Kola Sa La Itre Hnyinge i Nyipunie

◼ Hapeu, tro kö sa thithi ngöne qene qëhnelö, qëmekene troa inine la Tusi Hmitrötr memine la ketre atr?

Nyimutre la itre manathithi hna kapa qa ngöne la hna nyiqane me nyipune la ketre ini Tusi Hmitrötr, hnene la thith. Easa sipo Iehova la uati hmitrötre i Nyidrë jëne la thith, matre troa xatua së ngöne la easa porotrike memine la ketre atr. (Luka 11:13) Ketre, ame la easa thith, easë hi lai a amamane hnyawa kowe la hnainin, la enyipiewekëne la ini Tusi Hmitrötre i angeic, me hane ini angeice la aqane troa thith. (Luka 6:40) Hawe, loi e tro pala hi sa nyiqane la ketre ini Tusi Hmitrötr hnene la thith. Ngo ame ngöne la itre xa götran, loi e troa atreine waiewekë hnene la atre xomiujin; nyipi ewekë tro angeice a pane mekune hnyawa, ka hape, maine ijije kö troa thithi ngöne qene qëhnelö qëmekene troa inine la Tusi Hmitrötr memine la ketre atr.

Ame la ketre ewekë nyine troa wangatrune hnyawa, tre, ene la götrane hnë xomiujine la ini Tusi Hmitrötr. Maine kola xomiujine la ini Tusi Hmitrötr ngöne la ketre götrane ka pëkö atr, hawe, ijije hi troa nyiqane me nyipune la ini Tusi cili hnene la thith. Ngo maine ka tiqa hnei atr, maine kola nango hmahma la hnainin, hawe, loi e thithi jë hë ngöne la kola inine la Tusi Hmitrötr ngöne la ketre götrane ka pëkö atr. Maine nyipici laka loi e troa pane wange la hnë xomiujine la ini Tus, ngo nyipi ewekë mina fe troa atreine waiewekë hnyawa, qëmekene troa nyiqane hnene la thith.—Wange ju la Huliwa Ne Baselaia ne Maac 2005, götrane 4.