Atre Fe Hi Epun?

Nemene la göhnene la miuzik thene la angetre Isaraela?

KA TRU catr kowe la angetre Isaraela la miuzik. Ame ngöne la Tusi Hmitrötr, hna lapa qaja la itre nyine elo miuzik me nyima. Ame la götrane ka tru e hnine la Tusi Hmitrötr, ke itre nyima. Ame la itre tusi nyine nyiman ngöne la Tusi Hmitrötr, ke itre Salamo, me Nyima i Solomona, me Itre Treije i Ieremia. Önine la ketre itus, Tusi Hmitrötr “a amamane la aqane huliwane la angetre Isaraela la miuzik ngöne la nöjei götrane la mele i angatr.”

Angatr a elo miuzik e nöjei drai. Angetre Isaraela a elo miuzik, matre qaja la aliene hni i angatr. (Isa. 30:29) Ame la kola acili joxu, maine feet, maine hun ngöne la isi, itre föe a lepelepe itrapë, me nyima, me fiafia. (Ang. A. 11:34; 1 Sam. 18:​6, 7; 1 It. Jo. 1:​39, 40) Angatre mina fe a nyima ngöne la itre ijine hnëmec. (2 Aq. Jo. 35:25) Önine la ketre diksioner, “ka tru catr kowe la angetre Heberu la miuzik.”

Kola elo miuzik ngöne la hnanyijoxu. Pi tro catr la itre joxu ne Isaraela a drei miuzik. Hnei Saulo joxu hna hë Dravita kowe la hnanyijoxu, matre tro angeic a elo miuzik. (1 Sam. 16:​18, 23) Ame hë la kola joxu hnei Dravita, hnei angeic hna kuca la itre jia ne miuzik ka hnyipixe, me sil la itre nyima, me acile la ca gurup nyine elo miuzik ngöne la uma ne hmi i Iehova. (2 Aq. Jo. 7:6; Amo. 6:5) Ame ngöne la hneijine i Solomona joxu, ke hetre trahmanyi me föe ka nyima ngöne la hnanyijoxu.​—A. Cai. 2:8.

Angatr a nyima matre atrunyi Akötresie. Ame ngöne la uma ne hmi e Ierusalema, traqa koi 4 000 lao atr ka atrunyi Iehova hnene la itre nyine elo miuzik, tune la itre sëbal, me itre nyine elo miuzik ka hetre filen, me arp, me trutru. (1 Aq. Jo. 23:5; 2 Aq. Jo. 5:​12) Ngo tha angatre casi kö la ka atrunyi Iehova hnene la miuzik. Alanyimu fe la angetre Isaraela ka nyima trootro ngöne la gojeny, la angatr a tro troa sine la itre feet e Ierusalema. (Sal. 120-​134) Önine la itre tus i angetre Iudra, hnene la angetre Isaraela hna nyiman la itre Salamo ne Hallel,a la angatr a atrune la Paseka.

Ame enehila mina fe, itre hlue i Iehova a wangatrune la miuzik. (Iako. 5:​13) Easë pala hi a nyima matre atrunyi Iehova. (Efe. 5:​19) Kolo fe a acasi së hnene la miuzik. (Kol. 3:​16) Nge eje fe a acatrene la lapaune së ngöne la itre itupath. (It. Hu. 16:25) Matre ame la easa nyima koi Iehova, easë hi lai a amamane koi Nyidrë la lapaune së me ihnimi së koi Nyidrë.