Itre Manathith Qa Ngöne La Hna Pionie
1, 2. Nemen la itre thangane ka loi hna kapa qa ngöne la huliwa ne pionie, nge pine nemen?
1 Hna qaja hnene la ketre trejine trahmany ka pionie ka hape: “Eni a öhne laka pëkö ketre huliwa ka tune la huliwa ne cainöj, laka atraqatr la madrin hnenge hna kapa qa ngöne la hnenge hna ce thawa memine la itre xaa atr la nyipici.” Hna qaja fe hnene la ketre föe ka pionie, ka hape: “Ame ngöne la nöjei kola nyipune la drai, meköle hnyawa ni nge atraqatr la madrineng.” Kola nyi trenge ewekën hnene la itre pionie celë, la itre trejine trahmanyi me föe ka hane fe hë kapa la manathith qa ngöne la hna pionie.—Ite edomë 10:22.
2 Atraqatre catr la madrin hne së hna kapa qa ngöne la hna hane xatuane fe la itre xaa atr troa hetrenyi la atrehmekun ne iamele hna xome qa hnine la Wesi Ula i Akötresie. (Ite hu. 20:35; 1 Thes. 2:19, 20) Hna cinyihane hnene la ketre trejine trahmany, itre macatre ne xome hë eahlo la huliwa ne pionie, hnei eahlo hna cinyihane ka hape: “Ka lolo catr nge kola acatren la lapaune së la easë a öhne la aqane upe la itre atr hnene la emenen la Wesi Ula i Akötresie troa saze la itre aqane mele i angatr.” Eje hi laka, maine troa thele hnene la itre pionie troa xatuan la itre atr me ini tusi me angatr, tro hë angatr a hane kapa fe la itre thangane ka loi ka tune lai.
3, 4. Tune kaa la aqane tro la huliwa ne pionie a inin la ketre atr troa mejiun koi Iehova, nge tune kaa la aqane tro la ewekë cili a xatua angeic troa kökötr ngöne la götrane la ua?
3 Loi e Troa Mejiun Koi Iehova: Hnene laka itre pionie a mejiune ngöne la nöjei drai kowe la ua i Akötresie, matre kola ixatua troa eën la “itre wene la ua” nge ketre, nyine thupë angatre fe. (Gal. 5:16, 22, 23) Ketre, qa ngöne laka angatr a xome pala hi la Wesi Ula i Akötresie, canga atreine la itre pionie troa xome la itre xötre ne la Tusi Hmitrötr troa isigöline la nyipici, me acatren la lapaune ne la itre xan. (2 Tim. 2:15) Hna qaja hnene la ketre trejine ka nyimu macatre ne pionie ka hape: “Hna xatua ni hnene la huliwa ne pionie troa hetrenyi la atrehmekune ka jui qa hnine la Tusi Hmitrötr, celë hi ketre atrehmekune hnenge hna xome matre troa xatuan la itre ka nyimutre troa atre Iehova memine la itre mekuana i Nyidrë.” Drei la eloine la troa pionie!
4 Nyimutre la itre xaa götran nyine tro la itre pionie lapa a mejiun koi Iehova. Hna amanathithine la trenge catr hnei angatr hna kuca matre troa hetrenyi la itre ka nyipi ewekë kowe la mele i angatr, ene la xen, me iheetr, me hnalapa ka ijij. Hetrenyi la ketre trejine qatr ka 72 hë lao macatre nge 55 lao macatre ne pionie lapa nyidrë, hnei nyidrëti hna qaja ka hape: “Thaa hane kö ni öhne la Iehova a nuetriji ni, hnei Nyidrëti pala hi hna ce me eni.” Ketre, maine troa ahmaloeën hnene la itre pionie la mele i angatr, eje hi lai laka, tro ha thupë angatr qa ngöne la itre ejolene la mel. Hapeu, hane kö ketri epuni hnene la mekune celë?—Mat. 6:22; Heb. 13:5, 6.
5. Tune kaa la aqane tro la huliwa ne pionie a xatuan la ketre trejin troa qale catre koi Iehova?
5 Loi e Troa Qale Catre Koi Akötresie: Pëkö ewekë ka sisitria catr hune la aqane imelekeu së me Iehova. (Sal. 63:3) Maine easë a catre cainöje trootro hnene laka, tru la ihnimi së koi Iehova, haawe, tro mina fe hë lolo catr la aqane imelekeu së me Nyidrë. (Iako. 4:8) Hna qaja hnene la ketre trejine trahmany ka sasaithe hë la 18 lao macatre ne pionie, ka hape: “Kola aijijë së hnene la huliwa ne pionie troa tupath me isa öhne laka ‘ate ihnimi Iehova,’ nge kola acatrene pala hi la aqane imelekeu së memine la Atre Xupi së.”—Sal. 34:8.
6. Nemene la ka nyipi ewekë troa hetrenyi hnene la itre pionie, nge drei la itre ka troa hane kepe thangane la hna huliwa hnene la itre pionie?
6 Maine nyipi ewekë la itre aqane mel matre ijij troa pionie, ngo loi e tro mina fe la itre pionie a catre lapaun, me hnimi Iehova memine la itre ka lapa easenyi angatr, nge loi e troa hetrenyi fe la hni ne ajan troa hujën la mele i angatr. (Mat. 16:24; 17:20; 22:37-39) Ngo pine laka ka madrine pala hi la iqëmeke ne la itre pionie ngöne la nöjei götrane la fen, nyine tro hi lai a amamane ka hape, sisitria catre kö la itre manathith hna kapa hnene la pionie hune la itre ewekë hnei angeice hna catre kuca matre troa xome la huliwa cili. (Mal. 3:10) Thaa hna nyi ifegone kö la itre manathith kowe hmekuje la itre pionie, ngo kolo mina fe a hane kepe thangane la itre hnepe lapa i angatr memine la ekalesia, la mekune ka lolo hna xome hnene la itre pionie.—Fil. 4:23.