Kola Sa La Itre Hnyinge i Nyipunie
◼ Nemene la itre aqane tro sa xatuane la itre pionie?
Ame ngöne lo macatre ne huliwa 2009, traqa koi 800 000 lao trejine trahmanyi me föe e cailo fen asë, ka pionie lapaa me pionie hut. Ame la itre hlue cili ka cainöj ngöne la drai ka pexej, tre, angatr a nue la itre hawa, me trenge catr me itre mo i angatr matre troa akökötrene la maca ka loi ne la Baselaia. (Ite edomë 3:9) Drei la kola amadrinë Iehova hnene la trenge catre i angatr! Tro sa amamane tune kaa la aqane waiewekë i Iehova, me xatuane la itre pionie troa madrine me cile huti ngöne la huliwa cili?
Maine tro sa iëne hnyawa la itre trenge ewekë hne së hna qaja koi angatr, haawe, tro ha ithue catre koi angatr troa cile huti ngöne la huliwa ne pionie. (Ite edomë 25:11) Hapeu, hne së kö hna eköthe amë ngöne la wiik, la ketre drai ne troa ce cainöje me angatr? Ame la easa ce cainöj, maine jë loi e tro sa xome la loto së, me amë pë hë la loto i angatr. Nge maine angatr a xome la loto i angatr, loi e tro sa hane ixatua nyi thupene saas. (1 Kor. 13:5; Fil. 2:4) Ketre, easë mina fe a xatuane la itre pionie hnene la hna könë angatr e itre xaa ijin, matre troa ce xeni me easë.—1 Pet. 4:8, 9.
Kola anyipicine hnene la Itre Hna Cinyihan, laka, tro pala kö Iehova a hamëne la nöjei ewekë hna ajan hnene la itre atr ka thele panëne la Baselaia i Nyidrë. (Sal. 37:25; Mat. 6:33) Nyidrëti a ujë tune lai jëne la lapa ne la itre trejine asë. (1 Ioane 3:16-18) Eje hi laka, thaa itre pionie kö a treqene tro la itre trejine a hamë manie i angatre matre troa eatrëne la itre aja i angatr ka nyipi ewekë. Ketre, thaa angatre kö a troa qaja trongëne kowe la itre xan laka, hetre ewekë ka pë thei angatr. Ngo maine ka hmeke së me ka atreine waiewekë, tro hë sa sajuëne la “pë ewekë” thene la itre pionie cili ka mele nyipici.—2 Kor. 8:14, 15.
Fibi la ketre trejine föe ne la ekalesia ne Kenikerea ka catre cainöj ngöne lo hneijine i Iesu; ame ju hi la eahlo a tro Roma, tre, öni Paulo a ithuecatre kowe la itre trejin ne la lapa cili, ka hape: “Kepe nyido hnei nyipunie göi Joxu, thenge la thina ne la ite ka hmitöt, nge mate xatua nyidoti hnei nyipunie ngöne la ewekë hna troa kuca.” (Rom. 16:1, 2) Haawe, hetrenyi së la manathithi ka tru troa amamane la ihnimi së me xatuane la itre trejine e hnine la ekalesia ka catre tro fë la maca ka loi, ene la itre pionie lapaa me itre pionie hut.—Ite hu. 5:42.