Nyipunieti Kö a Kuca La Hnei Nyipunieti Hna Atrein Matre Troa Kapa La Ini Qathei Iehova?

1. Nemene la mekuna i Iehova göi ini?

¹ Kola ajane troa ini së hnei Iehova lo [“Atre Ini Ka Tru,” MN]. (Is. 30:20) Hnei Nyidrëti hna nyiqane hamë ini thupene la hna xupe la Hupuna neköne haetra i Nyidrë. (Ioane 8:28) Ngacama hna icilekeu hnei Adamu, ngo tha hnei Iehova kö hna hmaca troa hamë ini; hnei Nyidrëti pala hi hna hamëne cememine la ihnim, la itre ini thatraqane la itre atr ka tha pexeje kö.—Is. 48:17, 18; 2 Tim. 3:14, 15.

2. Nemene enehila la huliwa ne ini hna nyiqane hë?

² Ame enehila, Iehova a elemekene la ketre huliwa ka tru ne troa inine la nöjei atr e cailo fen. Tune lo hna perofetane hnei Isaia, itre milio la etrune la itre atr ka xulu qa cailo fen, me xötre kowe “la wete ne la ēnē i Iehova.” (Is. 2:2) Pine nemene matre elë jë angatre kowe la wetre cili? Angatre a elë kowe la wetre cili, matre troa ini angatre la itre jë i Akötresie; eje hi, kola troa ini angatre hnei Iehova! (Is. 2:3) Ame ngöne la macatre ne huliwa 2010, hnene la Itretre Anyipicine i Iehova hna kuca la 1,6 miliar lao hawa, matre troa cainöje me inine kowe la itre atr la nyipici qa hnine la Tusi Hmitrötr. Ketre, ame ngöne la nöjei wiik, hetrenyi la ketre ini ngöne la götrane la ua hna hamëne ngöne la itre ekalesia ka ala 105 000. Ketre, hnene la hlue ka nyipici me ka inamacan hna fejane la itre itusi ngöne la 500 lao qene hlapa, matre troa inine la nöjei Keresiano asë.

3. Tro sa ketre sipu kepe thangane tune ka qa ngöne la ini hnei Iehova hna hamën?

³ Atraqatre La Thangan: Drei la itre thangane ka tru hne së hna kapa qa ngöne la ini qathei Akötresie! Hne së hna inine ka hape, hetre ëje i Akötresie, nge Nyidrëti a kukehni së. (Sal. 83:18; 1 Pet. 5:6, 7) Ketre, atre hë së la itre mekune ka sa lo itre hnyinge ka sisitria thatraqane la mele së, tune la itre hnyinge celë: Pine nemene matre kola akötre me meci la itre atr? Tune ka la aqane tro sa hetrenyi la ketre mele ka lolo? Nemene la aliene la mel? Hnei Iehova mina fe hna hamë së la itre trepene meköti matre troa ‘loi xölene la itre jë së.’—Ios. 1:8.

4. Nemene la itre xa ini ka sisitria hna aijijëne kowe la itre xa hlue i Akötresie troa kapa, nge pine nemene matre nyipi ewekë tro sa kapa la nöjei ini hna hamëne hnei Iehova?

⁴ Iehova mina fe a hamëne la itre ini ka ketre pengön, matre troa xatuane la itre xa hlue i Nyidrë troa akökötrene la huliwa i angatr. Eje ngöne la götrane 4-6 la itre xa ini cili. Maine jole koi së troa hane sine la itre ini hna e wengëne ngöne la itre götrane cili, ngo hapeu, easë kö a thele troa kepe thangane qa ngöne la itre xa ini hnei Akötresieti hna hamë së. Maine easë la ketre thöthi hna upe ielene hnene la itretre hamë ini me itre xane troa sisedrëne la itre ini ka tru, hapeu, easë kö a thele troa eatrëne la aja celë, ene la troa kapa la ini qathei Iehova? Maine tro sa kapa la nöjei ini hna hamë së hnei Iehova, hawe, tro hë lai a xatua së troa eköthe la ketre mele ka lolo enehila, nge ka epine palua fe.—Sal. 119:105; Ioane 17:3.

Itre Xa Ini Ka Sisitria Hna Eköthe Hnene La Organizasio i Iehova

Itre Ini Hna Eköthe Thatraqane La Itre Atr Ka Thatreine Cinyany Me e Tus

• Aliene La Ini Cili: Troa inine la itre atr la aqane troa cinyany me e tus, matre ijije koi angatre troa ketre sipu e me inine la Tusi Hmitrötr, me hane inine fe la nyipici kowe la itre xan.

• Eqean: Thenge la aqane kökötre la itre atr.

• Hnë: E hnine la ketre Uma Ne Baselaia.

• Drei La Ka Troa Sin: Nöjei atr ka cainöj memine fe la itre ka ajan.

• Aqane Trongen: Itre qatre thupe ne la ekalesia a eköthe la itre ini cili thenge la aja ka eje e hnine la ekalesia, nge angatre a ithuecatre kowe la nöjei atr asë troa hane sine itre ej.

Ini Ne Cainöj Qathei Akötresie

• Aliene La Ini Cili: Troa inine la itretre cainöje matre troa maca hnei angatre troa cainöjëne la maca ka loi, me inine eje hnyawa kowe la itre xa atr.

• Eqean: Ka pëkö pun.

• Hnë: E hnine la ketre Uma Ne Baselaia.

• Drei La Ka Troa Sin: Nöjei atr ka cainöj. Ijije mina fe troa hane sine hnene la itre atr ka catre tro kowe la itre icasikeu, me ka kapa la itre ini hna hamëne hnei Tusi Hmitrötr, me ka mele thenge la itre trepene meköti ne la itre Keresiano.

• Aqane Trongen: Troa wange la atre thupëne la Ini Ne Cainöj Qathei Akötresie.

Ini Thatraqane La Itre Atr Ka Ajane Troa Ithanatane La Ketre Qene Hlapa Kö

• Aliene La Ini Cili: Troa inine kowe la itretre cainöje la aqane troa cainöjëne la maca ka loi ngöne la ketre qene hlapa kö.

• Eqean: Foa maine faifi lao treu. Hna majemine eköthe la itre ini cili e nöjei Mecixen e hmakanyi ngöne la cas maine lue hawa.

• Hnë: Ngöne la ketre Uma Ne Baselaia.

• Drei La Ka Troa Sin: Thatraqane la itretre cainöje ka hlemu loi e hnine la ekalesia, nge ka ajane troa cainöje ngöne la ketre qene hlapa kö.

• Aqane Trongen: Kola eköthe la itre ini cili hnene la filial thenge la aja ka ijij.

Troa Xupi Uma Ne Baselaia

• Aliene La Ini Cili: Troa xupe me ahnyipixene la itre Uma ne Baselaia. Tha ketre ini kö lai, ngo ame la itre trejine ka saene ngöne la huliwa cili, tre, kola ini angatre la itre xa aqane troa huliwa, matre ijije tro angatr a ixatua ngöne la itre xa huliwa ne xupi uma.

• Eqean: Thenge la aqane mele ne la atre saene troa ixatua.

• Hnë: Ngöne la nöje hna thupëne hnene la Kometr Ne Xupi Uma Ne La Nöj. Ame la itre xa ka saene troa ixatua, tre, hna hë angatre troa hane ixatua ngöne la itre nöje hna ketr hnene la ketre hulö.

• Itre Hna Amekötin: Itre trejine trahmanyi me föe hna bapataisone hë, nge hna nue hnene la lapa ne la itre qatre thup. Itre ka hetre atreine ju hë angatre maine pëkö.

• Aqane Trongen: Troa nyialiene la sine pepa celë hna hape, Construction des Salles du Royaume — Questionnaire pour les volontaires (S-82), hna hamëne hnene la itre qatre thupe ne la ekalesia i epun.

Ini Thatraqane La Huliwa Ne Pionie

• Aliene La Ini Cili: Troa xatuane la itre pionie troa ‘kuca asë la qâ i angatr.’—2 Tim. 4:5.

• Eqean: Lue wiik.

• Hnë: Troa axeciëne hnene la filial; hna majemine kuca ngöne la ketre Uma Ne Baselaia.

• Itre Hna Amekötin: Kolo itre trejine ka ca macatre hë ne xome la huliwa ne pionie lapa.

• Aqane Troa Sin: Ame la itre pionie ka sine la ini cili, tre, hna iëne meköti angatr, nge hna thuemacanyi angatre hnene la atre thupëne la sirkoskripsio.

Ini Thatraqane La Itre Ka Xötrei Lö e Hnine La Bethela

• Aliene La Ini Cili: Hna eköthe la ini cili matre troa xatuane la itre ka xötrei lö, troa hetre thangane la huliwa i angatre e hnine la Bethela.

• Eqean: Ca hawa ngöne la nöjei wiik, uti koi sikisitrine lao wiik.

• Hnë: Bethela.

• Itre Hna Amekötin: Loi e troa ketre atrene la Bethela ka huliwa ngöne la drai ka pexej, maine pena ka ixatua ngöne la cas maine itre macatre.

• Aqane Troa Sin: Hna iëne mekötine la itre atrene la Bethela.

Ini Ne Cainöjëne La Baselaia

• Aliene La Ini Cili: Troa xatuane la itre qatre thupe me itre drikona, troa xome hnyawa la itre hnëqa i angatr, ene la troa thupëne me eköthe hnyawa la itre huliwa i angatr. (Ite hu. 20:28) Ame la ka axeciëne troa eköthe la ini cili ngöne la nöjei macatre, tre, ene la Lapa Ne Xomi Meköt.

• Eqean: Ame ngöne la itre macatre ka ase hë, hna kuca la ewekë celë, laka, ca drai nge sine kowe la itre qatre thup, nge ca drai kowe la itre drikona.

• Hnë: Hnine la ketre Uma Ne Baselaia maine ketre Uma Ne Asabele.

• Itre Hna Amekötin: Thatraqai itre qatre thupe me itre drikona.

• Aqane Troa Sin: Hna hëne la itre qatre thupe me itre drikona hnene la atre thupëne la sirkoskripsio.

Ini Thatraqane La Itre Qatre Thupe Ne La Ekalesiaa

• Aliene La Ini Cili: Troa xatuane la itre qatre thupe troa xome hnyawa la itre hnëqa i angatr e hnine la ekalesia.

• Eqean: Faifi lao drai.

• Hnë: Hna amekötine hnene la filial; hna majemine kuca hnine la ketre Uma Ne Baselaia maine ketre Uma Ne Asabele.

• Itre Hna Amekötin: Thatraqai itre qatre thup.

• Aqane Troa Sin: Hna hëne la itre qatre thupe hnene la filial.

Ini Thatraqane La Itre Qatre Thupe Ka Iwai Trotro Me Itre Föi Angatrb

• Aliene La Ini Cili: Troa xatuane la itre qatre thupe ka thupëne la sirkoskripsio me distrik, troa hetre thangane la huliwa i angatre e hnine la itre ekalesia, me troa catre “huliwa ngöne la wesi ula me ini,” nge tro fe a thupëne hnyawa la itre atr hna ahnithe koi angatr.—1 Tim. 5:17; 1 Pet. 5:2, 3.

• Eqean: Lue treu.

• Hnë: Hna amekötine hnene la filial.

• Itre Hna Amekötin: Thatraqane la itretre thupëne la sirkoskripsio maine distrike pena.

• Aqane Troa Sin: Filial la ka hëne la itre qatre thupe ka iwai trotro me itre föi angatr.

Ini Thatraqane La Itre Trejine Trahmanyi Ka Tha Faipoipo Köc

• Aliene La Ini Cili: Troa hnëkëne la itre qatre thupe me itre drikona ka tha faipoipo kö troa cilëne la itre xa hnëqa ka tru. Ame la itre xan, troa upi angatre troa nyihlue ngöne la ketre nöje ka aja ka cainöj. Nge ame pena la itre xan, angatre a tro kowe la ketre nöje hnei angatre hna ajan, matre troa hane ixatua.

• Eqean: Lue treu.

• Hnë: Hna amekötine hnene la filial; hna majemine kuca hnine la ketre Uma Ne Baselaia maine ketre Uma Ne Asabele.

• Itre Hna Amekötin: Itre trejine trahmanyi ka tha faipoipo kö ka 23 uti hë 62 lao macatre; itre ka egöcatre hnyawa nge ka ajane troa nyihluene la itre trejine me angatr memine la itre aja ne Baselaia ngöne la itre götrane ka aja ixatua. (Mar. 10:29, 30) Traqa koi lue macatre ne nyihlue angatre ceitu me ketre drikona maine qatre thupe pena.

• Aqane Trongen: Maine hetrenyi la ini cili ngöne la teritoare ne la filiale i nyipunie, hawe, loi e troa eköthe la ketre icasikeu thatraqane la itre trejine cili ngöne la ijine asabele ne sirkoskripsio. Hetre itre xa ithuemacanyi hna troa hamëne ngöne la icasikeu cili.

Ini Thatraqane La Itre Trefëne Keresianod

• Aliene La Ini Cili: Troa hamëne kowe la itre trefëne la ketre ini ka ketre pengön, matre ijije troa huliwa angatre hnyawa hnei Iehova memine la organizasio i Nyidrë. Ame la itre xan, troa upi angatre troa nyihlue ngöne la ketre götrane ne la nöje i angatr ka aja ixatua. Nge ame pena la itre xan, angatre a tro kowe la ketre nöje hnei angatre hna ajan, matre troa hane ixatua.

• Eqean: Lue treu.

• Hnë: Ame lo itre pane ini, tre, hna eköth Ngöne La Itre Iuma Hna Kuca Hnene La Sasaiatri Ne Wachtower e Patterson, e Neweiok. Ngo ame pë hë enehila, troa hnene la ini cili ngöne la itre götrane hna amekötine hnene la filial; hna majemine kuca lai ngöne la Uma Ne Asabele maine ngöne la Uma Ne Baselaia.

• Itre Hna Amekötin: Itre trefëne ka 25 uti hë 50 lao macatre ka egöcatre nge ka ijije troa nyihlue ngöne la ketre götrane ka aja ixatua, nge ka hetrenyi la aja celë, kola hape “Inieti la, upengë nieti jë.” (Is. 6:8) Ketre, troa saene la itre ka lue macatrene faipoipo hë, nge lue macatre ne xome fe hë la huliwa ne pionie hut.

• Aqane Trongen: Maine hetrenyi la ini cili ngöne la teritoare ne la filiale i nyipunie, hawe, loi e troa eköthe la ketre icasikeu thatraqane la itre trejine cili ngöne la asabele ka ketre pengöne nge ka ca drain. Hetre itre xa ithuemacanyi hna troa hamëne ngöne la icasikeu cili.

Ini Ne Gileada

• Aliene La Ini Cili: Troa inine la itre pionie memine la itre trejine ka cainöje ngöne la drai ka pexej, matre troa itre mesinare.

• Eqean: Faifi lao treu.

• Hnë: Ngöne La Itre Iuma Hna Kuca Hnene La Sasaiatri Ne Watchtower, e Patterson, e Neweiok.

• Itre Hna Amekötin: Itre trefëne ka köni macatre ne bapataiso hë ka 21 uti hë 38 lao macatre, nge ka atreine qene Papale. Lue macatre ne faipoipo hë angatr, nge lue macatre ne xome hë angatre la huliwa ne cainöje ngöne la drai ka pexej. Loi e itre ka egöcatre angatr. Kola saene la itre pionie ka huliwa ngöne la ketre nöje trehnyiwa (ene fe lo itre mesinare); itre qatre thupe ka iwai trotro; itre atrene la Bethela; itre ka sine lo Ini Thatraqane La Cainöj, me Ini Thatraqane La Itre Trejine Trahmanyi Ka Tha Faipoipo Kö, me Ini Thatraqane La Itre Trefëne Keresiano.

• Aqane Trongen: Kola kuca la ini cili ngöne la ijine kovasio ne distrik, nge hna hnen ngöne la itre xa filial. Hetre itre xa ithuemacanyi hna troa hamëne ngöne la icasikeu cili. Maine pëkö icasikeu hna kuca ngöne la itre kovasio ne la nöje i nyipunie, nge aja i nyipunie troa hane saen, hawe, loi e tro nyipunieti a cinyanyi kowe la filiale i nyipunie.

Ini Thatraqane La itre Atre Ne La Kometr Ne La Filial Me Itre Föi Angatr

• Aliene La Ini Cili: Troa xatuane la itre trejine ka huliwa ngöne la itre Kometr Ne La Filial, troa thupëne hnyawa la itre Bethela, me itre huliwa ka eje e hnine la itre ekalesia, me thupëne la itre sirkoskripsio me itre distrik; ketre tune mina fe la itre ujë qene hlapa, me feja itus me iupe fë itre ej, me elemekene la itre xa huliwa kö.—Luka 12:48b.

• Eqean: Lue treu.

• Hnë: Ngöne La Itre Iuma Hna Kuca Hnene La Sasaiatri Ne Wathchtower, e Patterson, e Neweiok.

• Itre Hna Amekötin: Thatraqane la itre atre ne la Kometr Ne La Filial, maine Kometr Ne La Nöj.

• Aqane Troa Sin: Lapa Ne Xomi Meköt la ka könëne la itre trefëne cili.

[Ithuemacany e cahu fen]