Miuzik Ka Akeukawane La Itre Hni Së
1 Ame la troa nyima memine la miuzik tre lue ewekë lai ka nyipi ewekë catr ngöne la nyipi hmi. Ame ekö e Isaraela, hna nyimane hnei Asafa me itre trejine me angeic ka hape: “Olejë koi Iehova. . . . Nyima jë koi nyidë, thinge jë la ite nyima koi nyidë, qaja jë la ite huliwa i nyidë asë nyine hain.” (1 Aqane l. ite jo. 16:8, 9) Ame enehila, tre easë a ce thinge la itre nyima koi Iehova ngöne la nöjei wiik easë a icasikeu hnine la ekalesia. (Efe. 5:19) Drei la ketre ijine ka mingöming hna aijijë së troa hane atrune la ëje i Iehova!—Sal. 69:30.
2 Maine tro sa drenge la itre nyima ene lo itre Mélodies du Royaume, ene laka kolo hi a elone la miuzik ngo patre pë hë la itre trenge ewekën, ijije hi troa nyialiene la he së hnene la itre mekune ngöne la götrane la ua. Hna qaja hnene la ketre trejine föe ka hape: “Ame ngöne la kola elone lai miuzik, tre eni mekune hmaca la itre trenge ewekën. Drei la ketre jëne ka lolo troa meku Iehova pala hi ngöne la kola elone la itre miuzik!”—Fil. 4:8.
3 Itre Ijine Troa Drenge Me Madrine Itre Ej: Maine tro sa elone la itre nyima, ene la itre Mélodies du Royaume ngöne la hnalapa së, eje hi lai laka, tro ha keukawa nge hetre thangane ka loi ngöne la ua nge easë lai a thele troa tingetinge hnine la hnepe lapa. Hna cinyihane hnene la ketre fami ka hape: “Hne huni pala hi hna drenge la [miuzike] cili ngöne la hnalapa hun, me hnine la loto, nge thaa hmanono kö huni hna drenge la miuzike cili. Ka lolo catr mina fe la itre Mélodies du Royaume, ke itre ej a eköthe la tingetinge ngöne la itre hni hun, qëmekene tro huni a sine la itre icasikeu i Keresiano maine ngöne pena la eahuni a tro kowe la ketre hnë asabele.” Hna qaja hnene la ketre trejine föe ka hape: “Hetre madrineng troa nyihnyawane la uma nge eni a drenge la itre nyima, ketre thatreine kö ni troa qaja la madrin ka eje theng ngöne la eni a sa la itre maano. Eni mina fe a drenge la miuzike cili ngöne la eni a nango drenge laka eni a kucakuca. Drei la miuzike ka hetre thangane ka lolo catr kowe la mele së! . . . Ame asë hi la itre nyima, tre itre eje asë hi a isa eköth la madrin memine la manathith.” Hetrenyi kö la itre xaa ijine ka troa hetre thangane ka loi e troa dreng lai miuzike cili ka troa akeukawane la itre hni epun?
4 Nyimutre la itre miuzik enehila ka amamane hnyawa la mekune ne la fene celë. Ijije hi troa xatuane hnene la itre keme me thin la itre nekö i angatr matre troa cia e kuhu hni nyudren la ajane troa drenge la itre nyima ka hetre thangane ka loi, ene lo itre Mélodies du Royaume. Nyimutre la itre hnainin memine la itre atr ka hetre hni ne ajan kowe la nyipici, ka madrine fe troa atreine nyimane la itre nyima ka atrunyi Iehova.—Sal. 47:1, 2, 6, 7.