Aqane Troa Cile Kowe La Itupath Celë, Ene La Troa Cainöj Kowe La He Ne La Fami
1. Nemene la ka nyipi ewekë enehila matre troa eatrëne la itre aja ne la Baselaia?
1 Hnene laka kola kökötre catr la huliwa ne cainöjëne la Baselaia ngöne la itre drai tixenuë celë, ene pe kola aja trejine trahmanyi ka maca ngöne la götrane la ua troa elemekene la huliwa cili. (Mar. 4:30-32; Ite Hu. 20:28; 1 Tim. 3:1-13) Ngo ame ngöne la itre xaa götran, tre, thaa ala nyimu kö la itre trahmanyi me itre föe ka kapa la maca ne la Baselaia. Ame ngöne la itre xaa nöj, kola mekun hnene la itre trahmany, ka hape, hnëqa ne la föe troa kuca la itre huliwa ne ua e hnine la hnalapa me inine la itre nekönatr ngöne la götrane la ua. Tune kaa la aqane tro sa xatuane la itre trahmanyi troa atrehmekune laka nyipi ewekë tro angatr a eatrëne la aja i angatr ngöne la götrane la ua, me hane sajuëne me easë la nyipi hmi?
2. Nemene la thangane la hnei Paulo me Peteru hna cainöj kowe la itre he ne la fami?
2 Catre Pi Troa Cainöj Kowe La Itre He Ne Fami: Ame la kola kapa la nyipici hnene la ketre he ne la fami, tre, ijije hi tro nyidrëti a ukune la itre xaa atrene la fami troa hane sajuëne la nyipi hmi. Drei la ketre ceitun, ame ngöne lo Paulo me Sila e hnine la kalabus, tre, hnei nyidro hna cainöje kowe la atre thupë kalabus. Thupene lai, hnei angeic memine la fami angeic hna xome la bapataiso. (Ite Hu. 16:25-34) Ketre, thupene la hnei Paulo hna cainöj e Korinito, “[hnei] Kerisepo, tane la sunago, hna lapaune koi Joxu memine la lapa i angeic’ asë.” (Ite hu. 18:8) Hnei Iehova fe hna ië Peteru troa cainöje koi Konelio ketre hene ne isi, nge hna qeje angeic ceitu me ketre “ate metöte me qoue Akötesie.” Hnei Konelio me lapa i angeic memine fe la itre enehmu i angeic hna xome la bapataiso.—Ite Hu. 10:1-48.
3. Tui Filipo, drei la itre atr “ka sisitria” nyine tro sa cainöje kow?
3 Ijije troa hetre thangane fe la hna cainöje kowe la “angete musi asë.” (1 Tim. 2:1, 2) Drei la ketre ceitun, hnene la angela i Iehova hna eamo Filipo troa cainöje kowe la ketre “ate . . . ka sisitia,” atre thupëne la nöjei mo asë ne la isola i angetre Aithiope. Hnei Filipo hna drenge la atre cili a “e la perofeta Isaia” nge thupene lai hnei angeice hna qeje pengöne kowe la atre Aithiope la maca ka loi göi Iesu. Ketre hlue i Keriso hë lai atr nge angeice hë a hane cainöjëne trootro la maca ka loi ngöne la gojenyi ne tro kowe la nöje i angeic. Maine jë hnei angeice fe hna cainöje kowe la isola me kowe la itre hlue i nyiidro; itre atr lai ka hetre ejolene ekö troa drenge la maca ka loi.—Ite hu. 8:26-39.
4. Eue la itre ijine ka ijij tro la itre trahmany he ne fami, a drenge la maca ka loi?
4 Aqane Troa Cainöj Kowe La Itre He Ne Fami: Pine laka kolo pala hi a huliwa la itre he ne fami ngöne la drai ka pexej, ijije kö tro epuni a thele troa cainöj e hej, maine ngöne la nöjei mecixeni me sabath, maine pena ngöne la itre ijine mano? Maine epuni pala hi a cainöj ngöne la itre götrane hna huliwa i maseta, haawe, itre ijine lai ka ijije troa ketr la itre trahmanyi ka huliwa nge ka paatr ngöne la itre hnalapa i angatr. Ketre, loi e tro la itre trejine trahmany a catre troa cainöje kowe la itre sine ce huliwa i angatre trahmany, itre he ne fami. Ame la kola cainöje ngöne la itre hnalapa trootro, maine jë tro la itre trejine trahmany a thele troa ithanata memine la he ne la hnalapa.
5. Nemene la nyine tro la ketre sör a kuca, maine kola hetre hni ne ajan kowe la nyipici hnene la ketre trahmany?
5 Loi e thaa tro pi kö la ketre trejine föe a bëeke caasi troa wange hmaca la ketre trahmanyi ka hetre hni ne ajan kowe la nyipici. Loi e tro pala hi nyiidro a ce traqa memine la föi nyiidro maine ketre trejine trahmanyi pena. Maine kola kökötre hnyawa ngöne la ua hnene lai trahmany, loi e tro pë hë la ketre trejine trahmanyi ka macaj a bëeke hmaca troa wai angeic.
6. Tune kaa la aqane tro sa nyitipu Paulo aposetolo, matre troa “amele ite xan”?
6 Iëne Jë La Itre Taan Mekun Ka Troa Ketr La Itre He Ne Fami: Hnei Paulo aposetolo hna wanga atrune la itre atr ka drei nyidrë, me thele troa ithanatane la itre mekune ka ihmeku memine la aja i angatr, matre ijije tro nyidrëti a “amele ite xan.” (1 Kor. 9:19-23) Ketre tune mina fe, loi e tro sa iëne hnyawa la itre taan mekun ka troa ketr la itre trahmanyi ngöne la hna cainöj, me hnëkëne hnyawa la itre taan mekune cili. Drei la ketre ceitun, itre trahmanyi la ka lapaa hnehengazone göi itre ejolene la mani, me ketre musi ka lolo, memine fe la troa thupëne la mele ne la fami angatr. Maine jë aja i angatre fe troa atre la aliene la mel, memine la mele ka eje elany hune la ihnadro, memine fe la itre kepin matre Akötresieti a nue la akötr. Maine easa ajane troa kapa hnyawa la maca ne la Baselaia, nyipi ewekë tro sa atreine waiewekë ngöne la easa nyiqaane ithanata.—Ite edomë 16:23.
7. Tune kaa la aqane troa ketr la itre trahmanyi ne la itre trejine föe ka thaa hmi kö hnene la elolone la aqane ujë ne la itre atrene la ekalesia?
7 Thele Jë Troa Xatuane La Itre Trahmanyi Ne La Itre Föe Ka Thaa Hmi Kö: Pine laka kola ketr la itre trahmanyi hnene la aqane ujë ka lolo ne la itre föe i angatr Keresiano, ijije mina fe troa hetre thangane thei angatr la thiina ne la itre atrene la ekalesia. (1 Pet. 3:1-4) Ame la kola ce tro hnene la trahmanyi memine la föe i nyidrë kowe la ketre icasikeu, ijije troa ketri nyidrë hnene la aqane kepe nyidrëti hnyawa hnene la ekalesia. Kola mama jëne la traqa i nyidrë, laka, hetre hni ne ajane i nyidrë kowe la nyipici, nge maine jë tro hë nyidrëti a ajane troa inine la Tusi Hmitrötr.
8. Tune kaa la aqane tro la itre trejine trahmanyi a thele troa cainöj kowe la itre trahmanyi ka thaa hmi kö ngo ka hetre hnepe aja kowe la nyipici?
8 Ame ngöne la ketre götran, maine jë thaa nyipi ajane kö angatre troa qeje tus ngöne la xötrei, ngo thupene pë hë, angatr a ajane troa ithanata Tusi Hmitrötr memine la ketre trejine hnei angatr hna atre hnyawa. Hnene la itre trejine trahmany ne la ketre ekalesia hna catre troa wange la fami ne la ketre sör, matre troa ce porotrikëne memine la föi nyiidro ka thaa hmi kö, la itre ewekë ka ketri nyidrë. Ame la pune lai, angatr a ithanatane la itre ewekë ngöne la götrane la ua, nge ketre trejine fe hë nyidrë enehila hna bapataison. Ame la ketre ceitun, hnene la ketre trejine trahmanyi hna xatuane la ketre enehmu i nyidrë ka thaa hmi kö, troa xupe la ketre hag e xötreithe la hnalapa i angeic. Hnene la hna wangatrunyi angeic hnene la trejin, ene pe nyiqaane jë hi angeic etid. (Gal. 6:10; Fil. 2:4) Maine ketre Keresiano trahmanyi epun, hapeu matre thele troa cainöj kowe la itre trahmanyi ka thaa hmi kö?
9. Nemene la manathith hna troa kapa qa ngöne la hna inine la itre Keresiano trahmany?
9 Inine Jë La Itre Keresiano Trahmanyi Thatraqane La Itre Drai Elany: Ame la itre trahmanyi ka kapa la maca ne la Baselaia nge ka thele troa hetre hnëqa ngöne la huliwa i Iehova, tre, ijije troa e angatr thene la “itre atr nyine ahnahna,” ene lo itre qatre thupe Keresiano ka nue la hnei angatr hna atrein me trenge catre i angatr thatraqane la itre ekalesia ne la nöje i Iehova. (Efe. 4:8, MN; Sal. 68:18) Eje thene la itre trahmanyi cili la ajane troa thupëne hnyawa la ekalesia. (1 Pet. 5:2, 3) Eje hi, angatre hi la ketre manathithi ka tru kowe la lapa ne la itre trejine e cailo fen!
10. Jëne la hna xatua Paulo hnei Anania, hna kepe thangane tune kaa hnene la ka ala nyim?
10 Drei la ketre ceitun, ngacama ketre atr Saulo ka axösisine ekö la itre Keresiano, ngo nyidrëti hë la ketre “aposetolo ne la nöjei ethen.” (Rom. 11:13) Hna pane cile hnö hnei Anania troa cainöje koi Saulo pine la ewekë cili. Ngo hnei Anania hna xötrethenge la itre hna amekötine hnei Joxu, me cainöje kowe la atr hna hëne pë hë e thupen, ka hape, Paulo aposetolo. Ame ngöne la itre macatre, itre thauzane la itre atr ka kepe thangane la hna drenge la cainöje i Paulo, nge itre milio enehila la itre ka kepe thangane mina fe la hna e la itre tusi nyidrë e hnine la Wesi Ula i Akötresie.—Ite Hu. 9:3-19; 2 Tim. 3:16, 17.
11. Pine nemen matre loi e tro sa catre troa cainöje kowe la itre trahmany, itre he ne fami?
11 Qa ngöne lai, loi e tro sa elë hune la itre jole matre troa cainöje kowe la itre trahmany, itre he ne fami. Maine tro sa thele troa eatrëne la aja celë, tro hë Akötresieti a amanathithine la trenge catre së troa kuca la aja i Nyidrë me sajuëne hnyawa la itre aja ne la Baselaia.