Kola Sa La Itre Hnyinge i Nyipunie

◼ Uti hë eue la tro sa inine la Tusi Hmitrötr memine la ketre atr ka kökötre hnyawa ngöne la götrane la ua?

Loi e tro pala hi sa inine la Tusi Hmitrötr memine la ketre atr ka kökötre hnyawa, uti hë la angeice a apexejene la lue itusi celë, hna hape, Nemene La Nyipi Ini Hna Hamën Hnei Tusi Hmitrötr? me “Thupë Nyipunieti Ju Kö Ngöne La Ihnimi Akötesie.” Ka eje mina fe lai kowe la hnainin hna bapataisone hë, nge thaa ase kö la lue itus. Thupene la bapataiso i angeic, ijije pala hi tro sa amë ngöne la rapore së la hawa, me itre iwai hmaca memine fe la ini tusi hne së hna kuca me angeic. Maine kola ce tro me easë hnene la ketre atre cainöj nge hnei angeic hna hane qeje mekun, haawe, ijije mina fe tro angeic a e la hawa i angeic.—Wange ju la Huliwa Ne Baselaia ne Maac 2009, götrane 2.

Nyipi ewekë catre tro la itre atr ka xötrei lö kowe la nyipici a hetre trepene ka catr, qëmekene tro sa afenesine la lue itus me angatr. Nyipi ewekë tro angatr a “nyi wane” thei Keriso, me ‘catre ngöne la lapaun’ matre troa cile kowe la nöjei pengöne itupath. (Kol. 2:6, 7; 2 Tim. 3:12; 1 Pet. 5:8, 9) Ketre, tro hë angatr a maca troa inine la itre xaa atr, e hetrenyi thei angatr la “wangate hmekune la nyipici.” (1 Tim. 2:4) Haawe, maine tro sa apexejene la lue itus memine la itre atr hne së hna inin, tre, easë hi lai a xatua angatr troa catre trongëne “la gojenyi ne tro kowe la mel.”—Mat. 7:14.

Qëmekene troa aijijëne la ketre atr troa xome la bapataiso, kola pane wange hnyawa hnene la itre qatre thup laka, trotrohnine hnyawa kö angeice la itre trepene ini qa hnine la Tusi Hmitrötr, nge angeice kö a trongëne itre ej ngöne la mele i angeic. Loi e tro la itre qatre thup a hmeke hnyawa ngöne la angatr a ce ithanatane lai memine la ketre atr ka thaa apexejene pala kö lo pane itus. Maine thaa ijije kö kowe la ketre atr troa xome la bapataiso, loi e tro la itre qatre thup a thele troa hamëne koi angeic la ixatua ka ijij, matre ame hë elany, ijiji angeic troa hane xome la bapataiso.—Wange ju la itus Organisés pour faire la volonté de Jéhovah, götrane 217-218.

[Iatr ne la götran 2]

Nyipi ewekë catre tro la itre atr ka xötrei lö kowe la nyipici a hetre trepene ka catr