Ketre Aqane Troa Öhnyi Madrine Qa Ngöne La Itre Nyima Ne La Baselaia

Atre hi la itre hlue i Iehova ka hape, ketre ahnahna qathei Nyidrëti la miuzik. (Iako. 1:17) Nyimutre la itre ekalesia ka amë lo itre nyima ne la Baselaia qëmekene troa nyiqane la itre icasikeu nge e thupene mina fe la kola nyipune la itre icasikeu, matre troa drenge hnene la itre atre ne ej. Kösë lo ketre aqane tro lai a ikep. Ketre, ame la itre miuzik cili, tre, itre eje a xatuane la itre atrene la ekalesia troa hnëkë hnyawa thatraqane la hmi. Ketre, maine tro sa drenge la itre nyima cili, me goeëne ngöne la itusi së, eje hi lai laka, tro hë sa majemi kowe la itre nin, nge tro hë sa atreine nyimane hnyawa la itre nyima cili. Kolo mina fe a drenge la miuzike cili thupene la itre icasikeu, ene pe madrine la itretre trejine troa pane porotrike me ithuecatrekeu ngöne la ijine cili. Hawe, loi e tro itre lapa ne la itre qatre thup a hnëkëne amë la itre ewekë, matre troa elone la miuzik hna hape, Chantons à Jéhovah — Accompagnement au piano, qëmekene me e thupene la itre icasikeu. Loi e tro angatre a thupëne matre tha tro kö a ho menu catre la ikaho, nge ajolëne jë la itre atr troa porotrik.