“Catejë La Hni”
1. Nemene la ewekë ka troa mama ngöne la huliwa ne cainöje së?
1 Pëkö ketre götrane ne la huliwa së ne Keresiano ka thaa kökötre kö. Eje hi, kola ithuecatre koi së troa “cate la hni [së],” me “nyihlue i [Iehova].” (Rom. 12:11) Ngo hetrenyi la itre ewekë ka nyimutre ka troa sewe së troa catre ngöne la huliwa ne cainöje së. Tro sa “apalulune” tune kaa la itre hni së matre troa hetre aja së me madrine thatraqane la huliwa ne cainöjëne la Baselaia?—2 Tim. 1:6, 7.
2. Nemene la ka iothekeune la sipu ini Tusi Hmitrötre së memine la aja së kowe la huliwa ne cainöj?
2 Ketre Sipu Ini Tusi Hmitrötr: Ame la atr ka maca troa cainöjëne la Baselaia, tre, ka hnine angeic la wathebo i Akötresie nge hna ketri angeice hnyawa hnene la itre nyipici ka ej e hnine ej. (Sal. 119:97) Ame ngöne la easa ketre sipu inine la Tusi Hmitrötr me atre la itre nyipici ka eje e hnine ej, tre, kolo lai a acatrene la itre hni së me akökötrene la aja së. Hnene la ihnimi së kowe la Atre Hamëne la itre nyipici cili, memine la aja së troa cainöjëne la maca ka loi kowe la itre xaa atr, ene pe kola upi së troa atrunyi Akötresie me tro fë la atresiwa i Nyidrë koi nöjei atr. (Heb. 13:15) Eje hi laka, maine easa catre tro fë la maca ka loi, haawe, easë hi lai a wanga atrune hnyawa la enyipiewekëne ej.
3. Troa hetre thangane tune kaa la Uati Hmitrötre i Akötresie ngöne la huliwa ne cainöje së?
3 Sipone Jë La Uati Hmitrötre i Akötresie Jëne La Thith: Thatreine kö troa hetre thangane la huliwa ne cainöje së, e hne së hna thele troa eatrëne ej hnene la sipu trenge catre së. Ka xulu qaathene la Uati Hmitrötre i Akötresie la nyipi aja ka catr. (1 Pet. 4:11) Maine tro sa lapa qale hnyawa kowe la Qaane la “cate,” haawe, tro hë Nyidrëti a hamë së la trenge catre ngöne la götrane la ua matre tro pala hi sa anyipicin. (Is. 40:26, 29-31) Hnei Paulo hna “hetenyi . . . la ixatua qa thei Akötesie” ngöne lo nyidrëti a cile kowe la icilekeu ngöne la huliwa ne cainöje i nyidrë.” (Ite hu. 26:21, 22) Ijije troa xatua së hnene la ecatrene la Uati Hmitrötre i Iehova, troa acatrene la hni së kowe la huliwa ne cainöje së; qa ngöne lai, loi e tro sa sipone lai jëne la thith.—Luka 11:9-13.
4. Nemene la itre thangane ka lolo ka xulu qa ngöne la ajane atraqatr, ngo nemene la itre ewekë nyine troa hmekën?
4 Ame itre xaa ijin, atraqatre la aja thene la itre trejine Keresiano hnene laka hetre ajane ka catre kowe la huliwa ne troa cainöjëne la Baselaia. (2 Kor. 9:2) Ame ngöne la teritoar, hetrenyi la itre atr ka ajane troa drenge la maca hna tro fë cememine la madrin, me hni ka pëkö luelue ngön. Ngo loi e ce tro pala hi la ajane atraqatre memine la aqane ithanata së hna tuluthe me hnenyinawa ka menyik. (Tito 3:2) Easa thele ngöne la nöjei ijin troa metrötrëne la atr hne së hna ithanata memin, memine fe la emeköti angeic troa ketre sipu ië mekun.
5. Nemene la ithuemacany hna hamëne jëne la Uati Hmitrötr, nyine tro sa catre trongën?
5 Epi tro pala hi a “cate la hni” së, easë itretre cainöjëne la Baselaia. Loi e tro sa eëne la ajane atraqatr hnene la hna ketre sipu inine la Tusi Hmitrötr, me thithi pala hi koi Iehova, ene la Atre ka ijij troa hamë së la mene ne la Uati Hmitrötr. Eje hi lai laka, tro hë sa catre troa xome hnyawa la huliwa ne cainöje së “ngöne . . . la Uati Hmitöt me nyipi kapa hnyawa.”—1 Thes. 1:5.