Eue La Troa Bëeke Hmaca Troa Wange La Itre Atr Ka Hetre Hni Ka Ajan?
1. Kola hapeu la troa inine la itre atr?
1 Ame la troa inine la itre atr, tre, kolo lai a hape, troa wange hmaca la itre atr ka ajane troa atrepengöne la Baselaia i Iehova. (Mat. 28:19, 20) Loi e tro sa iwai hmaca ngöne la ijine ka ijij koi së thenge la porogarame së, ngo ka ijij mina fe kowe la atr hne së hna troa wang. Pine nemene matre loi e tro sa canga bëeke troa iwai, thupene lo kola xötrei iöhny?
2, 3. Pine nemene matre loi e tro sa thele troa canga iwai hmaca?
2 Pine Nemen Matre Troa Canga Iwai Hmaca? Easenyi hë matre fenesi pi la huliwa ne troa cainöjëne “la maca ka loi celë ne la baselaia,” nge ketre easenyi hë la pun kowe la fen ka ngazo celë. (Mat. 24:14; 1 Pet. 4:7) Qa ngöne lai, pine laka kolo pala kö a melëne la “drai ne mel” hnene la itre atr ka hetre hni ka ajan, haawe, nyipi ewekë tro sa trongëne la eamo celë troa ‘catre cainöj’; kolo lai a hape, troa canga bëeke hmaca troa wange la itre atr cili.—2 Kor. 6:1, 2; 2 Tim. 4:2.
3 Kolo pala hi a thele hnei Satana troa feje trije la itre itine feja ne la Baselaia hne së hna traan e kuhu hni ne la ketre atr ka hetre hni ka ajan. (Mar. 4:14, 15) Ame itre xaa ijin, kola hnyima sai angatr hnene la itre atrene la fami angatr, me itre sine ce ini me angatr, me itre xane kö. Loi e tro sa canga iwai hmaca matre troa sisedrëne lo porotrike së hnapan, ke, thapa pi elanyi la aja ka eje thei angatr hnene la itre xaa atr.
4. Ame ngöne la kola xötrei iöhny, nemene la nyine tro sa kuca matre troa hnëkëne la aqane tro sa iwai hmaca?
4 Loi e Tro Sa Isa Pui: Ame ngöne la kola xötrei iöhnyi memine la ketre atr, qëmekene troa nue angeic, tre, ka lolo catr e tro epuni a isa pui göi troa bëeke hmaca. Amejëne jë la ketre hnying nyine tro epuni a sa ngöne lo kola troa iwai hmaca. Nyipi ewekë catr tro epuni a xomi not hnyawa ngöne lo kola xötrei iöhny, me xome hnyawa fe la drai hnei epuni hna isa pui. Maine ijije hi ngöne la porogarame i epun, sipone jë troa bëeke hmaca ngöne la drai ka troa xulu maine pena ngöne la itre drai thupen. E hnei epuni hna xötrei iöhnyi memine la atr ngöne la ketre mecixen maine sabath, ke, ka huliwa angeic ngöne la wiik, haawe, maine jë tro angeic a ajane troa wai angeice hmaca e mecixen maine sabath ka troa xulu. Nyipi ewekë tro epuni a eatrëne la hna isa pui.—Mat. 5:37.
5. Maine tro sa canga iwai hmaca, tro lai a xatua së tune kaa troa eatrëne la hna amekötine hnei Iesu, ene la troa inine la itre atr?
5 Nyimutre la itre kepine ka loi ka upi së troa canga wange hmaca la itre atr ka hetre hni ka ajan. Qa ngöne lai, catre pi së troa isa pui memine la itre atr, me canga traqa troa wai angatr, ke, “xoxopate pe hi la ijin.” (1 Kor. 7:29) Maine tro sa canga bëeke troa wange hmaca la itre atr ka hetre hni ka ajan kowe la maca ne la Baselaia, haawe, tro ha amanathithine hnyawa la trenge catre së.