Loi e Tro Sa Catre Xome La Huliwa Ne Cainöj
1 Ame ngöne la nöjei macatre qaane lo 1992, tre, hna catre kuca pala hi hnene la Itretre Anyipici Iehova la caa miliare lao hawa nge sin, ngöne la huliwa ne cainöje trootro me inine la itre atr. Drei la madrine së troa nango hane sine la huliwa cili!—Mat. 28:19, 20.
2 Eje hi, easë asë hi a olene me atrunyi Iehova, la hnei Nyidrëti hna xatua së troa hane sajuëne la huliwa ne cainöje ngöne la itre “ijine ka aköte” celë. (2 Tim. 3:1) Nemene la hna thele the së, maine easa ajane troa catre xome pala hi la huliwa ka nyipi ewekë celë?
3 Kepine La Easa Catr: Ame la ka upi së troa catr xome la huliwa së, tre, ene la etrune la ihnimi së koi Akötresie me kowe la itre atr easenyi së, nge hnene mina fe la aja ka eje e kuhu hni së troa aejëne hnyawa lo hne së hna sa xepu. (Mat. 22:37-39; 1 Ioane 5:3) Ihnimi la ka upi së troa hujëne la itre ewekë matre ijije troa hane xome hnyawa la huliwa ne cainöje trootro.—Luka 9:23.
4 Loi e Tro Pala Hi Sa Catr: Kola thele hnene lo atre icilekeu me easë, ene Diabolo, la nöjei aqane troa ananazijë së troa cainöj. Hetrenyi la itre ewekë hnei angeice hna nyijëne matre troa ananazijëne la aqane catre cainöje së, tune la kola thaa semesine së hnene la itre atr ngöne la teritoare së, hnene pena la itre nyine madrine ne la fene celë, me itre itupathi hne së hna cile kow ngöne la nöjei drai ne mele së, maine hnehengazo menu pala ha la ketre sine meci pena ka ketri së matre kola utipië trootro la mele së.
5 Qa ngöne lai, loi e tro sa catre huliwa matre thaa tro kö sa nanazij ngöne la aqane catre cainöje së. Nyipi ewekë koi së troa eëne lo “aja [së] hnapan.” Kolo lai a hape, troa e lapaane me sine thele la Wesi Ula i Akötresie, ene la Tusi Hmitrötr, me kepe thangane la nöjei ewekë hnei Iehova hna hamëne jëne “la hlue ka nyipici me ka inamacan,” matre troa acatrene la lapaune së.—Hna Ama. 2:4; Mat. 24:45; Sal. 119:97.
6 Kola amamane hnyawa hnene la itre hna perofetane hnei Tusi Hmitrötr, laka, easenyi catre hë la drai Iehova, ene lo ijine kola troa apatrene la itre atr ka xele ma hane nyihlue i Akötresie. (2 Pet. 2:3; 3:10) Haawe, e mama hnyawa la ewekë cili ngöne la mekune së, loi e tro sa kuca asë la hne së hna atreine matre thaa tro kö a nanazije la aqane catre cainöje së, nge loi e catre pala hi së troa hane sine hnyawa la huliwa ne cainöje me inine la itre atr e cailo fen, pine laka ketre huliwa la ka tro hë!