Kola Sa La Itre Hnyinge i Nyipunie

◼ Tro sa wangatrehmekune tune ka laka, ijije hi tro sa hamëne la itre itusi së kowe la ketre atr?

Ame la ewekë hnapan, tre, ene la troa atre pengöne la atr. Maine hetre hni ne ajane i angeic, hawe, ijije hi tro sa hamëne koi angeice lo lue zonale së, maine ketre boroshür, maine ketre itusi së pena. Aqane tro hi së lai a ujë ngacama co hi maine pë pena manie hnei angeice hna hamën thatraqane la huliwa ne cainöje e cailo fen. (Iobu 34:19; Hna ama. 22:17) Ngo ame ngöne la ketre götran, tha tro pi kö sa hamëne la itre itusi së kowe la itre atr ka tha ajane kö.—Mat. 7:6.

Troa mama tune ka laka, eje thene la ketre atr la hni ne ajan? Kola mama hnyawa lai ngöne la angeice a pi porotrike me easë. Maine angeic a drenge hnyawa la hne së hna qaja, me sa la itre hnyinge së, me hane qaja mina fe la mekuna i angeic, tre, itre ewekë lai ka amamane laka angeice a pi porotrike me easë. Ame la angeice a ce e me easë la ketre xötre qa hnine la Tusi Hmitrötr, tre, kolo hi lai amamane laka, angeice a metrötrëne la Wesi Ula i Akötresie. Ame e itre xa ijin, ka loi troa hnyinge kowe la atr, maine angeice kö a troa e la itusi hne së hna hamën. Ame e cili, nyipi ewekë troa atreine waiewekë hnene la itretre cainöj, matre troa atre maine eje thene la atr la hni ne ajan. Drei la ketre ceitun, maine easa cainöje e cahu gojeny, tha tro pi kö sa hamëne menune kowe la itre atr la itre zonale me itre boroshür, maine itre itusi pena. Maine jole koi së troa öhne thene la atr laka hetre hni ne ajane i angeic, hawe, loi e tro hi sa hamëne koi angeice la ketre pepa ne ihë maine ketre tarake pena.

Ketre tune mina fe, ame la easë a komadë itusi e hnine la ekalesia, tre, loi e troa sipone la ka ijij thatraqane la huliwa ne cainöj, ngo tha thenge kö la hne së hna atreine troa hamën. Tha kolo kö a hamëne la itre ahnahna matre troa nyithupene la itre itusi së, ngo matre troa sajuëne la nöjei götrane ne la huliwa ne cainöj e cailo fen. Hetre manie së ju hë maine pë pena, ngo e hetre hni ne ole së, tha tro hë sa hamëne hi la munën, ngo tro hë sa hamëne atrune thenge la hne së hna ajan matre troa sajuëne la itre aja ne la Baselaia. (Mar. 12:41-44; 2 Kor. 9:7) Loi e tro mina fe la hni ne ole a uku së troa xome hi la itre itusi hne së hna ajan, matre tha tro kö a aluzine la itre ewekë qathei Akötresie.

[Hna cinyhan ne la götran 2]

Nyipi ewekë troa atreine waiewekë hnene la itretre cainöj, matre troa atre maine eje thene la atr la hni ne ajan