Loi e Tro Pala Hi a Fie La Itre Itine Feja, Matre Tro Itre Eje a Cia
1. Nemene la nyine tro sa fie matre troa cia hnyawa?
1 Ame la itre itine feja hna tran ngöne la ketre hlapa, tre, nyipi ewekë troa fie matre tro itre eje a cia hnyawa. Ketre tune mina fe lai kowe la itre itine feja ne la nyipici, lo hna jumejume e kuhu hni ne la itre atre ne la teritoare së. (1 Kor. 3:6) Maine easa ajane tro la itre itine feja cili a cia wane hnyawa, me kökötre lolo, eje hi laka, nyipi ewekë tro pala hi sa bëeke hmaca troa wai angatr, me fie la itre itine feja cili ngöne la götrane la ua hnene la Wesi Ula i Akötresie.
2. Tune ka la aqane tro sa hnëkë, matre ijiji së troa bëeke hmaca troa wange la atr hne së hna cainöje kow?
2 Hnyinge Jë: Ame ngöne la easa hnëkëne la itre pane ithanata hne së hna troa qaja, tune ka matre troa pane hnëkëne la ketre hnyinge ka troa aijijë së troa bëeke hmaca troa wange lai atr? Ame la hnyinge cili, loi e tro sa qaja ngöne la easa troa nyipune la porotrike së; celë hi jëne tro së lai a bëeke troa wai angeice hmaca. Nyimutre la itre trejine ka öhnyi eloine la troa iëne la ketre mekune qa hnine la itus Ini Tusi Hmitrötr, ke kola aijijë angatre troa amamane la aqane troa nyiqane inine la Tusi Hmitrötre memine la ketre atr.
3. Nemene la itre ithuemacanyi nyine tro sa xom, ngöne la easa öhne laka, hetre aja ne la atr hne së hna xötrei cainöje kow?
3 Troa Xomi Not Hnyawa: Thupene la easa iahni memine la atr ngöne la easa xötrei ithanata memin, loi e tro sa xomi ijine troa xomi note hnyawa. Tro sa fejane hnyawa la ëje ne la atr, memine la götrane hnei angeice hna lapa ngön. Ketre, tro mina fe sa sija la drai memine la hawa hne së hna xome matre troa ithanata me angeic, memine la tane porotrik me itre itusi hne së hna hamën. Hapeu, ka hmi kö angeic? Hapeu, ketre hene ne lapa angeic? Hnei angeice kö hna qaja la itre aja i angeic, me itre ewekë hna hnehengazon? Tro ha xatua së hnene la itre ithuemacanyi cili troa eköthe hnyawa me hnëkëne la porotrike së thatraqane la ketre drai. Ketre, loi e tro sa cinyanyine la drai hne së hna isa pui memine lai atr, memine fe la hnyinge hna troa sa.
4. Pine nemene matre nyipi ewekë tro sa catre ngöne la easa thele troa akökötrene la aja ka eje thene la ketre atr?
4 Catre Pi Së: Tha tro jë kö Satana a cile troa ‘xometrije la wesi ula’ hna trane e kuhu hni ne la atr. (Mar. 4:14, 15) Qa ngöne lai, tha tro pi kö sa cile troa bëeke hmaca kowe lai atr ka ajan, e tro sa öhne laka ka patre pala hi angeice ngöne la easa traqa. Tune ka e troa iupi fë koi angeice la ketre tus, maine sija pena la ketre pepa nyine thuemacanyi angeic? Hnene la ketre pionie hna nyiqane inine la Tusi Hmitrötre memine la ketre föe ngöne la qene qëhnelö, ngo pine laka jole hë troa iöhnyi hmaca me eahlo, ene pe hnene la pionie cili hna cinyanyine la ketre tusi koi eahlo. Nge ame hë la kola öhnyi eahlo hmaca hnene la pionie, tre, önine jë hi la föe cili, ka hape, hna ketri eahlo hnyawa hnene la aqane hnehengazo eahlo hnene la trejine föe. Maine tro pala hi sa fie la itre itine feja ne la nyipici, eje hi lai laka, tro hë sa öhnyi madrine qa ngöne la manathithi celë, ene la troa sine la kola cia hlöeë la feja, uti hë la troa “hete wen, isa caate nge luepi, me köniate, me ca haded.”—Mar. 4:20.