje me ce icasikeu memine la itre trejine me easë, tre, itre ijine lai ka ijije matre troa atrunyi Iehova. (Prov. 15:30; Phil. 4:8; Heb. 13:15) Thaa jole kö koi së troa qaja amamane la hni ne ole së kowe la elolone la thiina i Iehova ngöne la easa ce ithanata me angatr, ke, caasi hi la ka iothekeu së asë, ene la ihnimi së koi Iehova.—Sal. 106:1.
4. Eue la itre ijine ka ijije koi epun troa atrunyi Iehova?
4 Troa Atrunyi Iehova Ngöne La Kola Ithanata Me Itre Ka Thaa Hmi Kö: Ngacama thaa ijiji së kö troa cainöje trootro o drai, ngo ijije hi troa ketr la hni ne la itre atr ka menyik me thue mejiun koi angatr, e tro sa qeje Iehova me itre aja i Nyidrë kowe la itre sine huliwa së, me itre sine ce ini së me itre xane ju kö. (Sal. 27:14; 1 Pet. 3:15) Hna cainöje hnene la ketre sör kowe la ketre sine lapa i nyiidro hnine la avio. Hnene laka, hna akeukawane la hni ne lai atr ka dreng, me thuecatre koi eahlo, ene pe hamëne pi eahlo la aderesi eahlo me numero ne telefon matre tro hmaca kö nyidroti a iöhny. Kolo pala hi elë la etrune la ngazo me akötre ngöne la fen, nge kolo mina fe a catre “tro fë la loi” hnene la nöje i Iehova kowe la itre ka pi dreng. Ewekë lai ka thue mejiune koi angatr, me aijijë angatre troa hane atrunyi Iehova.—Is. 52:7; Rom. 15:11.
5. Pine nemene matre aja së troa atrunyi Iehova, nge nemene la hna eatrën jëne la ewekë cili?
5 Drei la madrin atraqatre thei Iehova troa drenge la aqane atrunyi Nyidrë o drai hnene la itre hlue i Nyidrë! Tune la itre ewekë hna xupe hnei Iehova ka lapa xötreithi së, easë fe a atrunyi Nyidrë o drai hnene la hnaewekë së, ngöne la itre hnalapa së, me e hnine la ekalesia, me ngöne la easa ithanata memine la itre ka thaa hmi kö, nge ka thaa atrunyi Nyidrëti pala kö.—Sal. 19:1-4.