Ketre Thina Ka Sisitria Catre Nyine Troa Hetrenyi Hnene La Atr Ka Hamë Ini Hnyawa
1. Nemene la thina ka sisitria ka aijijëne la ketre atr troa hamë ini hnyawa?
1 Nemene la ka aijijëne la ketre atr troa ketre atre hamë ini ka lolo? Hapeu, hnene la hnei angeice hna ini? Hnene la aqane mele i angeic? Hnene la itre atreine i angeic? Ame la thina cili, tre celë hi la ka eatrëne la Wathebo; ketre thina lai ka nyihatrene la itretre drei Iesu, nge celë hi la thina ka sisitria ka eje ngöne lo eke thina i Iehova. (Ioane 13:35; Gal. 5:14; 1 Ioane 4:8) Ame la thina cili, tre, ene la ihnim. Ame la itre ka hamë ini hnyawa, tre kolo itre atr ka amamane la ihnim.
2. Pine nemene matre nyipi ewekë catre koi së troa hnime la itre atr?
2 Troa Hnime La Itre Atr: Hnime catre la itre atr hnei Iesu, lo Atre Hamë Ini Ka Sisitria, nge celë fe hi lai thina ka upi angatre troa drei nyidrë. (Luka 5:12, 13; Ioane 13:1; 15:13) Maine easa hnehengazone la mele ne la itre atr, hawe, tro hë sa thele la nöjei ijine ka sisitria troa cainöj. Thatreine fe kö troa sewe së hnene la iaxösisi maine pena hnene laka tha semesine së kö hnene la itre xan. Tro hë sa hnehengazone la itre aja ne la itre atr hne së hna cainöje kow, nge tro hë sa thele troa ihmeku la aqane ithanata së memine la itre aja cili. Tha tro pi kö sa xomi ijine casi hi ngöne la easa inine la Tusi Hmitrötre memine la itre hnainin, ngo ene mina fe ngöne la easa hnëkëne la itre ini Tusi cili.
3. Tune ka la aqane troa xatua së troa cainöj, hnene la aqane hnine së la itre nyipici qa hnine la Tusi Hmitrötr?
3 Troa Hnine La Itre Nyipici Qa Hnine La Tusi Hmitrötr: Hnei Iesu mina fe hna hnine la itre nyipici qa hnine la Tusi Hmitrötr, me goeëne itre eje ceitu me itre trengamo. (Mat. 13:52) Maine tro sa hnine la nyipici, hawe, tro hë sa cainöje cememine la madrin, nge celë hi la ka troa ukune la itre atr troa drei së. Tro ha xatua së hnene la ihnimi cili troa wangatrune la itre ithuemacanyi ka sisitria hne së hna troa hamën, me wangacone la itre atreine së, nge eje hi lai laka tha tro hë sa xou ngöne la hna cainöj.
4. Tro sa eëne tune ka la ihnim?
4 Loi e Troa Akökötrene La Ihnim: Tune ka la aqane tro sa akökötrene la ihnimi së kowe la itre atr? Hnene la hna sine thele la ihnimi ka eje thei Iehova memine la Hupuna i Nyidrë, memine la pengöne mele ne la itre atr enehila ngöne la götrane la ua. (Mar. 6:34; 1 Ioane 4:10, 11) Maine tro pala hi sa ketre sipu inine la Tusi Hmitrötre me sine thele la itre ewekë, hawe, tro ha kökötre la aqane hnine së la itre nyipici qa hnine la Tusi Hmitrötr. Ame fe la ihnim, tre, ketre igötranene la wene la ua. (Gal. 5:22) Qa ngöne lai, catre pi së troa sipone koi Iehova la uati hmitrötre jëne la thith, me sipo Nyidrë troa xatua së troa kökötre ngöne la ihnim. (Luka 11:13; 1 Ioane 5:14) Ngacama qea la hne së hna ini, maine ka hekö hë së ngöne la nyipici, maine ka hetre atreine së pena, ngo tro hë sa ketre atre hamë ka lolo, e hne së hna amamane la ihnim.